ပၢင်တိုၵ်း RCSS တင်း  PNLO တီႈမွၵ်ႇမႆႇ မီးလွင်ႈမၢတ်ႇၸဵပ်းလူႉတၢႆၼမ်

ပၢင်တိုၵ်း RCSS တင်း  PNLO  တီႈၸႄႈဝဵင်းမွၵ်ႇမႆႇ တင်းသွင်ၾၢႆႇ မီးလွင်ႈမၢတ်ႇၸဵပ်းလူႉတၢႆၼမ်။

မိူဝ်ႈဝၼ်းတီႈ 3/4/2023 ၶၢဝ်းယၢမ်း ၵၢင်ၼႂ် 11 မူင်းပၢႆ တေႃႇထိုင် 1 မူင်း ၼၼ်ႉ ၸုမ်းသိုၵ်း RCSS  တင်း  PNLO ပဵၼ်ပၢင်တိုၵ်းၵၼ် တီႈဢိူင်ႇၵၼ်ႇတူးလူင် (ၵိူၼ်ႇတူလူင်) ႁိမ်းဝၢၼ်ႈၼမ်ႉပႃတႅပ်း ၸႄႈဝဵင်းမွၵ်ႇမႆႇသေ တင်းသွင်ၾၢႆႇ မီးလွင်ႈမၢတ်ႇၸဵပ်းလူႉတၢႆၼမ်ၼႆယဝ်ႉ ။

ၸဝ်ႈႁၢၼ်ၶမ်းၸၢမ်ႇ ၽူႈၶၢၼ်ပၢၵ်ႇ RCSS လၢတ်ႈတီႈၽူႈတွႆႇႁွၵ်ႈဝႃႈ – “ မိူဝ်ႈသၢႆသိုၵ်းႁဝ်းၵမ်ႈၽွင်ႈ ၵိုတ်းလိုဝ်ႈႁိမ်း ဝၢၼ်ႈၼမ်ႉပႃတႅပ်းၼၼ်ႉ သိုၵ်း PNLO ၶဝ်သမ်ႉမႃးပိုတ်းယိုဝ်းႁေ ၶိုၼ်းထွႆၵႂႃႇၶိုၼ်း။ မိူဝ်ႈၶဝ်ထွႆၶိုၼ်းၼၼ်ႉ ႁဝ်းသိမ်းလႆႈ ၶူဝ်းၶဝ်ၵမ်ႈၽွင်ႈဢေႃႈ။တူၺ်းတႄႉ လႅပ်ႈၵူၼ်းၶဝ် မၢတ်ႇတိူဝ်ႉလႄႈ ဢဝ်ၵၼ်ထွႆဢွၵ်ႇ ၸိူင်ႉၼၼ်ၼေႈ”- ဝႃႈၼႆ။

ပၢင်တိုၵ်းၵမ်းၼႆႉ မီးၶၢဝ်ႇလိုဝ်းဢွၵ်ႇမႃးဝႃႈ တင်းသွင်ၾၢႆႇ မီးလွင်ႈတုမ်ႉတိူဝ်ႉမၢတ်ႇၸဵပ်းလူႉတၢႆၼမ်ဝႃႈၼႆသေတႃႉ  လွင်ႈၼႆႉ ပႆႇမီးၸုမ်းၾၢႆႇလႂ်ယိုၼ်ယၼ်။

 ၸဝ်ႈႁၢၼ်ၶမ်းၸၢမ်ႇလၢတ်ႈတီႈၽူႈတွႆႇႁွၵ်ႈဝႃႈ- “ ၾၢႆႇRCSS ႁဝ်းတႄႉ ဢမ်ႇမီးလွင်ႈမၢတ်ႇၸဵပ်းလူႉတၢႆသင်ၶႃႈ။ ၵူၺ်းၼႃႇ ဢၼ်ၶႃႈၸၢင်ႈလၢတ်ႈၼႄတႄႉ ၾၢႆႇ PNLO တႄႉ မီးလွင်ႈမၢတ်ႇၸဵပ်းလူႉသုမ်းဢေႃႈ” – ဝႃႈၼႆ။

ၵဵဝ်ႇၵပ်းပၢင်တိုၵ်းတီႈၸႄႈဝဵင်းမွၵ်ႇမႆႇၼႆႉသေ သိုဝ်ႇၶၢဝ်ႇ The people’s Voice ဢွၵ်ႇဝႆႉဝႃႈ ၾၢႆႇ RCSS/SSA လူႉတၢႆ 8 ၵေႃႉ၊ ၾၢႆႇ PNLO/PNLA မၢတ်ႇၸဵပ်း 3 ၵေႃႉၼႆယဝ်ႉ။

တပ်ႉၸုမ်း RCSS တင်း PNLO ၼႆႉ ပဵၼ်ၸုမ်းဢၼ် လူင်းလၢႆးမိုဝ်းၵိုတ်းတိုၵ်းပတ်းပိုၼ်ႉတူဝ်ႈမိူင်း NCA ဝႆႉၼင်ႇၵၼ်သေဢမ်ႇၵႃး ပဵၼ်လုၵ်ႈၸုမ်း  PPST  ဝႆႉပႃးထႅင်ႈသေတႃႉ တင်းသွင်ၸုမ်း တိုၵ်ႉမီးလွင်ႈပိုတ်းယိုတ်းၵၼ်မႃးၶိူဝ်းယႂ်း။

မိူဝ်ႈပီ 2022 ပူၼ်ႉမႃးၼၼ်ႉၵေႃႈ   RCSS တင်း PNLO ယိုဝ်းၵၼ်ႁႅင်းတီႈဢိူင်ႇၵိူၼ်ႇတူလူင် ၼႆႉၼင်ႇၵဝ်ႇ။