တပ်ႉသိုၵ်းမိူင်းၾိလိပ်ႉပိၼ်းသ်လႄႈ မိူင်းဢမေႊရိၵၼ်ႊ ႁူမ်ႈၵၼ်သေ ၾိုၵ်းၵၢၼ်သိုၵ်း ၼႂ်းၼႃႈၼမ်ႉပၢင်ႇလၢႆႇၶႄႇၸၢၼ်း ပဵၼ်ပွၵ်ႈၵမ်းထူၼ်ႈသွင်ၼႆ တပ်ႉသိုၵ်းမိူင်းၾိလိပ်ႉပိၼ်းသ် ပိုၼ်ၽၢဝ်ႇ ဝၼ်းတီႈ 21/05/2025 ၼင်ႇၼႆ။

ၾၢႆႇတပ်ႉသိုၵ်းၾိလိပ်ႉပိၼ်းသ်တႄႉ ပိုၼ်ၽၢဝ်ႇဝႆႉဝႃႈ – ပၢင်ၾိုၵ်းသိုၵ်းၼႆႉ ႁဵတ်းတီႈၾင်ႇၼမ်ႉလိုၵ်ႉ ပႃႊလႃႊဝၼ်ႊလႄႈ မိၼ်ႊၻူဝ်ႊရူဝ်ႊ ၊ ၾၢႆႇတၢင်းၾိလိပ်ႉပိၼ်းသ် မီးတပ်ႉလိၼ်၊ တပ်ႉၼမ်ႉလႄႈ တပ်ႉလူမ်းၶဝ်ႈႁူမ်ႈ။ ၾၢႆႇတၢင်းသိုၵ်းဢမေႊရိၵၼ်ႊသမ်ႉ တပ်ႉႁိူဝ်းသၢင်းၽေႃး ၊ တပ်ႉႁူမ်ႇလူမ်ႈၾင်ႇပၢင်ႇလၢႆႇ ၸိူဝ်းၼႆႉၵေႃႈမႃးၶဝ်ႈႁူမ်ႈ။ ႁူမ်ႈၵၼ်ၾိုၵ်း လွင်ႈတႃႇႁူမ်ႈၵၼ်ၵႅတ်ႇၶႄ လိၼ်ဝၢၼ်ႈမိူင်း၊ ၵၢၼ်ၵပ်းသိုပ်ႇၵပ်းသၢၼ်၊ ၾၢႆႇသေႃႉႁႃ၊ ၾၢႆႇၸွႆႈထႅမ် ၸဵမ်ၸိူဝ်းၼႆႉ။

ၾိလိပ်ႉပိၼ်းသ်လႄႈ ဢမေႊရိၵၼ်ႊ မိူင်းဢူၺ်းလီၵၼ်ၼႆႉ ပီဢွၼ် 2023 ၼႆႉ ၾိုၵ်းၵၢၼ်သိုၵ်း ၸွမ်းၵၼ်ၵမ်းၼိုင်ႈယဝ်ႉ။   

ၼႃႈၼမ်ႉပၢင်ႇလၢႆႇၶႄႇၸၢၼ်းၼႆႉ မိူင်းၶႄႇ ၊ ဝီႊယႅတ်ႊၼၢမ်ႊ၊ ၾိလိပ်ႉပိၼ်းသ်၊ ထၢႆႊဝၼ်ႊ၊ မလေးသျႃးလႄႈ ပရူႊၼၢႆႊၶဝ် မီးလွင်ႈၶဵင်ႇတႃႉ ႁိမ်ၵၼ်သေမီးပၼ်ႁႃဝႆႉ။ ၾိလိပ်ႉပိၼ်းသ်လႄႈ ၶႄႇၵေႃႈ တိုၵ်ႉႁိမ်ၵၼ်သဵၼ်ႈတၢင်းၵၢၼ် ၵႃႉၶၢႆတၢင်းၼမ်ႉ။ ၼိုင်ႈပီမီးငိုၼ်းၶဝ်ႈၸိုင်ႈမိူင်း 3 သႅၼ်လၢၼ်ႉတေႃႊလႃႊ။ ဝၢႆးလင် ပၢင်ၾိုၵ်းၵၢၼ်သိုၵ်းၼႆႉ လွင်ႈၶဵင်ႈၶႅင်လႅပ်ႈ တေႁၢႆႉႁႅင်းမႃးလိူဝ်ၵဝ်ႇ ၵူၼ်းပၵ်းတႃၵၢၼ်လုမ်ႈၾႃႉ ၶဝ်ထတ်းသၢင်ၼင်ႇၼႆ။

လွင်ႈမိူင်းၶႄႇ ၶႂ်ႈလႆႈသဵၼ်ႈတၢင်းၵႃႉၶၢႆၼႆႉ လုမ်းတြႃးလုမ်ႈၾႃႉ တႅပ်းတတ်းဝႆႉဝႃႈ ဢမ်ႇမႅၼ်ႈ ၵၼ်တင်းပိူင်လုမ်ႈၾႃႉဝႃႈၼႆသေတႃႉ ၶႄႇၵေႃႈဢမ်ႇထွမ်ႇဢမ်ႇဝႆႉၼၵ်း။ တိုၵ်ႉတွပ်ႇထဵင်ဝႃႈ ပဵၼ်ၼႃႈတီႈဢၼ်ၶႄႇၽွင်းငမ်း ၼႆယူႇမႅၵ်းမႅၵ်း – သိုဝ်ႇၶၢဝ်ႇ CNA ဢွၵ်ႇဝႆႉၼင်ႇၼႆ။