တပ်ႉသိုၵ်းရၶႅင်ႇ “ ငဝ်ႈငုၼ်းၽွမ်ႉႁူမ်ႈၸိူဝ်ႉၸၢတ်ႈရၶႅင်ႇ/တပ်ႉသိုၵ်းရၶႅင်ႇ” တႄႇတင်ႈလုၵ်ႉၽိုၼ်ႉမႃး ၶၢဝ်းတၢင်း 14 ပီၼႆႉ ၵူၼ်းမိူင်းရၶႅင်ႇ မီးလွင်ႈထၢင်ႇႁၢင်ႈလွတ်ႈလႅဝ်းမႃးၼႆယဝ်ႉ။
မိူဝ်ႈဝၼ်းတီႈ 4/4/2023 ယၢမ်းၶမ်ႈ 7 မူင်းၼၼ်ႉ ၵႅမ်ၽူႈၵွၼ်းသိုၵ်း တွၵ်ႊတိူဝ်ႊၺူဝ်ႇထုၼ်းဢွင်ႇ မွၵ်ႇလၢတ်ႈၵႂႃႇတီႈ လၢႆးၵၢၼ် ၼႃႈလိၼ်လွတ်ႈလႅဝ်း( လွတ်မြောက်နယ်မြေ ) ၼိူဝ်ဢွၼ်ႊလၢႆႊၼၼ်ႉဝႃႈ- “ ၶၢဝ်းတၢင်း 14 ပီ ၼႆႉ တေလႆႈဝႃႈ ပွတ်းမိူင်းရၶႅင်ႇႁဝ်းၼႆႉ ၵူၼ်းမိူင်းမီးလွင်ႈလွတ်ႈလႅဝ်းလႄႈ မီးလွင်ႈထၢင်ႇႁၢင်ႈမႃးၼႆၵေႃႈဝႃႈလႆႈယဝ်ႉ။ တေလႆႈဝႃႈ ၵူၼ်းမိူင်းလႆႈႁူႉ ၽွၼ်းလီဝၢၼ်ႈမိူင်းလွတ်ႈလႅဝ်းမႃးၽွင်ႈယဝ်ႉ” ဝႃႈၼႆ။
ဝၼ်းတီႈ 10/4/2023 တေထိုင်ၼႆႉ ပဵၼ်ဝၼ်းတင်ႈတပ်ႉသိုၵ်းရၶႅင်ႇ AA တဵမ် 14 ပီ။ ၼႃႈလိၼ်ၼႂ်းၸႄႈမိူင်းရၶႅင်ႇ ဢၼ်ပႆႇလွတ်ႈလႅဝ်းၵေႃႈ မီးဝႆႉတင်းၼမ် ၼင်ႇႁိုဝ်တေလႆႈပဵၼ် ၼႃႈလိၼ်လွတ်ႈလႅဝ်းမႃးလႆႈထႅင်ႈၼၼ်ႉ တေသိုပ်ႇႁဵတ်းသၢင်ႈၵႂႃႇၼႆယဝ်ႉ။
ၵႅမ်ၽူႈၵွၼ်းသိုၵ်း တွၵ်ႊတိူဝ်ႊၺူဝ်ႇထုၼ်းဢွင်ႇသိုပ်ႇလၢတ်ႈထႅင်ဝႃႈ “ ၼႃႈလိၼ်မၢင်တီႈ မၼ်းပႆႇလွတ်ႈလႅဝ်း ၼင်ႇႁိုဝ်တေလႆႈလွင်ႈလွတ်ႈလႅဝ်းၼၼ်ႉၵေႃႈ ႁဝ်းၶႃႈတေ ၶတ်းၸႂ်ပႆၸွမ်းသဵၼ်ႈတၢင်း ရႅၵ်ႉၶိတၵႂႃႇထႅင်ႈယူႇ၊ ၼႃႈလိၼ်လွတ်ႈလႅဝ်းဢၼ်ႁဝ်းဝႃႈၼႆႉၵေႃႈမၼ်းဢမ်ႇၸႂ်ႈ ၸွမ်းလႅၼ်လိၼ်ၸိူဝ်းၼၼ်ႉ ပဵၼ်ဢွင်ႈတီႈဢၼ် ၵူၼ်းၶိူဝ်းႁဝ်းယူႇသဝ်းဝႆႉ တေႉတေႉၼၼ်ႉၼေႈ ” – ဝႃႈၼႆ။
တပ်ႉသိုၵ်းရၶႅင်ႇၼႆႉ တႄႇတင်ႇမႃးမိူဝ်ႈဝၼ်းတီႈ 10 လိူၼ်ဢေႊပရိူဝ်း ပီ 2009 ၽူႈပူၵ်းပွင်ပၼ် တႃႇတေပဵၼ်မႃး တပ်ႉသိုၵ်းရၶႅင်ႇ Arakan Army (A.A) ပဵၼ် တပ်ႉသိုၵ်းလွတ်ႈလႅဝ်းၶၢင် KIA လႄႈ ငဝ်ႈငုၼ်းၵေႃႈ ပၵ်းတီႈ ငဝ်ႈငုၼ်းလၢႆႊၸႃႊ ၶွင် KIA ၼင်ႇၵဝ်ႇ။မိူဝ်ႈတႄႇတင်ႈၼၼ်ႉ မီးၽူႈၶဝ်ႈၸုမ်း 26 ၵေႃႉလႄႈ ၵွင်ႈၼိုင်ႈလဝ်းၵူၺ်းၼႆ ၽူႈၵွၼ်းသိုၵ်းရၶႅင်ႇ ၸွမ်ႁၢၼ်ထုၼ်းမျၢတ်ႉၼၢႆႇ လၢတ်ႈဝႆႉၼင်ႇၼႆ။
ၵႅမ်ၽူႈၵွၼ်းသိုၵ်း တွၵ်ႊတိူဝ်ႊၺူဝ်ႇထုၼ်းဢွင်ႇသိုပ်ႇလၢတ်ႈထႅင်ႈဝႃႈ-“ ၽူႈဢွၼ်ႁူဝ်လုၵ်ႉၽိုၼ်ႉႁဝ်း ပၢၼ်သိုပ်ႇပၢၼ်ၶတ်းၸႂ်တႃႇလႆႈလွင်ႈလွတ်ႈလႅဝ်းဝႃႈၼႆသေတႃႉ ဢမ်ႇၶိုပ်ႈၼႃႈသင်မႃး ဢမ်ႇဢွင်ႇမၢၼ်သင် ၵူၺ်းၼႃႇမိူဝ်ႈလဵဝ် ပၢၼ်တပ်ႉသိုၵ်း ULA/AA လုၵ်ႉၽိုၼ်ႉမႃး ၶၢဝ်းတၢင်း 14 ပီၼႆႉတေႉ လႆႈဝႃႈ ၵုမ်းၵမ်လႆႈလီသေ မိူင်းလွတ်ႈလႅဝ်းမႃးယဝ်ႉ” – ဝႃႈၼႆ။
ယိူင်းဢၢၼ်း တပ်ႉသိုၵ်းရၶႅင်ႇ AA မီးဝႆႉဝႃႈ တပ်ႉသိုၵ်း ရၶႅင်ႇ AA တေၵႅတ်ႇၵင်ႈၵူၼ်းမိူင်းရၶႅင်ႇ ပိူဝ်ႈတႃႇ လႆႈလွင်ႈ ငမ်းယဵၼ်၊ လွင်ႈၽဵင်ႇပဵင်း၊ လွင်ႈလွတ်ႈလႅဝ်း လႄႈ ၽဝ ၵူၼ်းမိူင်း ၶိုၼ်ႈသင်ႉၶိုၼ်ႈသုင် –
(1) တႃႇၵူၼ်းမိူင်းရၶႅင်ႇ တေမီးသုၼ်ႇလႆႈၸတ်းသၢင်ႈႁင်းၶေႃ
(2) တႃႇပႅင်းမႅပ်ႇ ၾိင်ႈႁိတ်ႈႁွႆးၶူဝ်းပူၺ်ႈပူႇမွၼ်ႇၼၢႆးယႃႈ ၾၢင်ႁၢင်ႈၸိူဝ်ႉၸၢတ်ႈၶိူဝ်းၵူၼ်း လႄႈ
(3) တႃႇယုၵ်ႉယွင်ႈ ၵုင်ႇသရေၼႃႈတႃႇ လႄႈ ၽွၼ်းပၢင်ႈၸိူဝ်ႉၸၢတ်ႈၸၢဝ်းရၶႅင်ႇ သၢမ်ပိူင်ၼႆႉ။
