တႄႇဢဝ်ဝၼ်းတီႈ 25/08/2025 ၼႆႉၵႂႃႇ ဢမေႊရိၵၼ်ႊလႄႈ ဢိၼ်ႇတူဝ်ႇၼီးသျႃး ႁူမ်ႈၵၼ်တင်းၸိုင်ႈမိူင်း ၸိူဝ်းပဵၼ်ဢူၺ်းလီၵၼ် 11 မိူင်းသေ တႄႇၾိုၵ်းၽွၼ်ႉၵၢၼ်သိုၵ်းၵႂႃႇ တႃႇၶၢဝ်းတၢင်း ၼိုင်ႈဝူင်ႈ ဝႃႈၼႆ။

လွင်ႈႁူမ်ႈၵၼ်ၾိုၵ်းၽွၼ်ႉၵၢၼ်သိုၵ်း ပွၵ်ႈၼႆႉ ယိူင်းဢၢၼ်းတႃႇႁႂ်ႈၼႂ်းပိုၼ်ႉတီႈ ဢေးသျႃး – ပၸိၾိၵ်ႉ မီးလွင်ႈၵတ်းယဵၼ်ၼိမ်သဝ်း ၼႆယဝ်ႉ။

ပၢင်ၾိုၵ်းၽွၼ်ႉၵၢၼ်သိုၵ်း “Super Garuda Shield” ၼႆႉ ၸတ်းႁဵတ်းမႃးၵူႈပီသေ ပီၼႆႉ ၸတ်းႁဵတ်းၼႂ်းပိုၼ်ႉတီႈ ၵုၼ်ရီႇယႃႇ (Ria Island)၊ ၾၢႆႇတူၵ်းၵုၼ် သူႇမႃးထႂႃး (Sumatra) ဝဵင်းလူင်ၵျႃႇၵႃႇတႃႇ မိူင်းဢိၼ်ႇတူဝ်ႇၼီးသျႃး တေၾိုၵ်းၽွၼ်ႉၵႂႃႇတေႃႇထိုင် ဝၼ်းတီႈ 04/09/2025 ၼႆယဝ်ႉ။

တီႈၼႂ်းပၢင်ၾိုၵ်းၽွၼ်ႉၵၢၼ်သိုၵ်းၼၼ်ႉ မီးတပ်ႉသိုၵ်းမိူင်းဢိၼ်ႇတူဝ်ႇၼီးသျႃး ဢဵၼ်ႁႅင်း 4,100 ၵေႃႉ၊ တပ်ႉသိုၵ်းမိူင်းဢမေႊရိၵၼ်ႊ 1,300 ၵေႃႉလႄႈ တပ်ႉသိုၵ်းမိူင်းဢေႃးသတြေးလီးယိူဝ်း၊ ၵျပၼ်ႊ၊ သိင်ႇၵပူႇ၊ ၾရင်ႇသဵတ်ႈ၊ ၼိဝ်ႊသီႊလႅၼ်ႊ၊ ပရဵင်ႊတိင်ႊလႄႈ ၸိူဝ်းပဵၼ်မိူင်းဢူၺ်းလီ ၵၼ်ထႅင်ႈလၢႆလၢႆမိူင်း ဝႃႈၼႆ။

မိူၼ်ၼင်ႇ ဢမေႊရိၵၼ်ႊ၊ ဢေႃးသတြေးလီးယိူဝ်းလႄႈ မိူင်းဢူၺ်းလီထႅင်ႈလၢႆမိူင်း ယၢမ်ႈဢွၼ် ၵၼ်လၢတ်ႈဝႃႈ မႆႈၸႂ်ၸွမ်းလွင်ႈမိူင်းၶႄႇ တိူဝ်းႁဵတ်းသၢင်ႈတူင်ႉၼိုင်ၵၢၼ်သိုၵ်းမႃး ၼႂ်းပိုၼ်ႉတီႈပၸိၾိၵ်ႉ ၼႆသေတႃႉ ယူႇတီႈဢမေႊရိၵၼ်ႊတႄႉလၢတ်ႈဝႃႈ လွင်ႈၾိုၵ်းၽွၼ်ႉၵၢၼ်သိုၵ်းပွၵ်ႈၼႆႉ ဢမ်ႇလႆႈယိူင်းဢၢၼ်းထိုင်မိူင်းၶႄႇ ဝႃႈၼႆ။

တီႈၼႂ်းၶပ်ႉမၢႆ ႁူမ်ႈၵၼ်ၾိုၵ်းၽွၼ်ႉၵၢၼ်သိုၵ်းၼၼ်ႉ တေမီးလွင်ႈၾိုၵ်းၽွၼ်ႉ ၾၢႆႇၵႅတ်ႇၶႄႁႄႉၵင်ႈ တင်းသၢႆႊပိူဝ်ႊ၊ လွင်ႈႁူမ်ႈၵၼ်ၾိုၵ်းၽွၼ်ႉၵၢၼ်သိုၵ်း၊ တေပိုတ်းယိုဝ်းပႃး ၶိူင်ႈယိပ်းၵွင်ႈၵၢင် ဢၼ်တႄႉၸိူဝ်းၼႆႉ – တပ်ႉသိုၵ်းမိူင်းဢိၼ်ႇတူဝ်ႇၼီးသျႃး လၢတ်ႈၼင်ႇၼႆ။

မိူၼ်ၼင်ႇ မိူင်းဢိၼ်ႊတီႊယိူဝ်ႊ၊ မိူင်းပႃႇပူႇဢႃႇၼိဝ်းၵီႇၼီႇလႄႈ မိူင်းတီႇမေႃးဝၼ်းဢွၵ်ႇ ၸိူဝ်းၼႆႉၵေႃႈ လႆႈသူင်ႇတူဝ်တႅၼ်းမႃးၶဝ်ႈႁူမ်ႈလဵပ်ႈႁဵၼ်းၸွမ်း။ ၵဵဝ်ႇလူၺ်ႈ ၼႂ်းလွင်ႈၶဝ်ႈ ဢွၵ်ႇၵပ်းသိုပ်ႇမိူင်းၶႄႇတင်း မိူင်းဢမေႊရိၵၼ်ႊၼၼ်ႉ မိူင်းဢိၼ်ႇတူဝ်ႇၼီးသျႃး ၸႂ်ႉတိုဝ်းဝႆႉ မူႇပိူင်ယူႇၵႄႈၵၢင် (ကြားနေမူဝါဒါ) ၼႆယဝ်ႉ။