မိူဝ်ႈၼႆႉ ဝၼ်းတီႈ 21/7/2022 ယၢမ်းၵၢင်ဝၼ်း 10:50 မူင်း – 1:00 မူင်းဝၢႆးဝၼ်း ၶွင်ႇသီႇသိုၵ်းမၢၼ်ႈ ယိုတ်းမိူင်း ဢဵၼ် ႁႅင်းမွၵ်ႈ 80 ၵေႃႉတင်း သိုၵ်းၶၢင် KIA လႄႈ ၸုမ်းၵႅတ်ႇၶႄၵူၼ်းမိူင်း PDF သွင်ၾၢႆႇပဵၼ်ပၢင်တိုၵ်းၵၼ် ႁၢဝ်ႈႁႅင်း တီႈႁူဝ် ဝၢၼ်ႈမၢၵ်ႇမူင်ႈဝၢၼ် ၸဵင်ႇႁွင်ႇဝၼ်းဢွၵ်ႇ ဝဵင်းမိူင်းမိတ်ႈ ၸိုင်ႈတႆးပွတ်းႁွင်ႇ ၾၢႆႇသိုၵ်းမၢၼ်ႈ မၢတ်ႇၸဵပ်းလူႉတၢႆၼမ် ၼႆ ယဝ်ႉ။

ၵူၼ်းမိူင်းမိတ်ႈ လၢတ်ႈတီႈၽူႈတွႆႇႁွၵ်ႈဝႃႈ – “ပဵၼ်တပ်ႉမ 99 တင်းတပ်ႉၵွင် 276 – 348 ႁူမ်ႈၵၼ် ဢဵၼ်ႁႅင်းမွၵ်ႈ 80 ၵေႃႉ တင်း KIA, PDF ပဵၼ်ပၢင်တိုၵ်းၵၼ်ႁၢဝ်ႈႁႅင်း ၶၢဝ်းတၢင်း 2 ၸူဝ်ႈမူင်း တီႈႁူဝ်ဝၢၼ်ႈမၢၵ်ႇမူင်ႈဝၢၼ် ၾၢႆႇသိုၵ်းမၢၼ်ႈ မၢတ်ႇ တၢႆၼမ်။ ယွၼ်ႉၶဝ်ပဵၼ်ၾၢႆႇၶိုၼ်ႈတိုၵ်း။ တေႃႈလဵဝ် လွင်ႈမၢတ်ႇတၢႆတႄႉ ပႆႇႁူႉႁူဝ်ယွႆႈမၼ်းၶႃႈ။ ၾၢႆႇ KIA, PDF ၵေႃႈမီး လွင်ႈမၢတ်ႇလူႉတၢႆ မိူၼ်ၵၼ်”- ဝႃႈၼႆ။

ပၢင်တိုၵ်းၼႆႉ ယူႇတီႈ သိုၵ်းမၢၼ်ႈ တပ်ႉမ 99 ဢွၼ်ဢဝ်ၶလယ 276 တင်း 348 ဢဵၼ်ႁႅင်းမွၵ်ႈ 80 ၵေႃႉ လုၵ်ႉတီႈၵွင်းမူးလွႆ မဝ်ႈ ဝၢၼ်ႈသၢႆးလႅင်ၼၼ်ႉသေ မႃးတၢင်းဝၢၼ်ႈမၢၵ်ႇမူင်ႈဝၢၼ် ယူႇတီႈသိုၵ်းၶၢင် KIA, PDF ႁူမ်ႈၵၼ်သေ ပႂ်ႉပိုတ်းယိုဝ်း ဝႃႈ ၼႆ။  

“တပ်ႉမ 99 ၼႆႉ ဢၼ်ၶဝ်ထႅမ်ႁႅင်းသိုၵ်းမႃးတၢင်းမိူင်းမိတ်ႈၼႆႉ ၶဝ်လုၵ်ႉတၢင်းမၢၼ်ႈပဵင်းမႃး ဢဵၼ်ႁႅင်း 100 တႃႇၵႃး 5 လမ်း။ တႄႇဢဝ် ႁူဝ်လိူၼ်ၵျုႊလၢႆႊၼႆႉမႃး သိုၵ်းမၢၼ်ႈတင်း သိုၵ်းၶၢင် KIA, PDF ပဵၼ်ပၢင်တိုၵ်းၵၼ်မႃး ႁၢဝ်ႈႁႅင်း ၶႂ်ႈမီးၵူႈဝၼ်း လႄႈ ၼႂ်းၸႄႈဝဵင်းမိူင်းမိတ်ႈၼႆႉ ၾၢႆႇသိုၵ်းမၢၼ်ႈ မီးလွင်ႈလူႉတၢႆ မၢတ်ႇၼမ်”- ၵူၼ်းမိူင်းမိတ်ႈ သိုပ်ႇလၢတ်ႈၼႄၼင်ႇၼႆ။

လိူဝ်ၼၼ်ႉ တီႈဝၢၼ်ႈသၢႆးလႅင်ၼၼ်ႉၵေႃႈ သိုၵ်းမၢၼ်ႈတင်း KIA, PDF တိုၵ်ႉၶဵင်ႈၶႅင်ၵၢၼ်သိုၵ်းၵၼ်ဝႆႉ ႁၢဝ်ႈႁႅင်းထႅင်ႈ။

မိူဝ်ႈၼႆႉ ယၢမ်းဝၢႆးဝၼ်း 2 မူင်းၶိုင်ႈပၢႆၼႆႉ သိုၵ်းမၢၼ်ႈတင်း သိုၵ်းၶၢင် KIA, PDF ပဵၼ်ပၢင်တိုၵ်းၵၼ်ထႅင်ႈ တီႈဝၢၼ်ႈၸၢင်ႉ ၵၢင်ႇ တေႃႇထိုင်ယၢမ်းလဵဝ် သဵင်ၵွင်ႈတိုၵ်ႉတႅၵ်ႇယူႇ ပႆႇယဵၼ်။

ပၢင်တိုၵ်းတီႈမိူင်းမိတ်ႈမိူဝ်ႈၼႆႉ ယၢမ်းဝၢႆးဝၼ်း 4 မူင်းၶိုင်ႈ ၶၢဝ်းတႅမ်ႈၶၢဝ်ႇယူႇၼႆႉ လုၵ်ႈဢွၼ်ႇၸၢႆး ဢႃယု 8 ၶူပ်ႇၵေႃႉၼိုင်ႈမၢတ်ႇမၢၵ်ႇၵွင်ႈသေလူႉတၢႆ လႆႈႁူႉၼင်ႇၼႆ။ ပဵၼ်လုၵ်ႈဢွၼ်ႇၸၢႆးဝၢၼ်ႈလႂ်တိုၵ်ႉၸွပ်ႇထၢမ်တူၺ်းယူႇ ။ ပႆႇၸၢင်ႈယိုၼ်ယၼ်။