ၵူၼ်းပၢႆႈၽေးသိုၵ်း ၼႂ်းဢိူင်ႇၵိူၼ်ႇတူလူင် ၸႄႈဝဵင်းမွၵ်ႇမႆႇ ဢၼ်လႆႈၵႂႃႇယူႇသဝ်းၼႂ်းထိူၼ်ႇၼႂ်းသူၼ်ၼၼ်ႉ ဝၢႆးလင်ပွၵ်ႈႁိူၼ်းၶိုၼ်းၵေႃႈ ဢွၼ်ၵၼ်ပဵၼ်ဝတ်းပဵၼ်ဢၢၼ် ဢမ်ႇယူႇလီႁႅင်း ၶႂ်ႈဝႃႈတင်းဝၢၼ်ႈ ။

ပဵၼ်ၵူၼ်းဝၢၼ်ႈ ၼမ်ႉပႃတႅပ်း ၼႂ်းဢိူင်ႇၼႃးႁီး ၵိူၼ်ႇတူလူင် ၸႄႈဝဵင်းမွၵ်ႇမႆႇ ပၢႆႈၽေးပၢင်တိုၵ်းၼႂ်းၵႄႈ PNLO/PNLA လႄႈ RCSS/SSA ပိုတ်းယိုဝ်းၶဵင်ႈၶႅင်တေႃႇၵၼ်တင်ႈတႄႇႁူဝ်လိူၼ်ဢေႊပရိူဝ်ႊၼႆႉမႃး။ ၸိူဝ်းၶဝ်ပဵၼ်ၼိူဝ်ႉလိူတ်ႇၼိူဝ်ႉမႆႈ ပဵၼ်ဝတ်းပဵၼ်ဢႆ လူဝ်ႇတၢင်းၸွႆႈထႅမ်လွင်ႈယူတ်းယႃ။

ၽူႈၸၢႆးၵူၼ်းပိုၼ်ႉတီႈၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ-“ ၸိူဝ်းၶဝ်ဢမ်ႇတၼ်းလႆႈၶူဝ်းၶွင်သင်သေ ပၢႆႈၵႂႃႇယူႇၼႂ်းသူၼ်ၼႂ်းႁိူၵ်ႈၼႂ်းထိူၼ်ႇ လၢႆလၢႆဝၼ်းၵေႃႈ ၺႃးမူင်ႈမႅင်းၶူပ်းယုင်းၶူပ်း ၊ ႁႅင်းၵမ်ႉတူဝ်တူၵ်းလႄႈ ဢွၼ်ၵၼ်ဢမ်ႇယူႇလီ၊ ပဵၼ်ဝတ်းပဵၼ်ဢၢၼ်။ ႁွင်ႈယႃႁူင်းယႃၵေႃႈဢမ်ႇပေႃး။ ” ဝႃႈၼႆ။

ၸိူဝ်းပဵၼ်လုၵ်ႈဢွၼ်ႇလဵၵ်ႉတႄႉ ၸုမ်းပၢႆးယူႇလီပဢူဝ်း (PHWC) ယူတ်းယႃပၼ် ။ ပဵၼ်ၵူၼ်းဝၢၼ်ႈ ၼမ်ႉပႃတႅပ်း 30 လင်ၶႃးႁိူၼ်း။ ႁူဝ်ၵူၼ်းမီး 150 ပၢႆ။ ၶႂ်ႈဝႃႈ လၢမ်းၽႄႈတိတ်းၸပ်းၵၼ် တင်းဝၢၼ်ႈ။

“ဢွၼ်ၵၼ်ပဵၼ်တင်းဝၢၼ်ႈလႄႈႁွင်ႈယႃ သမ်ႉပေႃးဢမ်ႇပေႃး။ တႃႇၵႂႃႇယႃတူဝ်တီႈဝဵင်းၵေႃႈဢမ်ႇပဵၼ်လႆႈငိုၼ်းတွင်း။လွင်ႈၶဵင်ႈၶႅင်ၵၢၼ်သိုၵ်းၵေႃႈတိုၵ်ႉမီးယူႇလႄႈ ဢမ်ႇႁတ်းၵႂႃႇၵႆ” -ၵူၼ်းပိုၼ်ႉတီႈလၢတ်ႈထႅင်ႈၼင်ႇၼႆ။

ယၢမ်းလဵဝ် ၶွင်ႇသီႇဢဝ်ၶိုၼ်းၸိုင်ႈတႆး RCSS/SSA လႄႈ ၸုမ်းၸိူဝ်ႉၸၢတ်ႈပဢူဝ်း PNLO/PNLA ဢမ်ႇပိုတ်းယိုဝ်းၵၼ်ယဝ်ႉသေတႃႉ တိုၵ်ႉထႅမ်ႁႅင်းသိုၵ်းတေႃႇၵၼ်ၶဵင်ႈၶႅင်ၵၢၼ်သိုၵ်းတေႃႉၵၼ်ယူႇ – ဝႃႈၼႆ။

ယွၼ်ႉပၢင်တိုၵ်းသိုၵ်းသိူဝ်ၼႆႉသေ ပူၼ်ႉမႃးဝၼ်းတီႈ 18 ဢေႊပရိူဝ်ႊ ၼၢင်းယိင်း 3 ၵေႃႉ ၵူၼ်းဝၢၼ်ႈၼမ်ႉပႃတႅပ်း ၵႂႃႇႁႃၽၵ်း ၵႂႃႇယဵပ်ႇၺႃးမၢၵ်ႇမႅင်းၾင်လိၼ် မၢတ်ႇၸဵပ်းလႆႈသူင်ႇယူတ်းယႃတူဝ်။ ၼႂ်းၼၼ်ႉပႃးလုၵ်ႈဢွၼ်ႇယိင်း ဢႃယု 8 ၶူပ်ႇၵေႃႉၼိုင်ႈ။

သိုၵ်း 2 ၸုမ်းၼႆႉပဵၼ်ၸုမ်းလူင်းလၢႆးမိုဝ်းၵိုတ်းတိုၵ်းပတ်းပိုၼ်ႉတူဝ်ႈမိူင်းဝႆႉ။ ၸုမ်းယိပ်းၵွင်ႈၵၢင်ႇၸၢဝ်းၶိူဝ်း တင်း 2 ၸုမ်းၼႆႉ ယိုဝ်းၵၼ်ၶိုၼ်းယူႇသေတႃႉ တႃႇလွင်ႈငမ်းယဵၼ်ၸိုင်ႈမိူင်းတႄႉ တိုၵ်ႉသိုပ်ႇၵႂႃႇဢုပ်ႇဢူဝ်းတင်းၸုမ်းသိုၵ်းမၢၼ်ႈယူႇ တင်း 2 ၸုမ်း။