Tuesday, November 29, 2022

ဝဵင်းမိူင်းမၢဝ်း ထူပ်းႁၼ်ၵူၼ်းတိတ်းၸပ်း ၶူဝ်ႊဝိတ်ႉၼမ်  သင်ႇလွၵ်ႊတွင်ႊထႅင်ႈ

Must read

လူင်ပွင်ၸိုင်ႈၶႄႇ သင်ႇ Lockdown ဢိုတ်း ဝဵင်းမိူင်းမၢဝ်း ၼႃႈလိၼ်ၽွင်းငမ်းတူဝ်ၵဝ်ႇ ၼႂ်းဢိူင်ႇတႂ်ႈၶူင်း ၸိုင်ႈမိူင်းၶႄႇထႅင်ႈ  တႄႇဢဝ် ဝၼ်းတီႈ 11/10/2022 ယၢမ်းၵၢင်ၶိုၼ်း 1 မူင်း တေႃႇထိုင် ဝၼ်းတီႈ 16/10/2022 ယၢမ်းၵၢင်ၶိုၼ်း 12 မူင်း ယွၼ်ႉ ၵူတ်ႇထတ်းႁၼ် ၵူၼ်းတိတ်းၸပ်းၸိူဝ်ႉမႅင်း တၢင်းပဵၼ်ၶူဝ်ႊဝိတ်ႉ 19 တေႃႇဝၼ်းဢမ်ႇယွမ်း 10 ၵေႃႉ ၼႆယဝ်ႉ။

Lockdown မိူင်းမၢဝ်း

ၵူၼ်းပိုၼ်ႉတီႈ မိူင်းမၢဝ်း လၢတ်ႈတီႈၽူႈတွႆႇႁွၵ်ႈဝႃႈ – “တႄႇဢဝ် ဝၼ်းတီႈ 9 မႃး ၶဝ်သင်ႇပိၵ်ႉဢိုတ်း ဝဵင်းမိူင်းမၢဝ်း ၽၢၵ်ႇၼိုင်ႈ။ ထိုင်မႃး ဝၼ်းတီႈ 11 ယၢမ်းၵၢင်ၶိုၼ်း 1 မူင်း လူင်ပွင်ၸိုင်ႈၶႄႇၶဝ် သင်ႇပိၵ်ႉပႅတ်ႈ တင်းဝဵင်းယဝ်ႉ။ ယွၼ်ႉၵူၼ်းတိတ်း ၸပ်း ၶူဝ်ႊဝိတ်ႉ 19 ၼႆႉ 1 ဝၼ်း ဢမ်ႇယွမ်း 10 ၵေႃႉ။ ၼႂ်းဝဵင်းမိူင်းမၢဝ်းၼႆႉ ဝၢၼ်ႈၵူၼ်း ဢၼ်ဢမ်ႇတိတ်းၸပ်း ၶူဝ်ႊဝိတ်ႉ 19 ၼႆႉ တေလွတ်ႈ 2-3 ဝၢၼ်ႈၵူၺ်း လိူဝ်ၼၼ်ႉ ပဵၼ်ၵူႈဝၢၼ်ႈယဝ်ႉ”-ဝႃႈၼႆ။

မိူဝ်ႈဝႃး ဝၼ်းတီႈ 11/10/2022 ၵူၼ်းတိတ်းၸပ်း တၢင်းပဵၼ်ၶူဝ်ႊဝိတ်ႉ 19 ၼႂ်းဝဵင်းမိူင်းမၢဝ်း ဢၼ်ဢွၵ်ႇၾၢင်ႁၢင် 2 ၵေႃႉ ဢမ်ႇဢွၵ်ႇၾၢင်ႁၢင်ႈ 24 ၵေႃႉ ႁူမ်ႈ 26 ၵေႃႉ ဝႃႈၼႆ။

“ဢၼ်ၶဝ် လွၵ်ႊတွင်ႊထႅင်ႈၵမ်းၼႆႉ ပၵ်းပိူင်ၶဝ် ပိုၼ်ၽၢဝ်ႇ ႁၢဝ်ႈႁႅင်းလိူဝ်ၵူႈပွၵ်ႈ။ တိုၼ်းဢမ်ႇပၼ်ဢွၵ်ႇႁိူၼ်း ဢမ်ႇပၼ်ၵႂႃႇ လႂ်၊ ၵႂႃႇၼႃး၊ ၵႂႃႇသူၼ်၊ ၵႂႃႇႁႆႈ တိုၼ်းဢမ်ႇလႆႈ။ ယဝ်ႉၵေႃႈ ႁၢၼ်ႉၶၢႆၶူဝ်း ၶွင်ၵိၼ် ၸိူဝ်းၼႆႉၵေႃႈ တိုၼ်းဢမ်ႇပၼ်ၶၢႆၵမ်းလဵဝ် ၶႃႈ ယဝ်ႉ။ တင်ႈတႄႇ ဢဝ်လိူၼ်သႅပ်ႊထႅမ်ႊပိူဝ်ႊမႃးတေႃႇထိုင် လိူၼ်ဢွၵ်ႊထိူဝ်ႊပိူဝ်ႊၼႆႉ ၵူၼ်းတိတ်းၸပ်းၶူဝ်ႊဝိတ်ႉ ဢမ်ႇယွမ်း 100 ယဝ်ႉ။ မိူဝ်ႈဝႃးၼႆႉ ထူပ်းႁၼ်ၼမ်လိူဝ်ၵူႈဝၼ်း တင်းမူတ်း 26 ၵေႃႉ ၵမ်းလဵဝ်”- ၵူၼ်းပိုၼ်ႉတီႈ မိူင်းမၢဝ်း သိုပ်ႇလၢတ်ႈ ၼႄၼင်ႇၼႆ။

ဝဵင်းမိူင်းမၢဝ်း ၼႃႈလိၼ်ၽွင်းငမ်းတူဝ်ၵဝ်ႇ ၼႂ်းဢိူင်ႇတႂ်ႈၶူင်း ၸိုင်ႈမိူင်းၶႄႇၼႆႉ မိူဝ်ႈဝၼ်းတီႈ 16/9/2022 – 21/9/2022 ၼၼ်ႉ လွၵ်ႊတွင်ႊမႃးယဝ်ႉ ၵမ်းၼိုင်ႈ၊ ၶိုၼ်းပိုတ်ႇလွၵ်ႊတွင်ႊတၼ်းလႆႈ 2 ဝၼ်း ထိုင်မႃးဝၼ်းတီႈ 24/9/2022 ယၢမ်းၵၢင် ၶိုၼ်း 12 မူင်း သင်ႇပိၵ်ႉဢိုတ်းလွၵ်ႊတွင်ႊထႅင်ႈ တေႃႇထိုင် ဝၼ်းတီႈ 30/9/2022 ၼၼ်ႉသေ ထိုင်မႃးဝၼ်းတီႈ 1/10/2022 ၶိုၼ်းပိုၼ်ၽၢဝ်ႇပိုတ်ႇၶိုၼ်းသေ ထိုင်မႃး ဝၼ်းတီႈ 11/10/2022 ၼႆႉ သင်ႇပိၵ်ႉဢိုတ်း တေႃႇထိုင် ဝၼ်းတီႈ 16  ၸင်ႇတေ ပိုတ်ႇလွၵ်ႊတွင်ႊၶိုၼ်း ၼႆယဝ်ႉ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- SHAN's Apps -spot_img

ၶၢဝ်ႇလိုၼ်းသုတ်း