မိူဝ်ႈဝႃး ဝၼ်းတီႈ 29/9/2022 သိုၵ်းမၢၼ်ႈလႄႈ ၸုမ်းသိုၵ်း KIA၊ PDF ယိုဝ်းၵၼ်ၼႂ်းၸႄႈဝဵင်း မၢၼ်ႈတူင်ႈ ၸိုင်ႈတႆးပွတ်းႁွင်ႇ မၢၵ်ႇၵွင်ႈတိူဝ်ႉႁိူၼ်းယေးၵူၼ်းဝၢၼ်ႈ ဢမ်ႇၸၢင်ႈဢွၵ်ႇၵႂႃႇ ႁဵတ်းၵၢၼ်ႁႃၵိၼ်လဵင်ႉတွင်ႉ။

သိုၵ်း KIA၊ PDF  ၶဝ်ႈယိုဝ်းႁူင်းပလိၵ်ႈ ဢၼ်မီးတီႈပွၵ်ႉမၢၼ်ႈၵၢင်။ ပၢင်တိုၵ်းပဵၼ်ႁႅင်း တေႃႇထိုင် ယၢမ်းႁူဝ်ၶမ်ႈ။ပဵၼ်ၸမ်ႁိမ်းဝၢၼ်ႈလႄႈၵူၼ်းမိူင်းဢမ်ႇၸၢင်ႈဢွၵ်ႇႁိူၼ်းယေး။

ၵူၼ်းဝဵင်းမၢၼ်ႈတူင်ႈ ၵေႃႉၼိုင်ႈလၢတ်ႈဝႃႈ-“တီႈတပ်ႉပလိၵ်ႈမၢၼ်ႈၵၢင်ၼၼ်ႉ ပလိၵ်ႈ မီး 3 ၵေႃႉၵူၺ်း။ ၶဝ်ၵေႃႈဢမ်ႇယူႇတီႈၼၼ်ႈ ႁိုင်ၼႃႇယဝ်ႉ။ ၵူၺ်းၵႃႈ သိုၵ်းမၢၼ်ႈမႃးၶိုၼ်းယိုဝ်းတွပ်ႇ။ ၸၢၵ်ႇမၢၵ်ႇတိူဝ်ႉသႂ်ႇႁိူၼ်းယေးၵူၼ်းဝၢၼ်ႈၵေႃႈ မီးၼမ်ဢေႃႈ။ ၵူၺ်းဢမ်ႇလႆႈႁူႉတႅတ်ႈတေႃး”- ဝႃႈၼႆ။

 မိူဝ်ႈဝၼ်းတီႈ 28 ၼၼ်ႉၵေႃႉ သိုၵ်းမၢၼ်ႈလႄႈ KIA၊ PDF ယိုဝ်းၵၼ်တီႈ ဝၢၼ်ႈၵုင်းၵယႃး ၸႄႈဝဵင်းၼမ်ႉတူႈ။ ဝၼ်းၼၼ်ႉယၢမ်းၵၢင်ၶမ်ႈ သိုၵ်း KIA၊ PDF ၶဝ်ႈယိုဝ်းတပ်ႉပၢင်သဝ်းသိုၵ်းမၢၼ်ႈ ႁူဝ်ဝဵင်းၼမ်ႉတူႈ။

 ၵူၼ်းဝၢၼ်ႈ ၵုင်းၵယႃး ႁူဝ်ၵူၼ်း 275 ၵေႃႉ 96 လင်ၶႃးႁိူၼ်း လႆႈပၢႆႈယၢၼ်ႁိူၼ်းယေးတီႈယူႇသေ ၵႂႃႇသွၼ်ႈယူႇတီႈၵျွင်းမုၼ်ၸဝ်ႈ ပုပ်ႉပႃႇယူင်ႇ ဝဵင်းၼမ်ႉတူႈ။ ယၢပ်ႇၽိုတ်ႇလွင်ႈၵိၼ်ယမ်ႉ ။

 ၼႂ်းဝူင်ႈၼႆႉ သိုၵ်းမၢၼ်ႈလႄႈ KIA၊ PDF ၵမ်းၵမ်းယိုဝ်းၵၼ်ၼႂ်းၸႄႈဝဵင်း ၼမ်ႉတူႈ၊ သႅၼ်ဝီ၊ ၵူတ်ႉၶၢႆ ။ ၵူၼ်းမိူင်းဢမ်ႇၸၢင်ႈၵႂႃႇႁဵတ်းၵၢၼ်ႁႃၵိၼ်လဵင်ႉတွင်ႉ ။