မိူဝ်ႈၼႆႉ ဝၼ်းတီႈ 30/5/2026 ယၢမ်းၵၢင်ၼႂ် 8 မူင်း မိၼ်းဢွင်ႇလၢႆႇ ၸွမ်ၸိုင်ႈယိုတ်းမိူင်း ၶီႇႁိူဝ်းမိၼ်ၶိုၵ်ႉတွၼ်းသေ လုၵ်ႉဝဵင်းလူင်ၼေႇပျီႇတေႃႇ ဢွၵ်ႇၶၢဝ်းတၢင်းၵႂႃႇမိူင်းဢိၼ်းတီႊယိူဝ်ႊ ပိူဝ်ႈတႃႇႁူပ်ႉထူပ်းၸွမ်ၸိုင်ႈမိူင်းဢိၼ်ႊတီႊယိူဝ်ႊ ၼႆယဝ်ႉ။

ၵူၼ်းၸိူဝ်းၵႂႃႇၸွမ်းမိၼ်းဢွင်ႇလၢႆႇၼၼ်ႉ ပႃးဢူးၶိၼ်ႇယီႇ ၽွင်းလူင်မိူင်းႁူမ်ႈတုမ် တီႈလုမ်းၸွမ်ၸိုင်ႈ၊ ဢူးတိၼ်ႇမွင်ႇသူၺ်ႇ ၽွင်းလူင်ၾၢႆႇၼွၵ်ႈမိူင်း၊ တွၵ်ႊတိူဝ်ႊၵၢၼ်ႇၸေႃႇ ၽွင်း လူင် ႁွင်ႈၵၢၼ်ၾၢႆႇငိုၼ်းတွင်း လႄႈ လွင်ႈၶွၼ်ႇ၊ ဢူးမိၼ်းၼွင်ႇ ၽွင်းလူင် ႁွင်ႈၵၢၼ်ၾၢႆႇၽုၵ်ႇသွမ်ႈ လႄႈ လဵင်ႉလူတူဝ်သတ်း၊ တွၵ်ႊတိူဝ်ႊ ၶျႃႇလီႇတၢၼ်း ၽွင်းလူင် လုမ်းၵၢၼ်မၢၵ်ႈမီးမိူင်းႁူမ်ႈတုမ် ၵူႈသႅၼ်းသႅၼ်း ၊ တွၵ်ႊတိူဝ်ႊ ၶိၼ်ႇၼၢႆႇဢူး ႁူဝ်ပဝ်ႈ ယေးငိုၼ်းငဝ်ႈၸိုင်ႈ မိူင်းႁူမ်ႈတုမ် (ပႁူဝ်ႇပၢၼ်ႇ) ၊ ၸွမ်သိုၵ်း မူဝ်းမိၼ်ႉသူၺ်ႇ ၽူႈၵုမ်းၾၢႆႇႁဵတ်းဢွၵ်ႇ ၶိူင်ႈၸႂ်ႉ တိုဝ်း ႁွင်ႈၵၢၼ်ၾၢႆႇၵႅတ်ႇၶႄၸိူဝ်ႉၸၢတ်ႈ လႄႈ ၵႅမ်ၽွင်းလူင်ထႅင်ႈလၢႆလၢႆၵေႃႉ ၼႆယဝ်ႉ။

မိူဝ်ႈပီ 2025 မိၼ်းဢွင်ႇလၢႆႇ ၸွမ်ၸိုင်ႈယိုတ်းမိူင်း တင်း ၸွမ်ၽွင်းလူင်မိူင်းဢိၼ်ႊတီႊယိူဝ်ႊၼႆႉ လႆႈၵႂႃႇႁူပ်ႉထူပ်းၵၼ် ၼႂ်းပၢင်ပွႆးၵၢၼ်ႁူမ်ႈသၢင်ႈသျႅၼ်ႊႁၢႆး တီႈဝဵင်းတီႊယႅၼ်ႊၵျိၼ်ႊ ၼႂ်းမိူင်းၶႄႇသေ ဢုပ်ႇဢူဝ်းၵၼ်ဝႆႉ လွင်ႈၵၢၼ်ႁူမ်ႇလူမ်ႈၸွမ်းလႅၼ်လိၼ်၊ လွင်ႈတႃႇယုၵ်ႉမုၼ်းၵၢၼ်ၵႃႉၶၢႆ သွင်ၸိုင်ႈမိူင်း လႄႈ ပိူဝ်ႈတႃႇ တပ်ႉသိုၵ်းတင်းသွင်ၸိုင်ႈမိူင်း တေႁူမ်ႈမိုဝ်း ၵၼ် ႁဵတ်းသၢင်ႈၵၢၼ်ငၢၼ်းၵႂႃႇ မိူဝ်းၼႃႈ ၸဵမ်ၸိူဝ်းၼႆႉ ၼႆယဝ်ႉ။