ဝၼ်းတီႈ 28/9/2022 မိူဝ်ႈၼႆႉ လူင်ပွင်ၸိုင်ႈၶႄႇ ၼႃႈလိၼ်ၽွင်းငဝ်းတူဝ်ၵဝ်ႇတႂ်ႈၶူင်း မိူင်းမၢဝ်း ပိုၼ်ၽၢဝ်ႇဝႃႈ – ၸိူဝ်းပဵၼ်ႁႅင်းၵၢၼ်မၢၼ်ႈ ဢၼ်ၶဝ်ႈႁဵတ်းၵၢၼ် ႁႃၵၢၼ်ၼႂ်းမိူင်းၶႄႇ တင်းသဵင်ႈ တႄႇ ဝၼ်းတီႈ 29/9/2022 ၼႆႉၵႂႃႇ ႁၢမ်ႈဢွၵ်ႇၼွၵ်ႈႁိူၼ်းယေး။
တေဢွၵ်ႇၼွၵ်ႈႁိူၼ်း ၼွၵ်ႈယေး ၶဝ်ႈၵၢတ်ႇၶဝ်ႈသႃး ၵႂႃႇႁဵတ်းၵၢၼ်လႆႈမိူဝ်ႈလႂ် တေပိုၼ်ၽၢဝ်ႇ ပၼ်ထႅင်ႈၵမ်းၼိုင်ႈဝႃႈၼႆ။
ၵူၼ်းမိူင်းမၢဝ်း လၢတ်ႈတီႈၽူႈတွႆႇႁွၵ်ႈဝႃႈ – “တႄႇဢဝ် မိူဝ်ႈၽုၵ်ႈ ဝၼ်းတီႈ 29 ၵႂႃႇၼႆဢေႃႈ။ ၶဝ်ယင်းပိုၼ်ၽၢဝ်ႇပႃးထႅင်ႈဝႃႈ ပေႃးလူဝ်ႇသိုဝ်ႉ၊ လူဝ်ႇၸၢႆႇ၊ လူဝ်ႇႁဵတ်းသင်ၵေႃႈ ႁႂ်ႈ ႁဵတ်းယဝ်ႉ မိူဝ်ႈၼႆႉ မူတ်းမူတ်း ပေႃးမိူဝ်ႈၽုၵ်ႈမႃး တေဢမ်ႇလႆႈဢွၵ်ႇႁိူၼ်းယေးယဝ်ႉၼႆၶႃႈ”- ဝႃႈၼႆ။
ယၢမ်းလဵဝ် ဝဵင်းမိူင်းမၢဝ်းၼႆႉ ဢမ်ႇၸႂ်ႈဝႃႈ ပိၵ်ႉဢိုတ်းလွၵ်ႊၻွင်ႊတင်းမူတ်း၊ ၵူၺ်းပိၵ်ႉဢိုတ်း ၸိူဝ်းမူႇဝၢၼ်ႈ ဢၼ်ၵူတ်ႇထတ်း ႁၼ်ၵူၼ်းတိတ်းၸပ်းၸိူဝ်ႉမႅင်းတၢင်းပဵၼ် ဝႆႉၸိူဝ်းၼၼ်ႉၵူၺ်း ။
“ယၢမ်းလဵဝ် ၼႂ်းဝဵင်းမိူင်းမၢဝ်းၼႆႉ ထုၵ်ႇပိၵ်ႉဢိုတ်းလွၵ်ႊတွင်ႊဝႆႉ မွၵ်ႈၶိုင်ႈဝဵင်း၊ ဝၢၼ်ႈတႆး ၸွမ်းလႅၼ်လိၼ်တႆးၶႄႇ၊ ၾၢႆႇတၢင်းမိူင်းၶႄႇ တႄႉ တေမီးမွၵ်ႈ 20 ဝၢၼ်ႈၼႆႉ”- ၵူၼ်းမိူင်းမၢဝ်း သိုပ်ႇလၢတ်ႈၼႄၼင်ႇၼႆ။
ဢိင်ၼိူဝ် လွင်ႈၼႆႉ မိူဝ်ႈဝၼ်းတီႈ 26/9/2022 ၼၼ်ႉ ၼႂ်းဝဵင်းမိူင်းမၢဝ်း ၵူတ်ႇထတ်းႁၼ် ၵူၼ်းပဵၼ် ၶူဝ်ႊဝိတ်ႉထႅင်ႈ 7 ၵေႃႉ။ မိူဝ်ႈဝႃး ဝၼ်း တီႈ 27/9/2022 သမ်ႉ ၵူတ်ႇထတ်းႁၼ်ထႅင်ႈ 9 ၵေႃႉ။
