ဢွၼ်ႇၸၢႆး ဢႃယု 10 ၶူပ်ႇ ၵေႃႉၼိုင်ႈ ပဵၼ်ၽေးၵိုင်ႉၵၢင်ႉ လူမ်ႉရူတ်ႉထိပ်ႇသေ ဢဝ်လဵၵ်းတႅင်းသႂ်ႇ တီႈပုမ် မၼ်းၸၢႆး ထိုင်တီႈသႆႈလူင် လႆဢွၵ်ႇတၢင်းၼွၵ်ႈ ပဵၼ်တီႈဝဵင်းမိူင်းမၢဝ်း ၸိုင်ႈမိူင်းၶႄႇ ယၢမ်းလဵဝ် လူဝ်ႇတၢင်းၸွႆႈထႅမ် ၵႃႈယူတ်းယႃ။

ဝၼ်းတီႈ 20/05/2024 ယၢမ်းၵၢင်ၼႂ် 10 မူင်းပၢႆ ၸၢႆးၵျေႃႇသူဝ်းတူႇ ဢႃယု 10 ၶူပ်ႇ ၵူၼ်းၼမ်ႉၶမ်း ဢၼ် ပၢႆႈၽေးသိုၵ်း ၵႂႃႇသွၼ်ႈဝႆႉတီႈဝဵင်းမိူင်းမၢဝ်း ၸိုင်ႈမိူင်းၶႄႇၼၼ်ႉ မၼ်းၸၢႆး ပၼ်ႇရူတ်ႉထိပ်ႇလူမ်းသေ လႆႈဢဝ်တီႈယိပ်းမိုဝ်းရူတ်ႉထိပ်ႇၼၼ်ႉ တႅင်းသႂ်ႇ တီႈပုမ်မၼ်းၸၢႆး ႁဵတ်းႁႂ်ႈသႆႈလူင် လႆဢွၵ်ႇမႃးတၢင်းၼွၵ်ႈ ယၢမ်းလဵဝ် လႆႈယူတ်းယႃတူဝ်ဝႆႉတီႈႁူင်းယႃလူင် ဝဵင်းမိူင်းမၢဝ်း ၼႆယဝ်ႉ။

ၵူၼ်းဝဵင်းၼမ်ႉၶမ်း လၢတ်ႈတီႈၽူႈတွႆႇႁွၵ်ႈဝႃႈ – “ၶဝ်ပေႃႈလုၵ်ႈ ပၢႆႈၽေးသိုၵ်းသေ ၵႂႃႇႁႃႁဵတ်းၵၢၼ်ၼႂ်း မိူင်း မၢဝ်း တီႈဝၢၼ်ႈဝဵင်းၼၼ်ႉ ၵေႃႉပဵၼ်လုၵ်ႈၸၢႆး – ၸၢႆးၵျေႃႇသူဝ်းတူႇၼႆႉသမ်ႉ ဢဝ်ရူတ်ႉထိပ်ႇဢွၵ်ႇ ႁိူၼ်း ၵႂႃႇပၼ်ႇလဵၼ်ႈၸွမ်းတၢင်းသေ တေပၼ်ႇဝႆးႁိုဝ် ဢမ်ႇႁူႉ ဢဝ်ရူတ်ႉထိပ်ႇမၼ်းၸၢႆး ၵႂႃႇလေႃႈသႂ်ႇသေမဵဝ်းမဵဝ်းသေ လူမ်ႉၵႂႃႇ ယဝ်ႉၵေႃႈ ဢဝ်တီႈယိပ်းမိုဝ်း (လဵၵ်း) ရူတ်ႉထိပ်ႇၼၼ်ႉ တႅင်းသႂ်ႇတီႈပုမ်မၼ်းၸၢႆး ထိုင်တီႈဢဝ်သႆႈလူင် လႆဢွၵ်ႇမႃးတၢင်းၼွၵ်ႈ ဢေႃႈ။ ယၢမ်းလဵဝ် လူဝ်ႇတၢင်းၸွႆႈထႅမ် ၵႃႇယူတ်းယႃမၼ်းၸၢႆး ၶႃႈဢေႃႈ”- ဝႃႈၼႆ။

ၸၢႆးၵျေႃႇသူဝ်းတူႇ ဢႃယု 10 ၶူပ်ႇၼႆႉ ပဵၼ်လုၵ်ႈၸၢႆး လုင်းဢၢႆႈဢူးလႄႈ ပႃႈၼူၼ်း ပဵၼ်ၵူၼ်းပွၵ်ႉဢွင်ႇမင်ႇၵလႃႇ ဝဵင်းၼမ်ႉၶမ်း မၼ်းၸၢႆး ပဵၼ်ပီႈဢၢႆႈလူင် မီးၼွင်ႉၸၢႆးဝႆႉထႅင်ႈၵေႃႉၼိုင်ႈ တေမီးဢႃယု 7 ၶူပ်ႇ ဝႃႈၼႆ။

“မိူဝ်ႈလဵဝ် ၵႃႈယူတ်းယႃ မၼ်းၸၢႆးၼႆႉ လႆႈၸႂ်ႉၸၢႆႇၵႂႃႇ ငိုၼ်းၶႄႇ 15,000 ယႂၼ်ယဝ်ႉလႄႈ ယူႇတီႈ ပေႃႈ မႄႈမၼ်းၸၢႆးသမ်ႉ ၵူၺ်းပဵၼ်ႁႅင်းၵၢၼ်ယၢၼ်မိူင်း ဢၼ်ပၢႆႈၽေးသိုၵ်းၵႂႃႇသွၼ်ႈဝႆႉ ၸွမ်းႁိူၼ်းပီႈၼွင်ႉ ၶဝ် တီႈမိူင်းမၢဝ်းၵူၺ်းလႄႈ ယၢမ်းလဵဝ် လူဝ်ႇတၢင်းၸွႆႈထႅမ် ငိုၼ်းတွင်းၵႃႈယူတ်းယႃ မၼ်းၸၢႆးၶႃႈဢေႃႈ”- ၵူၼ်းဝဵင်းၼမ်ႉၶမ်း သိုပ်ႇလၢတ်ႈၼႄၼင်ႇၼႆ။

ယၢမ်းလဵဝ် ယွၼ်းတၢင်းၸွႆႈထႅမ်ထိုင် တီႈၽူႈမီးၼမ်ႉၸႂ်ၸေႇတႃႇၼ တီႈၸမ်ၵႆ ႁႂ်ႈၸွႆႈၵမ်ႉထႅမ်ပၼ် ၵႃႈ ယူတ်းယႃ ၸၢႆးၵျေႃႇသူဝ်းတူႇၼႆႉသေၵမ်း ၵပ်းသိုပ်ႇၸွႆႈထႅမ်လႆႈတီႈ ၼၢင်းၼုမ်ႇသႅင်ၸိင်ႇ ၵေႃႉပဵၼ်ပႃႈ ၸၢႆးၵျေႃႇသူဝ်းတူႇ မၢႆ ၾူၼ်း (မၢၼ်ႈ) 09680677729 လႄႈ ၸၢႆးသိူဝ်ႁၢၼ် ၸုမ်းတႆးၽွမ်ႉၵၼ် မၢႆၾူၼ်း (မၢၼ်ႈ) 09960217636 ၼႆႉ ဝႃႈ ၼႆ။