ၾႆးမႆႈ ၵွင်မႆႉသၵ်း ဢၼ်လုၵ်ႉတၢင်းမိူင်းတႆး မိူင်းႁူမ်ႈတုမ်သေ တေႃႉသူင်ႇဢွၵ်ႇၶၢႆၸူး တီႈဝဵင်းမိူင်းမၢဝ်း ၼႂ်းမိူင်းၶႄႇၼၼ်ႉ ထုၵ်ႇၾႆးမႆႈ ပဵၼ်ၽဝ်ႇမူတ်း မီးလွင်ႈလူႉသုမ်းၼပ်ႉႁူဝ်မိုၼ်ႇလၢၼ်ႉယႂၼ်ႊ ဝႃႈၼႆ။

မိူဝ်ႈဝႃး ဝၼ်းတီႈ 25/4/2023 တႄႇဢဝ် ယၢမ်းဝၢႆးဝၼ်းမွၵ်ႈ 4 မူင်း တေႃႇထိုင် 12 မူင်းၵၢင်ၶိုၼ်း ၾႆးမႆႈ ၵွင်မႆႉသၵ်း တီႈ ပၢင်ႇဝၢင်းမႆႉ ဢၼ်မီးဝႆႉၾၢႆႇၼိူဝ်မၢၼ်ႈလႅင်ႉ – လွႆပၢင်ႇပုင်ႇ ၼႂ်းဝဵင်းမိူင်းမၢဝ်း ၼႃႈလိၼ်ၽွင်းငမ်းတူဝ်ၵဝ်ႇ ဢိူင်ႇတႂ်ႈၶူင်း ၸိုင်ႈမိူင်းၶႄႇၼၼ်ႉ မီးလွင်ႈလူႉသုမ်း ၼပ်ႉႁူဝ်မိုၼ်ႇတၼ်ႊ ငိုၼ်းႁူဝ်မိုၼ်ႇလၢၼ်ႉယႂၼ်ႊ ၼႆယဝ်ႉ။  

ၵူၼ်းပိုၼ်ႉတီႈ ဝဵင်းမိူင်းမၢဝ်း လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈဢေႃႈ ၾႆးမႆႈ ၵွင်မႆႉသၵ်းလႄႈ မႆႉၵူႈသႅၼ်း ဢၼ်မီးၵႃႈၶၼ်ယႂ်ႇ။ မႆႉၼႆႉ လုၵ်ႉတၢင်းမိူင်းတႆး မိူင်းႁူမ်ႈတုမ် တေႃႉၶဝ်ႈမႃး။ ၵွၼ်ႇၽၵ်းတူမိူင်းပႆႇပိၵ်ႉ ပႆႇပဵၼ်တၢင်းပဵၼ်ၶူဝ်ႊဝိတ်ႉ 19 ပုၼ်ႉယဝ်ႉ ၊ ႁိုင် 7-8 ပီယဝ်ႉ။ ၵွင်ဝႆႉတၢတ်ႇလႅတ်ႇတၢတ်ႇၾူၼ်ဝႆႉ ၸိူင်ႉၼၼ်။ ယွၼ်ႉသင်လႄႈမႆႈ ဢၼ်ဝႃႈၼၼ်ႉတႄႉ ဢမ်ႇ လႆႈႁူႉ ငဝ်ႈႁၢၵ်ႈလွင်ႈတၢင်းမၼ်းၶႃႈ။ ဢွင်ႈတီႈၼၼ်ႈ ပဵၼ်ဢွင်ႈတီႈပၢင်ႇဝၢင်းမႆႉ ၵႂၢင်ႈယႂ်ႇႁႅင်းၼႃႇ။ ၸဝ်ႈၶွင်မၼ်းတႄႉ ပဵၼ် လၢဝ်းပၢၼ်းၶႄႇတင်း ၶၢင်ၼႆၶႃႈဢေႃႈ။ လွင်ႈလူႉသုမ်းတႄႉ မွၵ်ႈငိုၼ်းၶႄႇမိုၼ်ႇလၢၼ်ႉ ၼႆယဝ်ႉ။ ပႃးဢဝ် တၼ်ႊမၼ်းဝႃႈၸိုင် တေဢမ်ႇယွမ်းမိုၼ်ႇတၼ်ႊၼႆႉၶႃႈ”- ဝႃႈၼႆ။

မိူဝ်ႈၽွင်း ၾႆးမႆႈယူႇၼၼ်ႉ ယူႇတီႈ ၸဝ်ႈၼႃႈတီႈၾၢႆႇၶႄၾႆး တၢင်းမိူင်းမၢဝ်း ဢဝ်ၵႃးမႃးႁူတ်းၸွႆႈၵေႃႈ ဢမ်ႇၶႄလႆႈ ယွၼ်ႉၾႆး လၢမ်ႈမႆႈႁႅင်း။ မႆႉၸိူဝ်းၼၼ်ႉသမ်ႉပဵၼ်မႆႉႁႅင်ႈ တင်းၼမ်။ ၵွင်မႆႉ ဢၼ်ထုၵ်ႇၾႆးမႆႈၼၼ်ႉ တေပဵၼ်မႆႉသၵ်းလႄႈ မႆႉမီးၵႃႈၶၼ်ယႂ်ႇ လွၼ်ႉလွၼ်ႉ။

ၵွင်မႆႉၼၼ်ႉ တေႃႇထိုင်မိူဝ်ႈၼႆႉ ဝၼ်းတီႈ 26 ယၢမ်းၵၢင်ၼႂ် ၾႆးတိုၵ်ႉမႆႈယူႇ ပႆႇမွတ်ႇမူတ်း။ မႆႉၸိူဝ်းမႆႈၵႂႃႇ ၼၼ်ႉ ယၢမ်းလဵဝ် ပဵၼ်ၽဝ်ႇပႅတ်ႈမူတ်းယဝ်ႉ ၵူၼ်းပိုၼ်ႉတီႈ မိူင်းမၢဝ်းလၢတ်ႈ။