လုင်းဢိင်ႇတၵ ၵူၼ်းပၢႆႈၽေးသိုၵ်းတီႈၵျွၵ်ႉမႄး ၵေႃႉဢၼ်ယဵပ်ႇၺႃးမၢၵ်ႇမႅင်းတႅၵ်ႇသႂ်ႇ ၸၢၵ်ႇမၢၵ်ႇတိူဝ်ႉၶမ်ဝႆႉ ၸွမ်းၶႃ ႁိုင်ၶၢဝ်းတၢင်းပီပၢႆၼၼ်ႉ ယၢမ်းလဵဝ် ၸဵပ်းလိူဝ်ႁႅင်း ဢမ်ႇၸၢင်ႈပႆလႆႈ၊ ၶႂ်ႈဢဝ်ၸၢၵ်ႇမၢၵ်ႇဢွၵ်ႇယူႇၵေႃႈဢမ်ႇမီးငိုၼ်းတွင်းၵႃႈယူတ်းယႃ  ။

လုင်းဢိင်ႇတၵ ဢႃယု 50 ပၢႆ ၵူၼ်းဝၢၼ်ႈပၢင်တွင်း ဢိူင်ႇပၢင်ႁူႈ ၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ ယဵပ်ႇၺႃးမၢၵ်ႇမႅင်းၾင်လိၼ်တႅၵ်ႇတိူဝ်ႉသႂ်ႇၽွင်းပၢင်တိုၵ်းလိူင်ႇပီၵၢႆ 2021 ။ တေႃႇထိုင်ယၢမ်းလဵဝ် ၸၢၵ်ႇမၢၵ်ႇတိုၵ်ႉ ၶမ်ဝႆႉ ၸွမ်းၶႃလူင်၊ မၢၵ်ႇၵၢဝ်ႈလႄႈ တႃတိၼ် ၸိူဝ်းၼႆႉသေ ၸဵပ်းၵႅၼ်းႁႅင်း မိူဝ်ႈၽွင်းပႆ၊ ၼွၼ်း၊ ၼင်ႈ ၊ ဢမ်ႇၸၢင်ႈၵႂႃႇမႃးႁႃၵိၼ်လဵင်ႉတွင်ႉ လဵင်ႉၼႃႈႁိူၼ်းလႆႈ။ မေႃယႃလၢတ်ႈဝႃႈတေလႆႈၸႂ်ႉငိုၼ်းတွင်းဢမ်ႇယွမ်း 10 သႅၼ်ပျႃးၼႆလႄႈယၢမ်းလဵဝ် ယၢပ်ႇၽိုတ်ႇတႃႇဢဝ်ၸၢၵ်ႇမၢၵ်ႇဢွၵ်ႇ။

ၽူႈၸွႆႈထႅမ် ၵူၼ်းပၢႆႈၽေးသိုၵ်း တီႈဝဵင်းၵျွၵ်ႉမႄး လၢတ်ႈတီႈၽူႈတွႆႇႁွၵ်ႈဝႃႈ – “ၸၢၵ်ႇမၢၵ်ႇၼႆႉ ၶမ်ဝႆႉ 3 တီႈ တီႈၶႃလူင်၊ မၢၵ်ႇ ၵၢဝ်ႈလႄႈ တႃတိၼ်။ မၢၵ်ႇၼႆႉ မၼ်းၶမ်ႁိုင်ၼႃႇယဝ်ႉ ပႆႇၸၢင်ႈဢဝ်ဢွၵ်ႇမူတ်း။ ယၢမ်းလဵဝ် ပေႃးပႆတၢင်းၼႆ တေၸဵပ်းႁႅင်း၊ ၼင်ႈ၊ ၼွၼ်း ၸိူဝ်းၼႆႉ ယၢပ်ႇႁႅင်း။ မေးမၼ်းသမ်ႉတႃမူဝ်းဝႆႉ ၊ ယၢပ်ႇၽိုတ်ႇတႃႇႁႃလဵင်ႉၵၼ်ၶႃႈဢေႃႈ။   ၵွပ်ႈၼႆလူဝ်ႇတၢင်းၸွႆႈထႅမ်ႁႅင်းတႄႉတႄႉၶႃႈဢေႃႈ ပေႃးၽႃႇတတ်းၼႆ တေလႆႈသူင်ႇ ၽႃႇတတ်းတီႈဝဵင်းလႃႈသဵဝ်ႈလႄႈ တင်းၵႃႈၽႃႇတတ်း၊ ၵႃႈၸရိတ်ႈတၢင်း ၸိူဝ်းၼႆႉ တေသဵင်ႈငိုၼ်း ဢမ်ႇယွမ်း 10 သႅၼ် ပျႃးၶႃႈ”- ဝႃႈၼႆ။

လုင်းဢိင်ႇတၵၼႆႉ ပဵၼ်ၵူၼ်းဝၢၼ်ႈပၢင်တွင်း ဢိူင်ႇပၢင်ႁူႈ တႄႇၼႃႈႁိူၼ်း ၵိုၵ်းၸွမ်း ပႃႈၼၢင်းသႅင်မူၼ်း မီးလုၵ်ႈ ႁူမ်ႈၵၼ် ၵေႃႉၼိုင်ႈ   ႁဵတ်းၵၢၼ်သူၼ်ႁႆႈ။  မိူဝ်ႈပီ 2021 ၼၼ်ႉ ယွၼ်ႉၸုမ်းယိပ်းၵွင်ႈၵၢင်ႇ ၸၢဝ်းၶိူဝ်း ၼႂ်းမိူင်းတႆး ပိုတ်းယိုဝ်းၵၼ် ႁၢဝ်ႈႁႅင်း။ မၢၵ်ႇဢၼ်တႅၵ်ႇတိူဝ်ႉသႂ်ႇ လုင်းဢိင်ႇတၵၼၼ်ႉ ပဵၼ်မၢၵ်ႇၽႂ် ၸုမ်းလႂ် ႁၢင်ႈၵၢင်ဝႆႉတႄႉ ဢမ်ႇႁူႉ။ တေႃႇထိုင်ယၢမ်း လဵဝ် ပႆႇႁူႉ ယဝ်ႉၵေႃႈ ပႆႇမီးၽႂ်မႃးယွမ်းႁပ်ႉဢဝ်ပုၼ်ႈၽွၼ်း။

ယၢမ်းလဵဝ် လုင်းဢိင်ႇတၵလႄႈ ပႃႈၼၢင်းသႅင်မူၼ်း ပၢႆႈၽေးသိုၵ်း မႃးသွၼ်ႈယူႇဝႆႉ တီႈမၢၼ်ႈႁႆး ၵိင်ႇၽႄၸႄႈဝဵင်းမိူင်းငေႃႉ ၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ။ ႁဵတ်းသုမ်ႉလဵၵ်ႉလဵၵ်ႉဢွၼ်ႇသေ မုင်းဝႆႉ ၽႃႈယၢင် မၢင်မၢင်ဢွၼ်ႇ။ ၵင်ႈၽႃလၢႆး ဝႆႉ ပေႃးၾူၼ်တူၵ်းႁႅင်းၼႆ ဢမ်ႇလွတ်ႈၾူၼ် ယမ်းပႃးၶူဝ်း ၸိူဝ်းၼႆႉ။