သဵင်ၵွင်ႈတႅၵ်ႇပႆႇယဵၼ် ၵူၼ်းမိူင်းၼပ်ႉႁဵင် ပႆႇၸၢင်ႈပွၵ်ႈႁိူၼ်း

သိုၵ်း SSPP – RCSS ယိုဝ်းၵၼ်မႃး ၾၢႆႇဢွၵ်ႇဝဵင်းလၢႆးၶႃႈ ၸမ်လိူၼ်ယဝ်ႉ သဵင်ၵွင်ႈပႆႇယဵၼ် ၵူၼ်းမိူင်းၼပ်ႉႁဵင် ပႆႇၸၢင်ႈ ပွၵ်ႈႁိူၼ်းယေးၵၼ် ယၢမ်းလဵဝ် ၸိူဝ်းပၢႆႈမႃးသွၼ်ႈဝႆႉ ၸွမ်းဝတ်ႉ(ၵျွင်း) မုၼ်ၸဝ်ႈ လူဝ်ႇတၢင်းၸွႆႈထႅမ် ၶွင်ၵိၼ်ယႅမ်ႉ။

တႄႇဢဝ် ဝၼ်းတီႈ 11/4/2023 ၼၼ်ႉမႃး သိုၵ်း RCSS တင်း SSPP ယိုဝ်းၵၼ်မႃး ၶိူဝ်းယႂ်း တၢင်းၾၢႆႇဢွၵ်ႇဝဵင်းလၢႆးၶႃႈ ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်းၼၼ်ႉ ႁၢၼ်ႉတေႃႇထိုင်ယၢမ်းလဵဝ် သဵင်ၵွင်ႈပႆႇယဵၼ် တုမ်ႉတိူဝ်ႉၵူၼ်းဝၢၼ်ႈ ၼႂ်းဢိူင်ႇ ႁၢႆးသႅင်၊ ဢိူင်ႇဝၢၼ်ႈထီႇ၊ ဢိူင်ႇပၢင်သၢင်း၊ ဢိူင်ႇဝၢၼ်ႈသၢင်း၊ ဢိူင်ႇဝၢၼ်ႈၸေႈ၊ ဢိူင်ႇၼႃးပွႆးလႄႈ ဢိူင်ႇၼွင်ၵေႃႈ ၸိူဝ်းၼႆႉ ဢွၼ်ၵၼ် ပၢႆႈၶဝ်ႈဝဵင်းသွၼ်ႈယူႇၸွမ်းႁိူၼ်းယေးပီႈၼွင်ႉၽႂ်မၼ်းလႄႈ ၸွမ်းဝတ်ႉမုၼ်ၸဝ်ႈ။

ၽူႈၸွႆႈထႅမ် ၵူၼ်းပၢႆႈၽေးသိုၵ်း ဝဵင်းလၢႆးၶႃႈ လၢတ်ႈတီႈၽူႈတွႆႇႁွၵ်ႈဝႃႈ – “ယၢမ်းလဵဝ် ၵူၼ်းပၢႆႈၽေး ဢၼ်ပၢႆႈမႃး သွၼ်ႈဝႆႉ တီႈဝတ်ႉမုၼ်ၸဝ်ႈ ၸိူဝ်းၼႆႉ လူဝ်ႇတၢင်းၸွႆႈထႅမ် ႁႅင်းတီႈသုတ်းတႄႉပဵၼ် ၽၵ်းယိူဝ်ႈၼၢင်းၶဵဝ်၊ ၼမ်ႉမၼ်း၊ ၵိူဝ်၊ ၽွင်ဝၢၼ်၊ ၼမ်ႉၵိၼ် ၸိူဝ်းၼႆႉ။ ယွၼ်ႉဝႃႈ ဢွၼ်ၵၼ်မႃးၶွၼ်ႈတီႈလဵဝ်ၵၼ်ၼမ်လႄႈ ၸဝ်ႈတႃႇၼ ဢၼ်မႃးၸွႆႈထႅမ်ဝႆႉတႄႉ ၵမ်ႈၼမ် ပဵၼ်ၵူၼ်း ပိုၼ်ႉ တီႈလၢႆးၶႃႈ။ ဢၼ်ၸဝ်ႈတႃႇၼ လုၵ်ႉတီႈၵႆသေ မႃးၸွႆႈထႅမ်တႄႉ ပႆႇမီးၶႃႈ”- ဝႃႈၼႆ။

ၵူၼ်းပၢႆႈၽေးသိုၵ်း ဢၼ်ပၢႆႈမႃးသွၼ်ႈဝႆႉ တီႈဝတ်ႉမုၼ်ၸဝ်ႈ ၼႂ်းဝဵင်းလၢႆးၶႃႈၼႆႉ တီႈဝတ်ႉ/ ၵျွင်းၶမ်း၊ ၵျွင်းႁေႃၶမ်း၊ ၵျွင်းဝႃႇသူဝ်ႇလႄႈ ၵျွင်းၸလၢႆးၶုမ်ႇ ၸိူဝ်းၼႆႉ။ ယဝ်ႉၵေႃႈ ၸွမ်းႁိူၼ်းယေး ပီႈၼွင်ႉၽႂ်မၼ်းထႅင်ႈ တင်းၼမ် ၼႆယဝ်ႉ။

“မိူဝ်ႈဝႃး သဵင်ၵွင်ႈတႅၵ်ႇထႅင်ႈသေ ၵူၼ်းဝၢၼ်ႈၼွင်ၵေႃႈ ဢွၼ်ၵၼ်ပၢႆႈၵႂႃႇတၢင်း ဝၢၼ်ႈၼမ်ႉႁူး ဢိူင်ႇၼႃးပွႆးထႅင်ႈ တႃႇ ႁူဝ်ၵူၼ်း 91 ၵေႃႉၼႆႉ။ ယဝ်ႉၵေႃႈ ၵူၼ်းၼႂ်းဢိူင်ႇပၢင်သၢင်း ဢွၼ်ၵၼ်ပၢႆႈၵႂႃႇတၢင်းဝၢၼ်ႈၸိင်း ၵေႃႈမီး ပၢႆႈမႃးတၢင်းဝဵင်းၵေႃႈ မီး ၼမ်။ ယၢမ်းလဵဝ် သဵင်ၵွင်ႈတိုၵ်ႉတႅၵ်ႇယူႇ ၵူႈဝၼ်း ။ ႁူဝ်ၵူၼ်းပၢႆႈၽေးသိုၵ်း တီႈဝဵင်းလၢႆးၶႃႈၼႆႉ ယွၼ်ႉဢမ်ႇမႃး ၶွၼ်ႈတုမ် ၵၼ်ဝႆႉတီႈလဵဝ်လႄႈ ဢမ်ႇလႆႈႁူဝ်ႁုပ်ႈမၼ်းလီလီ။ ပေႃးႁဝ်းၶႃႈ မႃးထတ်းတူၺ်းတႄႉ ႁူဝ်ၵူၼ်း ပၢႆႈ ၽေးတေဢမ်ႇယွမ်း 1,000 ၶႃႈ။ မိူၼ်ၼင်ႇ ဢိူင်ႇႁၢႆးသႅင်ၼႆႉ ၵူၼ်းဝၢၼ်ႈပၢႆႈဢွၵ်ႇမႃး တင်းဢိူင်ႇယဝ်ႉ၊ ဢိူင်ႇပၢင်သၢင်း၊ ဢိူင်ႇဝၢၼ်ႈထီႇ ၸိူဝ်းၼႆႉထႅင်ႈ”-  ၽူႈၸွႆႈထႅမ် ၵူၼ်းပၢႆႈၽေးသိုၵ်း သိုပ်ႇလၢတ်ႈၼႄ ၼင်ႇၼႆ။

ယၢမ်းလဵဝ် ပဵၼ်ၶၢဝ်းၵၢၼ် တႃႇၽုၵ်ႇသွမ်ႈယဝ်ႉလႄႈ ၵူၼ်းပၢႆႈၽေးသိုၵ်း မုင်ႈမွင်း ႁႂ်ႈပၢင်တိုၵ်း တင်းသွင်ၾၢႆႇၼႆႉ ၸဵဝ်းၵိုတ်းတိုၵ်းၵၼ် ဝႃႈၼႆ။

ၵူၼ်းပိုၼ်ႉတီႈ ဝဵင်းလၢႆးၶႃႈ လၢတ်ႈတီႈၽူႈတွႆႇႁွၵ်ႈဝႃႈ – “ယွၼ်ႉပၢင်တိုၵ်းၼႆႉသေ တုမ်ႉတိူဝ်ႉ ၵူၼ်းပၢႆႈၽေးသိုၵ်းတႄႉတႄႉဝႃႈဝႃႈ ၵမ်းလဵဝ်ၼၼ်ႉယဝ်ႉ။ ယွၼ်ႉဝႃႈ ၶၢဝ်းၼႆႉ ပဵၼ်ၶၢဝ်းၵၢၼ်ငၢၼ်း ၵူၼ်းမိူင်းလူဝ်ႇလူင်းႁဵတ်းၵၢၼ်ယဝ်ႉလႄႈ တႃႇတေၽုၵ်ႇသွမ်ႈ တႃႇတေၵိၼ်ပီတေမႃးၼႆႉ သင်ဝႃႈ ဢမ်ႇႁဵတ်းဢမ်ႇၽုၵ်ႇဝႆႉ ပီၼႆႉၸိုင် ပီၼႃႈမႃး တေဢဝ်သင်ၵိၼ်”- ဝႃႈၼႆ။

ၽွင်းပဵၼ်ပၢင်တိုၵ်းၵၼ်မႃးၼႆႉ ၵူၼ်းမိူင်းၼႂ်းပိုၼ်ႉတီႈ ၾၢႆႇဢွၵ်ႇဝဵင်းလၢႆးၶႃႈ ဢွၼ်ၵၼ်ပၢႆႈၵႂႃႇတၢင်းမိူင်းထႆးၵေႃႈ မီးမႃးၼမ် ဢမ်ႇယွမ်း 40-50 ၵေႃႉယဝ်ႉ။ ယၢမ်းလဵဝ် မၢင်ၸိူဝ်း တိုၵ်ႉႁၢင်ႈႁႅၼ်း တႃႇပၢႆႈၶဝ်ႈမိူင်းထႆးထႅင်ႈ တင်းၼမ်။ သင်ဝႃႈ ငဝ်းလၢႆး ၼႂ်းပိုၼ်ႉတီႈ တိုၵ်ႉပဵၼ်ၼႆယူႇတႄႉ – ၵူၼ်းပိုၼ်ႉတီႈ ဝဵင်းလၢႆးၶႃႈလၢတ်ႈ။

ယွၼ်ႉပၢင်တိုၵ်း တင်းသွင်ၸုမ်းၼႆႉသေ ပၢင်သွၼ်ၾိင်ႈငႄႈပုတ်ႉထလႄႈ လိၵ်ႈလၢႆးတႆး ၶၢဝ်းမႆႈ ၼႂ်းၸႄႈဝဵင်းလၢႆးၶႃႈ လႆႈ ၵိုတ်းပႅတ်ႈ ဢမ်ႇယွမ်း 13 ပၢင်၊ လုၵ်ႈဢွၼ်ႇ ႁၢမ်းၵၢၼ်ႁဵၼ်း ဢမ်ႇယွမ်း 360 ၵေႃႉယဝ်ႉ ဝႃႈၼႆ။