ၵူၼ်းပၢႆႈၽေးသိုၵ်း ၸိူဝ်းပၢႆႈမႃးသွၼ်ႈယူးသဝ်းဝႆႉၼႂ်းပွၵ်ႉၼႂ်းယွမ်ႇ လႄႈဝၢၼ်ႈဢိူင်ႇ ၸွမ်းၶႅပ်ႇဝဵင်းတူၼ်ႈတီး ၺႃးၵၢင်ႉၵႄႇသင်ႇႁႂ်ႈတၢင်ႇသဵၼ်ႈမၢႆၶႅၵ်ႇ ၼိုင်ႈဝူင်ႈၼိုင်ႈပွၵ်ႈ ၊ ၽႂ်ဢမ်ႇတၢင်ႇ တေၸႅင်ႈၸူးပလိၵ်ႈ ႁႂ်ႈမႃးတီႉၺွပ်းဝႃႈၼႆ ။
ဢိင်ၼိူဝ်ပၢင်တိုၵ်းၽႅၼ်ယၼ်ႇသိုၵ်း 1111 ၼႂ်းမိူင်းယၢင်းလႅင်သေ ၵူၼ်းမိူင်းၼႂ်းၸႄႈဝဵင်းလွႆၶေႃ ၊ ၾၢႆၶုၼ် ပၢႆႈမႃးယူႇတီႈၶႅပ်ႇဝဵင်းတူၼ်ႈတီး မီးၸမ် 2 ပီယဝ်ႉ။
ၵၢင်ႉၵႄႇဝဵင်းတူၼ်ႈတီးဝႃႈ ၵူၼ်းပၢႆႈၽေးသိုၵ်း ပေႃးဢမ်ႇတၢင်ႇသဵၼ်ႈမၢႆၶႅၵ်ႇ ပလိၵ်ႈတေတီႉ
ၼၢင်းယိင်းၵူၼ်းမိူင်းဝဵင်းလွႆၶေႃ ပၢႆႈၽေးသိုၵ်းယူႇတီႈဝဵင်းတူၼ်ႈတီးလၢတ်ႈၽူႈတွႆႇႁွၵ်ႈဝႃႈ -“ ႁဝ်းၶႃႈ လႆႈပၢႆႈမႃးယူႇႁိုင်ၼႃႇယဝ်ႉ ထိုင်ဝၼ်းမိူဝ်ႈၼႆႉ လႆႈၵႂႃႇတၢင်ႇသဵၼ်ႈမၢႆၶႅၵ်ႇ ၼိုင်ႈဝူင်ႈၼိုင်ႈပွၵ်ႈယူႇ ၊ ပေႃးဢမ်ႇၵႂႃႇတၢင်ႇၵေႃႈဢမ်ႇလႆႈ ၵၢင်ႉၵႄႇလွၵ်ႇငိုတ်ႈလၢတ်ႈဝႃႈ တေၸႂ်ႉပလိၵ်ႈသိုၵ်းမၢၼ်ႈမႃးတီႉၼႆ”- ဝႃႈၼႆ ။
ယူႇတီႈၵူၼ်းပၢႆႈၽေးသိုၵ်းၸိူဝ်းၶၢတ်ႈႁွင်ႈၶၢတ်ႈႁိူၼ်းယူႇၼၼ်ႉလႆႈတၢင်ႇသဵၼ်ႈမၢႆၶႅၵ်ႇ ၼိုင်ႈဝူင်ႈၼိုင်ႈပွၵ်ႈ ၼိုင်ႈၵေႃႉၼႆႉ 3000 ပျႃး ၵူႈဝူင်ႈ ။ လိူဝ်ၼၼ်ႉ ၵၢင်ႉၵႄႇ ၵဵပ်းငိုၼ်းတႃႇၵမ်ႉထႅမ်ၵူၼ်းၵႂႃႇႁၢပ်ႇၵၢၼ်သိုၵ်း ။ ၵူၼ်းပၢႆႈၽေးသိုၵ်းၼႂ်းဝဵင်းတူၼ်ႈတီးလႆႈသႂ်ႇငိုၼ်းပၼ် ၼိုင်ႈလိူၼ်ၼိုင်ႈပွၵ်ႈ ၼိုင်ႈပွၵ်ႈၼႆႉ 3 မိုၼ်ႇပျႃးထိုင် 1 သႅၼ်ပျႃးဝႃႈၼႆ ။
မၼ်းၼၢင်းသိုပ်ႇလၢတ်ႈထႅင်ႈဝႃႈ -“ ႁဝ်းၶႃႈၼႆႉႁိူၼ်းမီးတီႈလွႆၶေႃဝႆႉလႄႈ တီႈလွႆၶေႃၵေႃႈ လႆႈပၼ်ၵႃႈႁၢပ်ႇၵၢၼ်သိုၵ်း 3 မိုၼ်ႇပျႃး ၊ တီႈၼႆႈ(တူၼ်ႈတီး)ၵေႃႈလႆႈပၼ်ထႅင်ႈ 3 မိုၼ်ႇပျႃး ၊ မႃးၵဵပ်းထိုင်ႁွတ်ႈထိုင်ႁွင်ႈၵူႈလိူၼ် ၵူၼ်းႁႃၵိၼ်ဝၼ်းလႂ်ဝၼ်းၼၼ်ႉ မိူၼ်ႁဝ်းၶႃႈတႄႉ ယၢပ်ႇၵိၼ်းဢေႃႈ ”- ဝႃႈၼႆ ။
ယၢမ်းလဵဝ် ပလိၵ်ႈမၢၼ်ႈသိုၵ်းမၢၼ်ႈႁူမ်ႈၵၢင်ႉၵႄႇ ၵူတ်ႇထတ်း သဵၼ်ႈမၢႆၶႅၵ်ႇ ၼႂ်းပွၵ်ႉၼႂ်းယွမ်ႇ ႁၢဝ်ႈႁႅင်း။ တႄႇႁူဝ်လိူၼ်ၾႅပ်ႉပိဝ်ႊရီႊမႃး သိုၵ်းမၢၼ်ႈၵူတ်ႇထတ်း ၵူၼ်းၼုမ်ႇၽွင်းၵၢင်ၶမ်ႈၵၢင်ၶိုၼ်းသေ တီႉၺွပ်း သူင်ႇၵႂႃႇၾိုၵ်းၵၢၼ်သိုၵ်းလႄႈ ႁဵတ်းႁႂ်ႈၵူၼ်းပၢႆႈၽေးသိုၵ်း ပိုတ်ႇႁၢၼ်ႉၶၢႆတၢင်းၵိၼ်ၸွမ်းၵၢတ်ႇၵၢင်ၶမ်ႈၸိူဝ်းၼၼ်ႉၵေႃႈ လႆႈဢိုတ်းႁၢၼ်ႉပွၵ်ႈႁိူၼ်းၸဝ်ႉၸဝ်ႉ ယွၼ်ႉဢမ်ႇမီးလွင်ႈႁူမ်ႇလူမ်ႈ- ၵူၼ်းပၢႆႈၽေးသိုၵ်းလၢတ်ႈ ။
လိူဝ်ၼၼ်ႉ တႄႇႁူဝ်လိူၼ် မတ်ႉၶျ် ၼႆႉမႃး ယွၼ်ႉၼမ်ႉမၼ်းၸိူဝ်ႉၾႆး ႁႃသိုဝ်ႉယၢပ်ႇ ၵႃႈၶၼ်ပုင်ႈၶိုၼ်ႈသုင်ႁႅင်း မိူၼ်ၼင်ႇ ၶၼ်ၵုၼ်ႇၼႂ်းတီႈဝဵင်းတူၼ်ႈတီးပုင်ႈၶိုၼ်ႈၸွမ်း လႄႈ ႁဵတ်းႁႂ်ႈၵူၼ်းပၢႆႈၽေးသိုၵ်း ယၢပ်ႇၽိုတ်ႇတႃႇႁႃၵိၼ်လဵင်ႉတွင်ႉ – ဝႃႈၼႆ ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ