ၸဝ်ႈသၢင်ႇၵူၼ်းပၢႆႈၽေးသိုၵ်းပႃးၼိုင်ႈ တီႈၸႄႈဝဵင်းၵျွၵ်ႉမႄး ၸူမ်ၼမ်ႉ ၶၢဝ်းတၢင်း 5 ၸူဝ်ႈမူင်း ၸင်ႇႁၼ်ၶၢပ်ႈတူဝ်တၢႆ။
မိူဝ်ႈဝႃး ဝၼ်းတီႈ 10/4/2023 ယၢမ်းဝၢႆးဝၼ်း 2 မူင်းၼၼ်ႉ ၸဝ်ႈသၢင်ႇၵူၼ်းပၢႆႈၽေးသိုၵ်းပႃးၼိုင်ႈ ၸူမ်ၼမ်ႉလူႉလွၼ်ႇ တီႈၼမ်ႉတူၵ်း ႁိမ်းဝၢၼ်ႈၶူဝ်တႅၼ်ႈ ၸႄႈဝဵင်းၵျွၵ်ႉမႄး။
ၽူႈၶဝ်ႈၸုမ်းၸွႆႈၶႅၵ်ႇလီပၢင်ၸႃႉၼမ်ႉၶူင်း ဝဵင်းၵျွၵ်ႉမႄး ၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ ၸႂ်ႈယဝ်ႉ ၸူမ်ၵႂႃႇၸဵမ်မိူဝ်ႈ 2 မူင်းၵၢင်ဝၼ်း 7 မူင်းၸမ်ၸမ်ၸင်ႇႁၼ်ၶိုၼ်းဢေႃႈ။ ၵႂႃႇဢၢပ်ႇၼၼ်ႉၼႆဢေႃႈၼၼ်ႉ။ ၸဵမ်မိူဝ်ႈဝႅၼ်တူၵ်းလူင်းၵႂႃႇယဝ်ႉ တိုၼ်းဝႃႈ ဢမ်ႇၽူးၶိုၼ်ႈမႃးၶိုၼ်းယဝ်ႉ။ၵူႈပွၵ်ႈၵေႃႈ ယၢမ်ႈၵႂႃႇဢၢပ်ႇယူႇတီႈၼၼ်ႉ ၵူၺ်းၵႃႈ ဢၼ်ၼႆႉသမ်ႉ တေဢမ်ႇသၢင်ႇထုၵ်ႇၸိူင်ႉႁိုဝ်တေႉဢမ်ႇႁူႉ ၸင်ႇၸူမ်ၼမ်ႉႁဵတ်းၼႆ။ၵူၼ်းဝၢၼ်ႈၵူၼ်းသူၼ်ၶဝ်ၵေႃႈ ၵမ်ႈၼမ်ၵႂႃႇဢၢပ်ႇတီႈၼၼ်ယူႇ။ၼမ်ႉဢၼ်ၼႆႉ မၼ်းတေပဵၼ်ၼမ်ႉတူၵ်းႁၢင်ႈလီဝႆႉဢေႃႈ။ပေႃးၶၢဝ်းၾူၼ်သမ်ႉ ၼမ်ႉၼမ်ႁေ ပဵၼ်တိုင်းဝႆႉ ။ တီႈလိုၵ်ႉလိုၵ်ႉမၼ်းတေမီး 2 တီႈ ။ တႂ်ႈၼမ်ႉတူၵ်းတၢတ်ႇသမ်ႉတေမီး ႁူးလူင်ဝႆႉ မိူၼ်ထမ်ႈၼၼ်ႉဢေႃႈ ။ ပေႃးလႆၶဝ်ႈၵႂႃႇၶမ်ၼႂ်းၼၼ်ႉတႄႉ ဢမ်ႇၸၢင်ႈဢဝ်ၶိုၼ်းလႆႈယဝ်ႉ” – ဝႃႈၼႆ။
ၸဝ်ႈသၢင်ႇဢၼ်ၸူမ်ၼမ်ႉလူႉလွၼ်ႇၵႂႃႇၼႆႉ ဢႃယု 17 ပီ ပဵၼ်ၵူၼ်းဝၢၼ်ႈပၢင်ၸၢမ် ဢိူင်ႇတေႃႉသၢင်ႇ ယွၼ်ႉငဝ်းလၢႆးပၢင်တိုၵ်းသေ ၶၢႆႉမႃးယူႇဝႆႉတီႈ ဝတ်ႉဝၢၼ်ႈၶူဝ်တႅၼ်ႈၸဵမ်မိူဝ်ႈပီ 2021။
မိူဝ်ႈဝၼ်းတီႈ 24/3/2023 ၼၼ်ႉၵေႃႈ ႁႅင်းၵၢၼ်ၼုမ်ႇၸၢႆးၵေႃႉၼိုင်ႈ ၸူမ်ၼမ်ႉလူႉတၢႆ တီႈၵႄးၼမ်ႉမၢဝ်း ႁိမ်းဝၢၼ်ႈႁူဝ်သွင် ၸႄႈဝဵင်းမူႇၸေႊ လႅၼ်လိၼ် တႆး-ၶႄႇ။
ထိုင်ၶၢဝ်းမႆႈၶၢဝ်းႁွင်ႈ ၾိင်ႈၾႃႉရႃႇသီႇၵေႃႈ ႁွၼ်ႉမႆႈလႄႈ ၵူၼ်းမိူင်းၵမ်ႈၼမ် ဢွၼ်လႄႇလဵၼ်ႈလုၺ်းၼမ်ႉလိုဝ်ႈႁိူဝ်ႉလိုဝ်ႈၸႂ်။ ဢမ်ႇသၢင်ႇထုၵ်ႇ ၸၢင်ႈမီးလွင်ႈ ၸူမ်ၼမ်ႉသေ လူႉသုမ်းသၢႆၸႂ်။လွင်ႈၼႆႉ ၸဵမ်လုၵ်ႈဢွၼ်ႇၵူၼ်းလူင် လူဝ်ႇလႆႈၾၢင်ႉယႂ်ႇၼမ် မိူဝ်ႈယၢမ်းလူင်းလုၺ်းၼမ်ႉ ၼႆၸုမ်းၸွႆႈတူင်ႇဝူင်းၵူၼ်းပၼ်ၾၢင်ႉဝႆႉ။
