ၸုမ်းသိုၵ်း RCSS တင်း PNLO ပဵၼ်ပၢင်တိုၵ်းၵၼ်ၼႂ်းၸႄႈဝဵင်းမွၵ်ႇမႆႇ ၸိုင်ႈတႆးပွတ်းၸၢၼ်း၊ တင်ႈတႄႇ ႁၢင်လိူၼ် မၢတ်ႉၶျ်မႃး ပၢင်တိုၵ်းပဵၼ်ဢမ်ႇယွမ်း 3 ၵမ်းယဝ်ႉ။

မိူဝ်ႈဝၼ်းတီႈ 30-31 လိူၼ်မၢတ်ႉၶျ်  ၸုမ်းသိုၵ်း RCSS  တင်း  PNLO ပဵၼ်ပၢင်တိုၵ်းၵၼ် တီႈဢိူင်ႇၵၼ်ႇတူးလူင် (ၵိူၼ်ႇတူလူင်) ၸႄႈဝဵင်းမွၵ်ႇမႆႇ 2 ဝၼ်းထပ်းၵၼ်။  ထိုင်မႃး ဝၼ်းတီႈ 3/4/2023  ၼႆႉၵေႃႈ သိုပ်ႇပဵၼ်ပၢင်တိုၵ်းၵၼ်ထႅင်ႈ ၶၢဝ်းယၢမ်း ၵၢင်ၼႂ် 11 မူင်းပၢႆ တေႃႇထိုင် 1 မူင်း ။

သိုဝ်ႇၶၢဝ်ႇ Tai Freedom ၶွင် RCSS တႄႉၵေႃႈ ဢွၵ်ႇၶၢဝ်ႇဝႆႉဝႃႈ ပဵၼ်ယွၼ်ႉၸုမ်းသိုၵ်း PNLO/PNLA ႁႅၼ်းလေႃႇတိုၵ်းဢွၼ်တၢင်းလႄႈ ၸင်ႇပဵၼ်ပၢင်တိုၵ်း ဝႃႈၼႆဝႆႉ။

ၵဵဝ်ႇၵပ်းလွင်ႈၼႆႉ ၽူႈမီးၸၼ်ႉ ၼႂ်းၸုမ်းသိုၵ်း PNLO/PNLA လၢတ်ႈတီႈၽူႈတွႆႇႁွၵ်ႈဝႃႈ- “ RCSS ပူၼ်ႉပႅၼ်ႈၼႃႈတီႈ  လႄႈ ၸင်ႇလႆႈယိုဝ်းၵၼ်ၶႃႈဢေႃႈၼၼ်ႉ။ ၶဝ်ဢမ်ႇပွင်ႇၶၢဝ်ႇသင်သေ ပူၼ်ႉပႅၼ်ၶဝ်ႈၼႃႈတီႈမႃးလႄႈ ၸင်ႇပဵၼ်ပၢင်တိုၵ်းဢေႃႈ။ လႅၼ်လိၼ်ၸိူဝ်းၼႆႉ သမ်ႉ ပဵၼ်ဢွင်ႈတီႈ တပ်ႉသိုၵ်းသွင်ၸုမ်း ယူႇႁိမ်းၵၼ်လႄႈ ၵႆႉၵႆႉတုမ်ႉတိူဝ်ႉၵၼ်။  ” – ဝႃႈၼႆ။ 

တပ်ႉၸုမ်း RCSS တင်း PNLO ၼႆႉ ပဵၼ်ၸုမ်းဢၼ် လူင်းလၢႆးမိုဝ်းၵိုတ်းတိုၵ်းပတ်းပိုၼ်ႉတူဝ်ႈမိူင်း NCA ဝႆႉၼင်ႇၵၼ်သေဢမ်ႇၵႃး ပဵၼ်လုၵ်ႈၸုမ်း  PPST  ဝႆႉပႃးထႅင်ႈသေတႃႉ တင်းသွင်ၸုမ်း တိုၵ်ႉမီးလွင်ႈပိုတ်းယိုတ်းၵၼ်မႃးၶိူဝ်းယႂ်း။

မိူဝ်ႈပီ 2022 ပူၼ်ႉမႃးၼၼ်ႉၵေႃႈ   RCSS တင်း PNLO ယိုဝ်းၵၼ်ႁႅင်းတီႈဢိူင်ႇၵိူၼ်ႇတူလူင် ၼႆႉၼင်ႇၵဝ်ႇ။

ဢိင်ၼိူဝ်လွင်ႈပၢင်တိုၵ်းၼႆႉသေ သိုဝ်ႇၶၢဝ်ႇ Tai Freedom ဢွၵ်ႇဝႆႉဝႃႈ  RCSS/SSA တင်း PNLO/PNLA ၼႆႉ ပဵၼ်တပ်ႉၸုမ်း ဢၼ်ယူႇၼႂ်းၸိုင်ႈတႆးႁူမ်ႈၵၼ်မႃးၶၢဝ်းႁိုင်။ယွၼ်ႉပဵၼ် တပ်ႉသိုၵ်းၸၢဝ်းၶိူဝ်းၼင်ႇၵၼ်လႄႈ ၼင်ႇၵႃႈပဵၼ်လႆႈၼၼ်ႉ ယူႇတီႈ RCSS/SSA သေ တေငိူင်ႉဝႄႈ လွင်ႈတုမ်ႉတိူဝ်ႉပိုတ်းယိုဝ်းၵၼ် လႄႈ တေႁူပ်ႉထူပ်းဢုပ်ႇဢူဝ်းၵၼ်ၵႂႃႇ ဝႃႈၼႆဝႆႉ။