ဝဵင်းမိူင်းမၢဝ်း ၼႃႈလိၼ်ၽွင်းငမ်းတူဝ်ၵဝ်ႇ ၼႂ်းဢိူင်ႇတႂ်ႈၶူင်း ပိုတ်ႇ Lockdown ယဝ်ႉသေတႃႉ တိုၵ်ႉ ပိုၼ်ၽၢဝ်ႇ ပဵၼ်ငဝ်းလၢႆး ၶိုၵ်ႉၶၵ်ႉဝႆႉယူႇ ယွၼ်ႉမၢင်ဝၢၼ်ႈ တိုၵ်ႉမီးၵူၼ်းပဵၼ်ယူႇလႄႈ ပႆႇပိုတ်ႇမူတ်း။

မိူဝ်ႈဝၼ်းတီႈ 1/10/2022 ပူၼ်ႉမႃးၼႆႉ ယူႇတီႈလူင်ပွင်ၸိုင်ႈၶႄႇ ပိုၼ်ၽၢဝ်ႇပိုတ်ႇ Lockdown ၼႂ်းဝဵင်းမိူင်းမၢဝ်း ၼႃႈလိၼ် ၽွင်းငမ်းတူဝ်ၵဝ်ႇ ၼႂ်းဢိူင်ႇတႂ်ႈၶူင်း ၸိုင်ႈမိူင်းၶႄႇယဝ်ႉ ၵူၺ်းၵႃႈ မၢင်ဝၢၼ်ႈတႄႉ တိုၵ်ႉသိုပ်ႇပိၵ်ႉဢိုတ်းဝႆႉထႅင်ႈယူႇ ပႆႇပိုတ်ႇ မူတ်း ယွၼ်ႉတိုၵ်ႉမီးၵူၼ်းပဵၼ်ဝႆႉယူႇ ဝႃႈၼႆ။

ၵူၼ်းဝဵင်းမိူင်းမၢဝ်း လၢတ်ႈတီႈၽူႈတွႆႇႁွၵ်ႈဝႃႈ – “လွၵ်ႊတွင်ႊတႄႉ ၶဝ်ပိုၼ်ၽၢဝ်ႇပိုတ်ႇယဝ်ႉ။ ၵူၺ်းၵႃႈ တိုၵ်ႉပိုၼ်ၽၢဝ် ပဵၼ် ငဝ်းလၢႆးၶိုၵ်ႉၶၵ်ႉဝႆႉယူႇ ယွၼ်ႉဝႃႈ မၢင်ဝၢၼ်ႈ တိုၵ်ႉမီးၵူၼ်းပဵၼ်ဝႆႉယူႇလႄႈ တိုၵ်ႉသိုပ်ႇပိၵ်ႉဢိုတ်းဝႆႉယူႇ ပႆႇပိုတ်ႇမူတ်း။ ယဝ်ႉၵေႃႈ တႄႇဢဝ် ဝၼ်းတီႈ 2 တေႃႇထိုင် 31 လိူၼ်ၼႆႉသဵင်ႈ တိုၵ်ႉပိုၼ်ၽၢဝ်ႇ ပဵၼ်ငဝ်းလၢႆးၶိုၵ်ႉၶၵ်ႉဝႆႉ”- ဝႃႈၼႆ။

ၽွင်းငဝ်းလၢႆး ပိုၼ်ၽၢဝ်ႇ ၶိုၵ်ႉၶၵ်ႉၼႆႉ တေဢမ်ႇလႆႈၶွၼ်ႈတုမ်ၵၼ်ၼမ်၊ ပေႃးဢွၵ်ႇတၢင်းၼွၵ်ႈ တေလႆႈသႂ်ႇၽႃႈတူမ်းသူပ်း (Mask)၊ ႁႂ်ႈယွမ်းလူင်းၵႂႃႇ တီႈၵူၼ်းၵိုၼ်းၶွၼ်ႈၼမ်၊ လၢၼ်ႉတၢင်းၵိၼ်ယႅမ်ႉ၊ လၢၼ်ႉၶဝ်ႈၽၵ်း ၸိူဝ်းၼႆႉ တေဢမ်ႇပၼ်ၶႂၢင်ႉ ၼင်ႈၵိၼ် ၼႂ်းလၢၼ်ႉ တေလႆႈၸွၵ်း/ ႁေႃႇ မိူဝ်းၵိၼ်တီႈႁိူၼ်းယေးၽႂ်မၼ်း၊ သင်ဝႃႈ ဢမ်ႇမီးလွင်ႈတၢင်းလမ်ႇလွင်ႈ သင်ၸိုင် ယႃႇပေဢွၵ်ႇတၢင်းၼွၵ်ႈႁိူၼ်း ၸိူဝ်းၼႆႉ။

မူႇဝၢၼ်ႈ ၸိူဝ်းပႆႇပိုတ်ႇ တိုၵ်ႉလွၵ်ႊတွင်ႊဝႆႉၼၼ်ႉ မိူၼ်ၼင်ႇ မၢၼ်ႈတႅၼ်ႈလူင်၊ ၵွင်းၼႃး၊ ႁူဝ်ၽၢႆ၊ တိုင်းမူႉ၊ ဢၢဝ်ႇသိၼ်ႊသိုဝ်ႇ ၵျီႇ၊ မၢဝ်းသႅင်သိူဝ်ႇသီႊ၊ လွႆဝဵင်း၊ ၼွင်သႅင် ၸိူဝ်းၼႆႉ တေပိၵ်ႉဢိုတ်းၵႂႃႇထႅင်ႈ တႃႇ 7 ဝၼ်း သင်ဢမ်ႇၵူတ်ႇထတ်းႁၼ် တၢင်း ပဵၼ်ၸိူဝ်ႉမႅင်း။

ၸူဝ်ႈဝဵင်းမိူင်းမၢဝ်း တႄႇလွၵ်ႊတွင်ႊမႃးၼႆႉ မိူဝ်ႈဝၼ်းတီႈ 24/9/2022 ၼၼ်ႉသေ တေႃႇထိုင်ယၢမ်းလဵဝ် ၵူတ်ႇထတ်းႁၼ် ၵူၼ်းတိတ်းၸပ်း ၸိူဝ်ႉမႅင်းတၢင်းပဵၼ်ၶူဝ်ႊဝိတ်ႉ 19 ၸိူဝ်းဢွၵ်ႇၾၢင်ႁၢင်ႈပဵၼ် မီး 10 ပၢႆ၊ ၸိူဝ်းဢမ်ႇဢွၵ်ႇၾၢင်ႁၢင် တေမီး မွၵ်ႈ 70 ။ မိူဝ်ႈဝၼ်းတီႈ 2/10/2022 ၼႆႉ ၵူတ်ႇထတ်းႁၼ်ထႅင်ႈ 7 ၵေႃႉ ၼႆယဝ်ႉ။

ဝဵင်းမိူင်းမၢဝ်း ၼႃႈလိၼ်ၽွင်းငမ်းတူဝ်ၵဝ်ႇ ၼႂ်းဢိူင်ႇတႂ်ႈၶူင်း ၸိုင်ႈမိူင်းၶႄႇၼႆႉ မိူဝ်ႈဝၼ်းတီႈ 16/9/2022 – 21/9/2022 ၼၼ်ႉ  လွၵ်ႊတွင်ႊမႃးယဝ်ႉ ၵမ်းၼိုင်ႈ၊ ၶိုၼ်းပိုတ်ႇလွၵ်ႊတွင်ႊတၼ်းလႆႈ 2 ဝၼ်း ထိုင်မႃးဝၼ်းတီႈ 24/9/2022 ယၢမ်းၵၢင် ၶိုၼ်း 12 မူင်း သင်ႇပိၵ်ႉဢိုတ်းလွၵ်ႊတွင်ႊထႅင်ႈ တေႃႇထိုင်လိူၼ်သဵင်ႈ ၼႆယဝ်ႉ။