ၽွင်ႈၶၢဝ်းမႆႈၼႆႉ ၵူၼ်းပၢႆႈၽေးသိုၵ်း ႁဵင်ပၢႆ ဢၼ်မီးၼႂ်းဢိူင်ႇၵိူၼ်ႇတူလူင် ဝဵင်းမွၵ်ႇမႆႇ ၸိုင်ႈတႆးပွတ်းၸၢၼ်း ယၢပ်ႇၵိၼ်းၼမ်ႉၵိၼ်ၼမ်ႉၸႂ်ႉ ဝႃႈၼႆ ။

တႄႇႁူဝ်ပီ 2026 မႃးၼႆႉ ယွၼ်ႉသိုၵ်းမၢၼ်ႈ တင်း ပျီႇတူႉၸိတ်ႉပဢူဝ်း PNO လႄႈ တပ်ႉသိုၵ်း PNLA ပဵၼ်ပၢင်တိုၵ်း ပိုတ်းယိုဝ်းၵၼ်တၢင်းဝၢၼ်ႈပၢင်မၢၵ်ႇၼၼ်ႉသေ ႁဵတ်းႁႂ်ႈၵူၼ်းမိူင်းၼႂ်းပိုၼ်ႉတီႈ မွၵ်ႈ 5 ဝၢၼ်ႈ ႁူဝ်ၼပ်ႉၵူၼ်းႁဵင်ၵေႃႉပၢႆ လႆႈငိူင်ႉပၢႆႈၽေးသိုၵ်းဝႆႉ ၊ ယၢမ်းလဵဝ် ယၢပ်ႇၵိၼ်းၼမ်ႉၵိၼ်ၼမ်ႉၸႂ်ႉဝႆႉ ဝႃႈၼႆ ။

ၼၢင်းယိင်းၼုမ်ႇၵေႃႉၼိုင်ႈ ၼႂ်းၸုမ်းၸွႆႈထႅမ်ၵူၼ်းပၢႆႈၽေးသိုၵ်း လၢတ်ႈၽူႈတွႆႇႁွၵ်ႈဝႃႈ -“ ပွတ်းတၢင်းၵိူၼ်ႇတူလူင်ၼႆႉ ၸဵမ်မိူဝ်ႈဢွၼ်တၢင်း ၼမ်ႉပေႃးယၢပ်ႇၵိၼ်းယူႇယဝ်ႉ ၊ ၵမ်းၼႆႉမႆႈမႃးယဝ်ႉလႄႈ ၼမ်ႉၵေႃႈတိူဝ်းၵိၼ်းမႃးလိူဝ်ၵဝ်ႇ ၊ ၼမ်ႉၵိၼ်ၼႆႉ လႆႈၵႂႃႇတၢင်ႇၵႆႁႅင်းၼႃႇ ၊ တႃႇၼမ်ႉဢၢပ်ႇတႄႉဢမ်ႇမီး ၵမ်ႈၼမ်ဢမ်ႇလႆႈဢၢပ်ႇၼမ်ႉ ၊ တီႈၼႆႈ ပေႃးၵၢင်ၶမ်ႈ ၵတ်းႁႅင်း ပေႃးၵၢင်ဝၼ်းသမ်ႉမႆႈႁႅင်းၼႃႇ”- ဝႃႈၼႆ ။

ယွၼ်ႉၼမ်ႉတႃႇၸႂ်ႉတိုဝ်းႁႃယၢပ်ႇ ဢမ်ႇၵုမ်ႇထူၼ်ႈလႄႈ ၵူၼ်းထဝ်ႈ တင်း လုၵ်ႈဢွၼ်ႇ ဢၼ်လႆႈပၢႆႈၽေးသိုၵ်းဝႆႉၼၼ်ႉ ၸၢင်ႈပဵၼ်တၢင်းပဵၼ် တွင်ႉၵႂႃႇ တွင်ႉႁေႈ၊ လႆႈမႆႈၸႂ် လွင်ႈပၢႆးယူႇလီၶဝ်ဝႆႉပႃး ၼႆ – ၼၢင်းယိင်းၼုမ်ႇ ၸုမ်းၸွႆႈၵူၼ်းပၢႆႈ ၽေးသိုၵ်းလၢတ်ႈ ။

ယၢမ်းလဵဝ် ပၢင်တိုၵ်း ယဵၼ်ဝႆႉသေ ပျီႇတူႉၸိတ်ႉပဢူဝ်း PNO တဵၵ်းၸႂ်ႉၵူၼ်းပၢႆႈၽေး ပွၵ်ႈမိူဝ်းႁိူၼ်းယေးၽႂ်မၼ်းဝႆႉ ။ ၽွင်းပၢင်တိုၵ်းၼၼ်ႉ ယွၼ်ႉမီးမၢၵ်ႇမႅင်းၾင်လိၼ်ၵိုတ်းၶင်ႉဝႆႉလႄႈ  ၵူၼ်းပၢႆႈၽေးသိုၵ်း မႆႈၸႂ်လွင်ႈႁူမ်ႇလူမ်ႈ ပႆႇႁတ်းပွၵ်ႈမိူဝ်းႁိူၼ်းၶိုၼ်း  ဝႃႈၼႆ ။

ၵူၼ်းၸၢႆး ယူႇၼႂ်းဝဵင်းမွၵ်ႇမႆႇလၢတ်ႈၽူႈတွႆႇႁွၵ်ႈဝႃႈ -“ယွၼ်ႉPNO တဵၵ်းၸႂ်ႉ ပွၵ်ႈႁိူၼ်းၶိုၼ်းလႄႈပွၵ်ႈမိူဝ်းၵမ်ႈၽွင်ႈယဝ်ႉ ၊ မၢင်ၸိူဝ်းတႄႉ ဢမ်ႇမီးႁိူၼ်းတေပွၵ်ႈလႄႈ ဢမ်ႇမိူဝ်း  ၊ ၽွင်းပၢင်တိုၵ်းၼၼ်ႉ ၺႃးၽဝ်ႁိူၼ်းဝႆႉ ၊ ၵူၼ်းဢၼ်ပွၵ်ႈမိူဝ်းၸိူဝ်းၼၼ်ႉၵေႃႈ လႆႈမႆႈၸႂ်ၽေးမၢၵ်ႇမႅင်းၾင်လိၼ် ၸိူဝ်းၵိုတ်းၶၢင်ႉဝႆႉလႄႈ  ဢမ်ႇႁတ်းၵႂႃႇမႃးလွတ်ႈလႅဝ်း ဢမ်ႇမီးလွင်ႈႁူမ်ႇလူမ်ႈ – တုမ်ႉတိူဝ်ႉပၢႆးၸႂ်ဝႆႉ  – တေၵႂႃႇတေမႃး လႆႈၾၢင်ႉဝႆႉယူႇတႃႇသေႇ။  ”- ဝႃႈၼႆ ။

လိူဝ်ၼၼ်ႉ ယၢမ်းလဵဝ် ယူႇတီႈၵူၼ်းပၢႆႈၽေးသိုၵ်းပွၵ်ႈၶိုၼ်းႁိူၼ်းၼၼ်ႉသေ ယူႇတီႈပျီႇတူႉၸိတ်ႉပဢူဝ်း PNO ၵမ်ႉထႅမ်ငိုၼ်းၵမ်ႈၽွင်ႈသေ ႁွင်ႉၵူၼ်းႁၢပ်ႇၵၢၼ်သိုၵ်းဝႆႉ – ၵူၼ်းပိုၼ်ႉတီႈလၢတ်ႈ ။

တႄႇဝၼ်းတီႈ 1 လိူၼ်ၵျႅၼ်ႊၼိဝ်ႊရီႊၼႆႉမႃး သိုၵ်းမၢၼ်ႈ တင်း ပျီႇတူႉၸိတ်ႉပဢူဝ်း PNO ႁႅၼ်းသိုၵ်းလေႃႇတိုၵ်းၸူး ငဝ်ႈငုၼ်းတပ်ႉသိုၵ်း PNLA တၢင်းဝၢၼ်ႈပၢင်မၢၵ်ႇ ။ ဝၢႆးသွင် ၾၢႆႇပဵၼ်ပၢင်တိုၵ်းၵၼ် ႁၢဝ်ႈႁႅင်း ႁိုင်ၶၢဝ်းတၢင်းလိူၼ်ပၢႆယဝ်ႉ မိူဝ်ႈ ဝၼ်းတီႈ 17/ 2 / 2026 ပျီႇတူႉၸိတ်ႉ PNO ယိုတ်းၵုမ်းလႆႈၶိုၼ်း ဝၢၼ်ႈပၢင်မၢၵ်ႇၼႆ PNO ပိုၼ်ၽၢဝ်ႇဝႆႉ ၼင်ႇၼႆ ။

ၽွင်းပၢင်တိုၵ်းၼၼ်ႉ ႁဵတ်းႁႂ်ႈႁိူၼ်းၵူၼ်းဢိူင်ၵိူၼ်တူလူင် 20 လင်ပၢႆ ထုၵ်ႇၾႆးမႆႈလူႉၵွႆသေ ၊ ၵူၼ်းပိုၼ်ႉတီႈ ၼိုင်ႈႁဵင်ပၢႆ လႆႈငိူင်ႉပၢႆႈၽေးသိုၵ်း ထိုင်ဝၼ်းမိူဝ်ႈၼႆႉ ဝႃႈၼႆ ။