မိူဝ်ႈဝႃး ဝၼ်းတီႈ 10/12/2025 ယၢမ်းၵၢင်ၶမ်ႈ 9 မူင်းပၢႆ သိုၵ်းမၢၼ်ႈယိုတ်းမိူင်း ဢဝ်ႁိူဝ်းမိၼ်တိုၵ်း ၵႂႃႇပွႆႇမၢၵ်ႇလူင်သႂ်ႇ ႁူင်းယႃလူင် တီႈဝဵင်းမျွၵ်ႉဢူး မိူင်းရၶႅင်ႇ ၵူၼ်းမိူင်းလူႉတၢႆ 33 ၵေႃႉ မၢတ်ႇၸဵပ်း 76 ၵေႃႉ ။

တေႃႇထိုင်ၼႂ်ၼႆႉ 11/12/2025 သဵၼ်ႈမၢႆဢွၵ်ႇမႃးဝႃႈ ၵူၼ်းၸိူဝ်းလူႉတၢႆၼႆႉ ပဵၼ်ၼၢင်းယိင်း 17 ၵေႃႉ၊ ၵူၼ်းၸၢႆး 16 ၵေႃႉ။ ၵူၼ်းမၢတ်ႇၸဵပ်း 76 ၵေႃႉၼႆႉ ဢၼ်မၢတ်ႇၸဵပ်းႁၢဝ်ႈႁႅင်း (ထိုင်ၸၼ်ႉလႆႈမႆႈၸႂ်မီး) 27 ၵေႃႉလႄႈ ႁူဝ်ၼပ်ႉၵူၼ်းၸိူဝ်းလူႉတၢႆ ၸၢင်ႈၽိူမ်ႉၼမ်ၶိုၼ်ႈမႃးထႅင်ႈ ၼႆ ၵူၼ်းမိူင်းၼႂ်းပိုၼ်ႉတီႈ မိူင်းရၶႅင်ႇလၢတ်ႈ ၼင်ႇၼႆ။

“မၼ်းမႃးပွႆႇမၢၵ်ႇၵႂႃႇသွင်ၵမ်း။ ၵမ်းဢွၼ်တၢင်းသုတ်းၼႆႉ ႁဝ်းၶႃႈဢမ်ႇတၼ်းပၢႆႈပႅပ်ႉ ။ ပွႆႇယဝ်ႉႁႄ ႁဝ်းႁၼ်ၵႂၼ်းၾႆးၶိုၼ်ႈၵမ်းလဵဝ်။ ၵူဝ်မၼ်းမႃးပွႆႇထႅင်ႈၼႆႁႄ ႁဝ်းၼႅတ်ႈဢွၼ် ၵၼ် လႅၼ်ႈပၢႆႈမႅပ်းၼႂ်းလုၵ်းပႅပ်ႉ။ ယူႇၵမ်းၼိုင်ႈၵူၺ်း မႃးပွႆႇထႅင်ႈတေႉဢိူဝ်ႈ။”

ႁူင်းယႃလူင်ၵူၼ်းမိူင်းဢၼ်မီးတီႈဝဵင်းမျွၵ်ႉဢူးၼႆႉ ပဵၼ်ၸုမ်းသိုၵ်းရၶႅင်ႇ ၵုမ်းဝႆႉ။ ႁူင်းယႃၼၼ်ႉ ပဵၼ်ႁူင်းယႃလူင် ဢၼ်ၵူၼ်းမိူင်း ၼႂ်းၸႄႈမိူင်းရၶႅင်ႇ တႃႇ 14 ၸႄႈဝဵင်း ပိုင်ႈဢိင်သေ ၵႂႃႇယူတ်းယႃတူဝ်ဝႆႉ လႆႈႁူႉၼင်ႇၼႆ။

ဢူးၶၢႆႇသုၶ ၽူႈၶၢၼ်ပၢၵ်ႇ တပ်ႉသိုၵ်းရၶႅင်ႇ (AA) တွပ်ႇလၢတ်ႈတီႈ သိုဝ်ႇၶၢဝ်ႇဝႆႉဝႃႈ- “မိူဝ်ႈၶမ်ႈဝႃး သိုၵ်းမၢၼ်ႈ ပွႆႇႁိူဝ်းမိၼ်တိုၵ်းမႃး သွင်လမ်း။ တင်ႈၸႂ်မႃးယိုဝ်းသႂ်ႇ တီႈႁူင်းယႃလူင် ဢၼ်မီးၵူၼ်းမိူင်း တင်းၼမ် ယူတ်းယႃတူဝ်ဝႆႉလႄႈ ၵူၼ်းၸင်ႇလႆႈတၢႆၵႂႃႇ ၼမ်တၢၼ်ႇၼႆႉ။ သိုၵ်းမၢၼ်ႈႁဵတ်းၸိူင်ႉၼႆၼႆႉ ပဵၼ်ၵၢၼ်ပူၼ်ႉပႅၼ်ပၵ်းပိူင်သိုၵ်းလႄႈ ၾၢႆႇႁဝ်းၵေႃႈ တေၶိုၼ်းႁဵတ်းလွင်ႈတုမ်ႉတွပ်ႇၶိုၼ်း တေႉတေႉဝႃႈဝႃႈ မိူၼ်ၵၼ်” ဝႃႈၼႆ။

ၼႂ်းၵူၼ်းၸိူဝ်းလူႉတၢႆၵႂႃႇၼၼ်ႉ ပႃးလုၵ်ႈဢွၼ်ႇ၊ မႄႈလုၵ်ႈဢွၼ်ႇလႅင် လႄႈ ၼၢင်းယိင်းၼုမ်ႇၸၢဝ်းရူဝ်ႊႁိၼ်ႊၵျႃႊ ၸဵမ်ၸိူဝ်းၼႆႉ ဝႃႈၼႆ။

ၵွၼ်ႇၼႃႈၼႆႉဝၼ်းၼိုင်ႈ မိူဝ်ႈဝၼ်းတီႈ 9/12/2025 ၼၼ်ႉ ၸွမ်သိုၵ်း တၢၼ်းထၢႆႉ ယူႇၾၢႆႇလုမ်းႁဵတ်းၵၢၼ်ၵႅတ်ႇၶႄၸိုင်ႈမိူင်း (တပ်ႉပႆလိၼ်) သေ လႆႈႁူပ်ႉထူပ်းဢုပ်ႇၵုမ်ၵၼ်တင်း ၵႅမ်ၽူႈၵုမ်းတပ်ႉပႆလိၼ် မိူင်းရတ်ႉသျႃႊ Colonel General Aleksandr Anatolyevich Matovnikov တီႈႁူင်းႁႅမ်း Jasmine ၼေႇပျီႇတေႃႇ။ လႆႈႁူႉဝႃႈ ပဵၼ်ပၢင်ႇဢုပ်ႇဢူဝ်းလွင်ႈ မိူင်းရတ်ႉသျႃႊ တေၸွႆႈထႅမ်လွင်ႈပၢႆးသၢင်ႈ IT ပၼ်ၸုမ်းသိုၵ်းမၢၼ်ႈ ၼႆလႄႈလွင်ႈပၢႆးၸၢၵ်ႈ လွၵ်းလၢႆးပၢႆးသၢင်ႈ သိုဝ်ႇၼႅင်ႈသၢၼ်ၵူၺ်းဢမ်ႇပႃး – မိူၼ်ၼင်ႇၶိူင်ႈမႆႉၶိူင်ႈမိုဝ်း လွင်ႈမၢၵ်ႇမိုဝ်ႉၸိုၼ်းယၢမ်းၸိူဝ်းၼႆႉၵေႃႈၶဝ်ႈပႃးဝႆႉတႂ်ႈ IT ၼႆႉ ။

မိူဝ်ႈဝႃး ဝၼ်းတီႈ 10 လိူၼ်တီႊသႅမ်ႊပိူဝ်ႊၼႆႉ ပဵၼ်ဝၼ်းသုၼ်ႇလႆႈၵူၼ်းလုမ်ႈၾႃႉ ဢၼ်ၵူႈၸိုင်ႈမိူင်းမၵ်း မၼ်ႈပဵၼ်တၢင်းၵၢၼ်ဝႆႉၼၼ်ႉသေတႃႉ သိုၵ်းမၢၼ်ႈပွႆႇမၢၵ်ႇသႂ်ႇ ဢွင်ႈတီႈမီးၵူၼ်းမိူင်းယူႇသဝ်းၼမ်ၼၼ်ႉ ပဵၼ်ၵၢၼ်ဝႆႉမဝ်သၢင်းၽႅပ်ႉ ပူၼ်ႉပႅၼ်ပၵ်းပိူင်သိုၵ်းၵူၺ်းဢမ်ႇၵႃး ဢမ်ႇၼပ်ႉယမ်ပႃး ၾိင်ႈမိူင်းလုမ်ႈၾႃႉ မၵ်းမၼ်ႈဝႆႉ။

ၼႂ်းၸႄႈမိူင်းရၶႅင်ႇၼႆႉ တင်းမူတ်းမီးယူႇ 17 ၸႄႈဝဵင်း၊ တႃႇ 14 ၸႄႈဝဵင်းၼႆႉ ၸုမ်းသိုၵ်းရၶႅင်ႇ ယိုဝ်းတိုၵ်းဢဝ်လႆႈဝႆႉတီႈသိုၵ်းမၢၼ်ႈသေ ၵုမ်းၵမ်ပၼ်ႇၵၢၼ်ၽွင်းငမ်းဝႆႉ ပဵၼ်တၢင်း ၵၢၼ်။