တႃႇႁၢပ်ႇၵၢၼ်သိုၵ်း ၸုပ်ႈ 12 ၼႆႉ ၵၢင်ႉၵႄႇၼႂ်းပွၵ်ႉ ဝဵင်းၼမ်ႉၸၢင် ၸိုင်ႈတႆးပွတ်းၸၢၼ်း သူင်ႇလိၵ်ႈၸူး ၵူၼ်းမိူင်းၼႂ်းပိုၼ်ႉတီႈ ႁႂ်ႈမႃးၸူၵ်းဝႂ်ၶႅပ်းမႄး ၽႂ်ၸူၵ်းလႆႈၵေႃႈ တၵ်းလႆႈ ၵႂႃႇၾိုၵ်းၵၢၼ်သိုၵ်း ငိူင်ႉဝႄႈဢမ်ႇလႆႈ ဝႃႈၼႆ။

တႄႇႁၢင်လိူၼ်မေႊၼႆႉမႃး ပလိၵ်ႈမၢၼ်ႈ သိုၵ်းမၢၼ်ႈတင်း ႁွင်ႈၵၢၼ်ၾၢႆႇၽွင်းငမ်းၵူႈလွင်ႈလွင်ႈ သူင်ႇလိၵ်ႈၸူး ႁိူၼ်းယေးၵူၼ်းမိူင်း ၸိူဝ်းမီးလုၵ်ႈၸၢႆး သႅၼ်းပၢၼ်ႁၢပ်ႇၵၢၼ်သိုၵ်း ႁႂ်ႈဢွၼ်ၵၼ်မႃး ၸူၵ်းၶႅပ်းမႄး တႃႇႁၢပ်ႇၵၢၼ်သိုၵ်း ၸုပ်ႈ 12 ။ ဢၼ်လႆႈႁပ်ႉလိၵ်ႈတႃႇမႃးၸူၵ်းမႄးတႄႉ ၼႂ်းပွၵ်ႉ 1 မီး 20 ၵေႃႉ ၊ ၼႂ်းပွၵ်ႉ 2 မီး 10 ၵေႃႉ ၊ ပွၵ်ႉ 3 လႄႈ ပွၵ်ႉ 4 တႄႉ ပႆႇလႆႈငိၼ်းလွင်ႈလႆႈႁပ်ႉလိၵ်ႈ ၵူၼ်းပိုၼ်ႉတီႈလၢတ်ႈ ၼင်ႇၼႆ။ 

ၵူၼ်းၸၢႆး ပိုၼ်ႉတီႈ လၢတ်ႈၽူႈတွႆႇႁွၵ်ႈဝႃႈ -“ပွၵ်ႉၼိုင်ႈပွၵ်ႉလဵဝ်ၵူၺ်း ၶဝ်သူင်ႇလိၵ်ႈၸူး 20 ၵေႃႉ ၊ ၶဝ်ႁွင်ႉ ႁႂ်ႈၵႂႃႇၸူၵ်းမႄး တီႈလုမ်းၽွင်းငမ်း၊ ၼႂ်း 20 ၵေႃႉၼႆႉ ၶဝ်တေဢဝ် 6 ၵေႃႉတႃႇၵႂႃႇၾိုၵ်းၵၢၼ်သိုၵ်း”- ဝႃႈၼႆ။

ၵူၼ်းၸိူဝ်းထုၵ်ႇမွၵ်ႇမႃးၼႆႉ တေလႆႈၵႂႃႇၸူၵ်းမႄး ၼႂ်းဝၼ်းတီႈ 2 လိူၼ်ၵျုၼ်ႊၼႆႉ – ၵူၼ်းပိုၼ်ႉတီႈလၢတ်ႈၼင်ႇၼႆ။

“ၸႂ်ႈယဝ်ႉ ၵူၼ်းႁူႉၸၵ်းၼႂ်းပွၵ်ႉၵေႃႈ ၶဝ်သူင်ႇလိၵ်ႈမႃး ႁႂ်ႈၵႂႃႇၸူၵ်းမႄးၼႆ၊ ၵူႈပွၵ်ႈတႄႉ ႁႃၵူၼ်းၵိၼ်လဝ်ႈၵိၼ်ယႃႈသေ သူင်ႇၵႂႃႇၾိုၵ်းၵၢၼ်သိုၵ်း။ တေႃႈလဵဝ်ၼႆႉ ၸဝ်ႈလဝ်ႈၸဝ်ႈယႃႈၵေႃႈ ၶႂ်ႈမူတ်းယဝ်ႉ။ ပေႃးသဵၼ်ႈၸိုဝ်ႈ ဢမ်ႇၼၼ်ၸူၵ်းၶႅပ်းမႄးသေလႆႈပႃးၵႂႃႇယဝ်ႉတႄႉ တႃႇတေၵႂႃႇငူပ်ႉငီႉၵၼ်သေ ဢဝ် မႃးၶိုၼ်းးတႄႉ ဢမ်ႇငၢႆႈယူဝ်ႉ ၊ တေၵႂႃႇႁႃၵူၼ်းတီႈလႂ် ၊ ၵူၼ်းဢၼ်ၺႃးသူင်ႇလိၵ်ႈၸိူဝ်းၼၼ်ႉ ပေႃႈမႄႈ ၶဝ်ၵေႃႈ ပေႃးဢမ်ႇပဵၼ်လပ်းပဵၼ်ၼွၼ်း မႆႈၸႂ်ႁႅင်းဝႆႉ”- ဝႃႈၼႆ။

တီႈဝဵင်းၼမ်ႉၸၢင်ၼႆႉ ၵွၼ်ႇၼႃႈၼႆႉ လွင်ႈသူင်ႇလိၵ်ႈၸူးၵူၼ်းမိူင်းသေ ၶၢၼ်းမႃးၸူၵ်းၶႅပ်းမႄး တႃႇၵႂႃႇ ၾိုၵ်းၵၢၼ်သိုၵ်းၼၼ်ႉ ဢမ်ႇမီးမႃး။ ယူႇတီႈ ပလိၵ်ႈသိုၵ်းမၢၼ်ႈ လမ်းႁႃတီႉၺွပ်းၵူၼ်းၵိၼ်လဝ်ႈၵိၼ်ယႃႈသေ ဢဝ်ၵႂႃႇၵူၺ်း။ ဢၼ်သူင်ႇလိၵ်ႈၸူးၼႆႉ ၸင်ႇႁႃမီးပွၵ်ႈၵမ်းၼႆႉၵူၺ်း ၊ ၵွပ်ႈၼႆ ႁဵတ်းႁႂ်ႈၵူၼ်းမိူင်း ဝဵင်းၼမ်ႉၸၢင် တူၵ်းၸႂ် – ဝႃႈၼႆ။   

ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇ လၢတ်ႈၼႂ်းပၢင်ၵုမ် မိူဝ်ႈဝၼ်းတီႈ 15-16 ၼၼ်ႉဝႃႈ ၼႃႈလိၼ် ဢၼ်ၶဝ်သုမ်းပၼ်သိုၵ်းၸၢဝ်းၶိူဝ်းၸိူဝ်းၼၼ်ႉ တေဢဝ်ၶိုၼ်းႁႂ်ႈလႆႈၼႂ်းၶၢဝ်းတၢင်း 6 လိူၼ်။ တေ ၸႂ်ႉႁႅင်းသိုၵ်း ၵူၼ်းသိုၵ်းမႂ်ႇ ဢၼ်ၾိုၵ်းဝႆႉပၼ်ၵၢၼ်သိုၵ်း ၸိူဝ်းၼၼ်ႉၶိုၼ်ႈၼႃႈသိုၵ်း၊ တေႁႂ်ႈၽူႈ ၼမ်းသိုၵ်း ၼႂ်းတပ်ႉသိုၵ်းမၢၼ်ႈ ဢွၼ်ႁူဝ်ၼမ်းၼႃႈၶဝ်သေ ပိုတ်းယိုဝ်းသိုၵ်းလုၵ်ႉၽိုၼ်ႉ ၸိူဝ်းၼႆႉ ဝႃႈၼႆပႃး။

သိုၵ်းမၢၼ်ႈ ပိုၼ်ၽၢဝ်ႇပၵ်းပိူင်ႁၢပ်ႇၵၢၼ်သိုၵ်းသေ တဵၵ်းၶၢၼ်းတီႉၺွပ်း လၢၵ်ႈၸၼ် ၵူၼ်းၼုမ်ႇၵႂႃႇၾိုၵ်း ၵၢၼ်သိုၵ်းယဝ်ႉၵႂႃႇ ၸုပ်ႈ 11 ယဝ်ႉ။ ၵူၼ်းၸိူဝ်းထုၵ်ႇႁွင်ႉၵႂႃႇၼၼ်ႉ လႆႈၵႂႃႇ ၾိုၵ်းၵၢၼ်သိုၵ်းတီႈၼႂ်းတိူင်း သိုၵ်းၽွင်ႈ၊ ထုၵ်ႇသူင်ႇၵႂႃႇၾိုၵ်းတီႈလွၵ်ႉၸွၵ်ႇၽွင်ႈ။ ဝၢႆးၾိုၵ်းၵၢၼ်သိုၵ်းယဝ်ႉ ၵမ်ႈၽွင်ႈထုၵ်ႇသူင်ႇၵႂႃႇ ႁဵတ်းၵၢၼ်လုမ်းၼႂ်းတိူင်းသိုၵ်း ၵမ်ႈၼမ်တႄႉထုၵ်ႇသူင်ႇၵႂႃႇၼႃႈသိုၵ်း။ ၵမ်ႈၼမ်တႄႉ ဢမ်ႇလႆႈပွၵ်ႈၶိုၼ်း ႁိူၼ်းယေး။