ၵူၼ်းၼုမ်ႇ ၸိူဝ်းထုၵ်ႇတီႉ တီႈဝဵင်းတူၼ်ႈတီး ၸိုင်ႈတႆးပွတ်းၸၢၼ်းၼႆႉ ထုၵ်ႇသူင်ႇၵႂႃႇႁဵတ်းသိုၵ်း ၸုပ်ႈထီႉ 5-6 ၼၼ်ႉ တၢႆၼႃႈသိုၵ်းတင်းၼမ် ပေႃႈမႄႈၵူၼ်းႁိူၼ်း လႆႈႁႅၼ်းသွမ်းပၼ်။

ၾၢႆႇသိုၵ်းမၢၼ်ႈ ၵပ်းသိုပ်ႇတိတ်းတေႃႇမႃးၸူး ပေႃႈမႄႈပီႈၼွင်ႉၵူၼ်းၼုမ်ႇ ၸိူဝ်းထုၵ်ႇတီႉသေ ပွင်ႇၶၢဝ်ႇၶိုၼ်းဝႃႈ တူၵ်း ၼႃႈသိုၵ်းယဝ်ႉ ၼႆၵူၺ်း။ တူၵ်းတၢင်းလႂ်လႄႈ ၸိူင်ႉႁိုဝ်ဢမ်ႇလႆႈ ႁူႉၸွမ်း။ မၢင်ၸိူဝ်းၵေႃႈ သိုၵ်းမၢၼ်ႈ ဢမ်ႇပွင်ႇၶၢဝ်ႇပၼ် လႆႈႁူႉတီႈၵူၼ်းၸမ်ၸႂ်ၵူၺ်းၼႆ – ပေႃႈမႄႈၵူၼ်းၼုမ်ႇ တီႈဝဵင်းတူၼ်ႈတီး လၢတ်ႈၼင်ႇၼႆ။ 

ပီႈၼွင်ႉၸမ်ၸႂ် ၵူၼ်းၼုမ်ႇ ဢၼ်တၢႆၼႃႈသိုၵ်း လၢတ်ႈတီႈၽူႈတွႆႇႁွၵ်ႈဝႃႈ -“ဢၼ်သိုၵ်းမၢၼ်ႈၶဝ် လၢၵ်ႈၸၼ်ၵူၼ်း ၼုမ်ႇ ၵၢင်ၶမ်ႈၵၢင်ၶိုၼ်း ၼႂ်းဝဵင်းတူၼ်ႈတီး ၽွင်းႁၢင်ပီ 2024 ၼႆႉၼၼ်ႉ – ၵူၼ်းၼုမ်ႇ ၸိူဝ်းၼၼ်ႉထုၵ်သူင်ႇၼႃႈသိုၵ်း။ သိုၵ်းမၢၼ်ႈလႆႈၵႂႃႇ 200 ပၢႆ။ ယၢမ်းလဵဝ် လႆႈၶၢဝ်ႇဝႃႈ တၢႆ ၼႃႈသိုၵ်း10 ပၢႆယဝ်ႉ။ မၢင်ၸိူဝ်း ဢမ်ႇလႆႈတူဝ်တၢႆၶိုၼ်း လႆႈႁႅၼ်းသွမ်းပၼ် ၸိူင်ႉၼၼ်လၢႆလၢႆ။ တၢႆႁဵတ်းႁိုဝ်ၵေႃႈ ဢမ်ႇလႆႈႁူႉ၊ မၢင်ၸိူဝ်း လႆႈငိၼ်းၶၢဝ်ႇဝႃႈတၢႆၼႆၵူၺ်း”- ဝႃႈ ၼႆ။

ၵူၼ်းၼုမ်ႇ ဢၼ်လူႉသဵင်ႈၵႂႃႇၼႃႈသိုၵ်းၼၼ်ႉ ပဵၼ်ၵူၼ်းၼုမ်ႇ ဢၼ်ထုၵ်ႇတီႉၺွပ်းၵႂႃႇ ၾိုၵ်းၵၢၼ်သိုၵ်း ၸုပ်ႈထီႉ 5-6 ။ ပဵၼ်ၵူၼ်းၼုမ်ႇ တီႈဝဵင်းတူၼ်ႈတီး၊ ယွင်ႁူၺ်ႈ၊ သူၺ်ႇၺွင်ႇ ၊ ဢေးသႃႇယႃႇ။ ၵမ်ႈၼမ် မီးဢႃယုၼႂ်းၵႄႈ 16 လႄႈ 17 ပီ။ ၵႂႃႇတၢႆတင်းၼႃႈသိုၵ်း ဢၼ်ပဵၼ်ယူႇတၢင်းမိူင်း ယၢင်းၼၼ်ႉ- လႆႈႁူႉၼင်ႇၼႆ။ 

ၵူၼ်းၸၢႆး ပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ၵူၼ်းၼုမ်ႇ ဢၼ်ထုၵ်ႇတီႉပႃးၵႂႃႇၸိူဝ်းၼၼ်ႉ၊ ပဵၼ်လုၵ်ႈဢွၼ်ႇႁဵတ်း CDM ဝႆႉသေ  ႁဵတ်းၵၢၼ်ၵၢင်ၶမ်ႈၵၢင်ၶိုၼ်း ၸိူဝ်းၼၼ်ႉ။ တီႈတူၼ်ႈတီးၼႆႉ ၵၢင်ၶမ်ႈၵၢင်ၶိုၼ်း သိုၵ်းမၢၼ်ႈ လိုပ်ႈလၢမ်းတီႉၺွပ်း ၵူၼ်းၼုမ်ႇၵူႈဝၼ်းလႄႈ ၶႂ်ႈႁႂ်ႈၵူၼ်းၼုမ်ႇ ဢွၼ်ၵၼ်ၾၢင်ႉ။ ယႃႇဢွၵ်ႇတၢင်းၼွၵ်ႈယၢမ်းၵၢင်ၶမ်ႈၵၢင် ၶိုၼ်း”- ဝႃႈၼႆ။

ယၢမ်းလဵဝ်ၵေႃႈ မီးၵူၼ်းၼုမ်ႇ ၾိုၵ်းၵၢၼ်သိုၵ်းၸုပ်ႈ 6 ဢၼ်ၵႂႃႇမၢတ်ႇၸဵပ်းတီႈၼႃႈသိုၵ်းသေ မႃးသူင်ႇယူတ်းယႃတူဝ်ဝႆႉ တီႈႁူင်းယႃသိုၵ်းမၢၼ်ႈ ဢွင်ႇသပေႇ (အောင်သပြေ ) လႄႈ ဢွင်ႇပၢၼ်း (အောင်ပန်း) – ၵူၼ်းပိုၼ်ႉတီႈလၢတ်ႈ။

တႄႇလိူၼ်ဢွၵ်ႊထူဝ်ႊပိူဝ်ႊ ပီ 2024 မႃး သိုၵ်းမၢၼ်ႈ တီႉၺွပ်း ၵူၼ်းမိူင်းၵၢင်ဝဵင်းတူၼ်ႈတီး ယၢမ်းၵၢင်ၶမ်ႈၵၢင်ၶိုၼ်း တေႃႇထိုင်ဝၼ်းမိူဝ်ႈၼႆႉ ၵူၼ်းမိူင်းထုၵ်ႇတီႉၺွပ်းၵႂႃႇမီး 200 ပၢႆ။ ထုၵ်ႇသူင်ႇတူဝ် ၵႂႃႇမီးဝႆႉၵဵင်းတုင်ၽွင်ႈ ၵႂႃႇယွၼ်းထုတ်ႇဢဝ်ၶိုၼ်းၵေႃႈ ဢမ်ႇလႆႈ တေၾိုၵ်းပၼ်ၵၢၼ် သိုၵ်းသေသူင်ႇလႃႈသဵဝ်ႈ – ၵူၼ်းပိုၼ်ႉတီႈလၢတ်ႈ။

ၵၢင်ႉၵႄႇ ၼႂ်းဝၢၼ်ႈၼႂ်းပွၵ်ႉ ဝဵင်းတူၼ်ႈတီးသမ်ႉ ႁွင်ႉပၢင်ၵုမ်ၵူၼ်းဝၢၼ်ႈသေ လၢတ်ႈဝႃႈ ႁိူၼ်းဢၼ်မီး ၵူၼ်းၼုမ်ႇ ဢၼ်မီးဢႃယု 18 ထိုင် 35 ပီၼႆႉ တေလႆႈပၼ်ငိုၼ်း တႃႇၵမ်ႉထႅမ် ၵူၼ်းႁၢပ်ႇၵၢၼ်သိုၵ်း 1 လိူၼ်လႂ် လႆႈပၼ် 1 သႅၼ်ပျႃး မၢင်ပွၵ်ႉ 5 မိုၼ်ႇပျႃး မၢင်ပွၵ်ႉ 2 မိုၼ်ႇပျႃး – ဝႃႈၼႆ။

ၸဵမ်မိူဝ်ႈသိုၵ်းမၢၼ်ႈ ၵဵပ်းသိုၵ်းမႃး ၸုပ်ႈၼိုင်ႈပုၼ်ႉၵေႃႈ ၶဝ်ယၢမ်ႈပိုၼ်ၽၢဝ်ႇ လၢတ်ႈဝႃႈ တႃႇလူလွမ် ပႂ်ႉဢဝ်လွင်ႈႁူမ်ႇလူမ်ႈ ၼႂ်းဢွင်ႈတီႈၽႂ်မၼ်းၵူၺ်း ဝႃႈၼႆသေတႃႉ ထုၵ်ႇသူင်ႇၸူးၼႃႈသိုၵ်းသေ လူႉတၢႆမႃးၵေႃႈ မီးမႃးၼမ်။ ယၢမ်းလဵဝ် ပဵၼ်ၸုပ်ႈထီႉ 8 ယဝ်ႉ။  

ၼႂ်းမိူင်းႁူမ်ႈတုမ် ပတ်းပိုၼ်ႉၼႆႉ ၵူၼ်းၼုမ်ႇ  ဢၼ်ၺႃးသိုၵ်းမၢၼ်ႈ ၵဵပ်းၵႂႃႇႁဵတ်းသိုၵ်းမီးထိုင် 13,000 ယဝ်ႉ။ ၵမ်ႈၼမ် သူင်ႇၸူးတၢင်းမိူင်းတႆးပွတ်းႁွင်ႇ၊ မိူင်းရၶႅင်ႇ၊ မိူင်းယၢင်းၽိူၵ်ႇ၊ တိူင်းၸႄႈၵႅင်း ၸိူဝ်းၼႆႉ – ၸုမ်း BACS ႁၢႆးငၢၼ်းဝႆႉထႅင်ႈၼင်ႇၼႆ။ 

တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ်)