မိူဝ်ႈၼႆႉ ဝၼ်းတီႈ 29/08/2024 ယၢမ်းၵၢင်ၼႂ်ၸဝ်ႉ ၸၢဝ်းတႆး လၢႆမူႇဝၢၼ်ႈ ၼႂ်းဢိူင်ႇၼွင်တဝ်း ဝဵင်းမိူင်းမၢဝ်း ၼႂ်းၼႃႈလိၼ်ၽွင်းငမ်းတူဝ်ၵဝ်ႇ ဢိူင်ႇတႂ်ႈၶူင်း ၸိုင်ႈမိူင်းၶႄႇ ဢွၼ်ၵၼ်ငိူင်ႉပၢႆႈၸူဝ်ႈၶၢဝ်း ယွၼ်ႉသိုၵ်းၶႄႇ ၾိုၵ်းသိုၵ်းသေ ႁဵတ်းႁႂ်ႈသဵင်ၵွင်ႈလင်ႁႅင်း။

ၵူၼ်းပိုၼ်ႉတီႈ ဝဵင်းမိူင်းမၢဝ်း လၢတ်ႈတီႈၽူႈတွႆႇႁွၵ်ႈဝႃႈ – “သိုၵ်းၶႄႇ ၸႂ်ႉၵူၼ်းဝၢၼ်ႈလႄႈ မူ၊ မႃ၊ ၵႆႇ၊ ပဵတ်း ၸိူဝ်းၼႆႉ ၼႂ်းဢိူင်ႇၼွင်တဝ်း မိူၼ်ၼင်ႇ ဝၢၼ်ႈၼွင်မူဝ်လွႆ ဢိၵ်ႇထႅင်ႈ 2-3 ဝၢၼ်ႈ ႁႂ်ႈငိူင်ႉပၢႆႈ ဝႆႉၸူဝ်ႈၶၢဝ်း ယွၼ်ႉၶဝ်ၾိုၵ်းၵၢၼ်သိုၵ်း။ ၶဝ်ၸၢမ်းယိုဝ်းမၢၵ်ႇ သဵင်မၢၵ်ႇၶဝ်လင်ႁႅင်းထူၼ်ႈယဝ်ႉ ၼင်ႇလိၼ်ပေႃးသၼ်ဢေႃႈ။ ၵူၼ်းဝၢၼ်ႈ ဢၼ်လႆႈၶၢႆႉဝႆႉ ၸူဝ်ႈၶၢဝ်းၼၼ်ႉ ပဵၼ်ၸၢဝ်းတႆး ၵူၺ်းၵႃႈ ၶၢႆႉၵႂႃႇယူႇဝႆႉတီႈလႂ်တႄႉ ပႆႇႁူႉၶႃႈ။ သိုၵ်းၶႄႇၶဝ် တူမ်ႈၶဝ်ႈလဵင်ႉယူႇ ၼႆဢေႃႈ” – ဝႃႈၼႆ။

ဢွင်ႈတီႈ သိုၵ်းၶႄႇ ၾိုၵ်းၵၢၼ်သိုၵ်းၼႆႉ ပဵၼ်ၼႂ်းဝဵင်းမိူင်းမၢဝ်း ဢိူင်ႇတႂ်ႈၶူင်း ဢၼ်မီးၾၢႆႇႁွင်ႇ တၢင်းဝဵင်းၼမ်ႉၶမ်း တႄႇၾိုၵ်းၼႂ်းဝၼ်းတီႈ 27-29 တႃႇၶၢဝ်းတၢင်း 3 ဝၼ်း ၼႆယဝ်ႉ။

ၵူၼ်းပိုၼ်ႉတီႈ ဝဵင်းၼမ်ႉၶမ်း လၢတ်ႈတီႈၽူႈတွႆႇႁွၵ်ႈဝႃႈ – “သဵင်ၵွင်ႈသဵင်မၢၵ်ႇ ဢၼ်ၶဝ်ၸၢမ်းယိုဝ်းၼၼ်ႉ သဵင်မၼ်းယွၼ်ႈထိုင် တီႈဝဵင်းၼမ်ႉၶမ်းၼႆႉ ၼင်လိၼ်ပေႃးသၼ်ႇဢေႃႈ။ ဢွင်ႈတီႈၶဝ်ၾိုၵ်းၵၢၼ်သိုၵ်း ၼၼ်ႉသေ တီႈၼမ်ႉၶမ်းၼႆႉ တေယၢၼ်ၵၼ်မွၵ်ႈ 7 လၵ်းၼႆႉၵူၺ်း။ ဢၼ်လႆႈငိၼ်းသဵင်ၵွင်ႈၶဝ် ယိုဝ်းၼၼ်ႉ တႄႇဢဝ်ၵၢင်ၼႂ် 5 မူင်း ထိုင်ဝၢႆးဝၼ်း 2 မူင်းၼႆႉ သဵင်ၵွင်ႈၸင်ႇယဵၼ်ဢေႃႈ”- ဝႃႈၼႆ။

ယဝ်ႉၵေႃႈ ၼႂ်းၶၢဝ်းတၢင်း 3 ဝၼ်းၼႆႉ သိုၵ်းၶႄႇ ဢဝ်ႁႅင်းသိုၵ်း မႃးၼႄၾၢင်ႁၢင်ႈသိုၵ်း တၢင်းဝၼ်းတဵင်ႈ ဢၼ်တေႃႇ ၼႃႈၵၼ်တၢင်း ဝဵင်းပၢင်ႇသၢႆး၊ တၢင်းၸေႊၵဝ်ႇ – ႁူၺ်ႈလီႈ တေႃႇၼႃႈၵၼ်တၢင်း ဝဵင်းမူႇၸေႊလႄႈ ၼွင်တဝ်း ဢၼ်တေႃႇၼႃႈၵၼ်တၢင်း ဝဵင်းၼမ်ႉၶမ်း ၸိူဝ်းၼႆႉ။