မိူဝ်ႈဝၼ်းတီႈ 28/5/2026 ယၢမ်းတၢမ်းၶမ်ႈ ပလိၵ်ႈ တင်း သိုၵ်းမၢၼ်ႈ ႁူမ်ႈၵၼ်ၵႂႃႇတီႉၺွပ်းဢဝ် ၵူၼ်းမိူင်းၼွၵ်ႈ လႄႈ ၵူၼ်းၼႂ်းမိူင်းမၢၼ်ႈ ၸိူဝ်းႁဵတ်းၵၢၼ်ၵျႃႊၽျႅၼ်ႉယူႇ ၼႂ်းပွၵ်ႉ ၸွၼ်ၸေႃႇ ဝဵင်းမူႇၸေႊ တႃႇ 28 ၵေႃႉ ၼႆယဝ်ႉ။

ၽွင်းၸဝ်ႈၼႃႈတီႈပလိၵ်ႈၶဝ် ၵႂႃႇတီႉၺွပ်းၼၼ်ႉ ယိုတ်းဢဝ်လႆႈပႃး ၶိူင်ႈၸႂ်ႉတိုဝ်း ၼႂ်းၵၢၼ်လွၵ်ႇလႅၼ်ၵိၼ် ငိုၼ်းတင်းဢွၼ်ႊလၢႆး (ၵျႃႊၽျႅၼ်ႉ) ၾူၼ်းၵူႈသႅၼ်းသႅၼ်း 96 လုၵ်ႈ၊ ၶွမ်ႊ (All In One Computer) 35 လုၵ်ႈ၊ Laptop 1 လုၵ်ႈ ၊ Power Station ဢၼ်လဵၵ်ႉ ၼိုင်ႈလုၵ်ႈ ဢၼ်ယႂ်ႇ 1 လုၵ်ႈ ၊ ၶိူင်ႈဝၢႆႇၽၢႆႇ 3 လုၵ်ႈ ၊ ရူတ်ႉၶိူင်ႈမၢၵ်ႇထၢၼ်ႇ ပႅတ်ႊတရီႊ 5 လမ်း ၼႆယဝ်ႉ။

ၵူၼ်းၸိူဝ်းၺႃးတီႉၺွပ်းၼၼ်ႉ ပဵၼ်ၵူၼ်းၸၢဝ်းၶိူဝ်းၶႄႇ ၵူၼ်းၸၢႆး 4 ၵေႃႉ၊ ၼၢင်းယိင်း 1 ၵေႃႉ၊ ၵူၼ်းယိပ်းမၢႆၾၢင် မိူင်းမၢၼ်ႈ ၼၢင်းယိင်း 20 ၵေႃႉ၊ ၵူၼ်းၸၢႆး 3 ၵေႃႉ ႁူမ်ႈသဵၼ်ႈ တၢင်းယိင်း 21 ၵေႃႉ လႄႈ ၵူၼ်းၸၢႆး 7 ၵေႃႉ ၼႆယဝ်ႉ။

ဝၢႆးလင် ပၢင်တိုၵ်းၽႅၼ်ၵၢၼ်ယၼ်ႇသိုၵ်း 1027 ယဝ်ႉသေ လူင်ပွင်ၸိုင်ႈမိူင်းၶႄႇ ယူႇၵၢင်ၸွႆႈထႅမ်ႁဵတ်းၶဵဝ် ၸွႆႈဢုပ်ႇဢူဝ်းပၼ် ႁႂ်ႈသိုၵ်းမၢၼ်ႈလႆႈၶဝ်ႈၵုမ်းၵမ်ၶိုၼ်း ၼႂ်းဝဵင်းလႃႈသဵဝ်ႈ၊ ၼွင်ၶဵဝ်၊ သီႇပေႃႉ၊ ၵျွၵ်ႉမႄးသေ ၸတ်းပၢင်လိူၵ်ႈတင်ႈ ႁႂ်ႈပေႃးယဝ်ႉတူဝ်ႈလီငၢမ်းယဝ်ႉ သိုၵ်းမၢၼ်ႈယိုတ်းမိူင်း လႄႈ ၸုမ်းပလိၵ်ႈ ဢၼ်ယူႇတႂ်ႈ ဢႃႇၼႃႇ လူင်ပွင်ၸိုင်ႈ ဢၼ်မိၼ်းဢွင်ႇလၢႆယိုတ်းမိူင်းၼၼ်ႉၵေႃႈ ၽႅၼ်ၸွမ်းတီႉၺွပ်းဢဝ် ၵျႃႊၽျႅၼ်ႉ သူင်ႇပၼ်ၼႂ်းမိုဝ်းလူင်ပွင်ၸိုင်ႈမိူင်းၶႄႇ ပိူဝ်ႈတႃႇဢဝ်ၼႃႈဢဝ်တႃမႃး ဢမ်ႇထၢတ်ႇ ႁၢၼ်ႉတေႃႇထိုင်ယၢမ်းလဵဝ် ၼႆယဝ်ႉ။