Friday, March 29, 2024

သိုၵ်း SSPP – RCSS ယိုဝ်းၵၼ် တီႈဝဵင်းလၢႆးၶႃႈ

Must read

သိုၵ်း RCSS – SSPP ယိုဝ်းၵၼ် တီႈၸႄႈဝဵင်းလၢႆးၶႃႈ ၵူၼ်းပိုၼ်ႉတီႈ ဢွၼ်ၵၼ် ၽူင်ႉပၢႆႈၶဝ်ႈဝဵင်း ဢမ်ႇယွမ်းၵႃး 3 လမ်း။

ၵူၼ်းပၢႆၽေးသိုၵ်းတီႈမိူင်းၵိုင်
Photo CJ-ၵူၼ်းပၢႆႈၽေးသိုၵ်းတီႈလၢႆးၶႃႈ မိူဝ်ႈႁူဝ်ပီၼႆႉ (ႁၢင်ႈၵဝ်ႇ)

မိူဝ်ႈဝႃး ဝၼ်းတီႈ 28/9/2022 ယၢမ်းႁူဝ်ၶမ်ႈ သိုၵ်း SSPP တင်း RCSS ၽႃႇၺႃးၵၼ်   တီႈၶူဝ်ၼမ်ႉတွၼ် ႁိမ်းဝၢၼ်ႈမွၼ်း ၾၢႆႇႁွင်ႇဝၢၼ်ႈမၢၵ်ႇလၢင်း ယၢၼ်ဝၢၼ်ႈမၢၵ်ႇလၢင်း မွၵ်ႈ 2 လၵ်း ၼႂ်းၸႄႈဝဵင်းလၢႆးၶႃႈ သွင်ၾၢႆႇပိုတ်းယိုဝ်းတိုၵ်းတေႃးၵၼ်  ။

- Subscription -

ၵူၼ်းဝဵင်းလၢႆးၶႃႈ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ ၶဝ်သွင်ၸုမ်း ယိုဝ်းၵၼ် တေပဵၼ်ယၢမ်းႁူဝ်ၶမ်ႈ ၶၢဝ်းပိူၼ်ႈပွၵ်ႈ ၵၢၼ်ပွၵ်ႈၼႃး ၶႃႈဢေႃႈ။ ၵူၼ်းဝၢၼ်ႈ ၸိူဝ်းယူႇႁိမ်းႁွမ်းၼၼ်ႉ ဢွၼ်ၵၼ်ၽူင်ႉပၢႆႈၶဝ်ႈဝဵင်း ၵႃး 3 လမ်း ႁူဝ်ၵူၼ်း 33 ၵေႃႉ မႃးသွၼ်ႈဝႆႉ တီႈဝတ်ႉဝႃႇသူဝ်ႇလႄႈ ဝတ်ႉႁူဝ်ၽၢႆ ၵမ်ႈၼမ် ပဵၼ်ပီႈၼွင်ႉၸၢဝ်းလွႆ”- ဝႃႈၼႆ။

ဢိင်ၼိူဝ် လွင်ႈပၢင်တိုၵ်း တီႈၸႄႈဝဵင်းလၢႆးၶႃႈၼႆႉသေ တေႃႇထိုင်ယၢမ်းလဵဝ် သိုၵ်းတင်းသွင်ၾၢႆႇ မီးလွင်ႈမၢတ်ႇၸဵပ်း လူႉတၢႆ ၸိူင်ႉႁိုဝ်၊ လၢႆၵေႃႉ ၸိူဝ်းၼႆႉတႄႉ ပႆႇႁူႉ။

“မိူဝ်ႈဝႃးၼႆႉ လႆႈငိၼ်းဝႃႈ သဵင်ၵွင်ႈတႅၵ်ႇ 2 တီႈ။ တၢင်းၾၢႆႇႁွင်ႇဝၢၼ်ႈမၢၵ်ႇလၢင်း ႁိမ်းဝၢၼ်ႈမွၼ်းတီႈၼိုင်ႈ။ ယၢမ်း 6 မူင်း ႁူဝ်ၶမ်ႈသမ်ႉ သဵင်ၵွင်ႈတႅၵ်ႇတၢင်းၾၢႆႇဢွၵ်ႇဝၢၼ်ႈသၢင်းထႅင်ႈ ပဵၼ်ၶဝ်သွင်ၸုမ်းၼႆႉၵူၺ်း။ လွင်ႈမၢတ်ႇၸဵပ်းလူႉတၢႆ တင်း သွင်ၾၢႆႇၼၼ်ႉတႄႉ ပႆႇႁူႉ။ ၶဝ်ပဵၼ်ပၢင်တိုၵ်းၵၼ်ၼႆႉ သၢင်ႈၵူၼ်းမိူင်းတႄႉဢေႃႈ ၵႂၢႆးသွင်တူဝ်တေႃးၵၼ် သၢင်ႈတေးၼႃး ဢၼ်ဝႃႈၼၼ်ႉယဝ်ႉ”- ၵူၼ်းဝဵင်းလၢႆးၶႃႈ သိုပ်ႇလၢတ်ႈၼႄၼင်ႇၼႆ။

ယူႇတီႈၵူၼ်းမိူင်းတႄႉ ၾၢႆႇလႂ်ၸႂ်ႉ လႄႈၾၢႆႇလႂ်ယွၼ်းၵေႃႈႁူႉၵႃႈလႆႈပၼ်၊ ယွၼ်ႉပိူဝ်ႈပဵၼ်သိုၵ်းတႆၼင်ႇၵၼ်။ ၵူၺ်းၵႃႈ ပေႃးပၼ်ၸုမ်းၼိုင်ႈသမ်ႉ ထႅင်ႈၸုမ်းၼိုင်ႈဢမ်ႇၵျိူၵ်ႈလႄႈ ထုၵ်ႇၸႂ်မီ ဢမ်ႇလီၸႂ်ၽိုင်ႈ လိုၼ်းသုတ်းၵူၼ်းမိူင်းၵူၺ်းၶိုၼ်းလႆႈယၢပ်ႇၸႂ်၊ လႆႈပၢႆႈလႆႈၼီ ၵမ်ႈၽွင်ႈထိုင်တီႈလႆႈလူႉတၢႆယွၼ်ႉၼႂ်းၵႄႈသွင်ၸုမ်းၵေႃႈမီးမႃးတင်းၼမ် – ၵူၼ်းမိူင်းထုင်ႉလၢႆးၶႃႈၵေႃႈၼိုင်ႈလၢတ်ႈၼင်ႇၼႆ။

ပူၼ်ႉမႃး မိူဝ်ႈဝၼ်းတီႈ 21/9/2022 ယၢမ်းၵၢင်ၼႂ် သိုၵ်း SSPP တင်း RCSS ယိုဝ်းၵၼ် ႁိမ်းဝၢၼ်ႈပၢင်ႇႁႆႈလႄႈ ၶူဝ်ၼမ်ႉ တွင်း ၼႂ်းဢိူင်ႇမိူင်းယၢႆး ၸႄႈဝဵင်းၵေးသီး ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း ။ ၵွပ်ႈၼႆလႄႈ ၵူၼ်းမိူင်းတုၵ်းယွၼ်း ႁႂ်ႈသွင်ၸုမ်း ႁၼ်ထိုင်ၵၢင်ၸႂ်ၵူၼ်းမိူင်းသေ ၵိုတ်းလွင်ႈၶဵင်ႇတႃႉပိုတ်းယိုဝ်းၵၼ်သေၵမ်း ဝႃႈၼႆ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း