လုၵ်ႈဢွၼ်ႇၸၢႆးသွင်ၵေႃႉ ၵူၼ်းဝၢၼ်ႈပၢင်လႅင် ၸႄႈဝဵင်းၵျွၵ်ႉမႄး ၵႂႃႇႁႃမႃႉၼႂ်းသူၼ်ၼဵင်ႈ ယဵပ်ႇၺႃးမၢၵ်ႇမႅင်းၾင်လိၼ် တႅၵ်ႇတိူဝ်ႉသႂ်ႇ မၢတ်ႇၸဵပ်းႁၢဝ်ႈႁႅင်း သူင်ႇယူတ်းယႃတူဝ်ဝႆႉ တီႈႁူင်းယႃလူင် ဝဵင်းလႃႈသဵဝ်ႈ တင်းသွင်။
လုၵ်ႈဢွၼ်ႇၸၢႆး 2 ၵေႃႉၼႆႉ ယဵပ်ႇၺႃးမၢၵ်ႇမိူဝ်ႈဝႃး ဝၼ်းတီႈ 5/5/2022 ယၢမ်းၵၢင်ၼႂ် မွၵ်ႈ 10 မူင်းပၢႆ တီႈသူၼ်ၼဵင်ႈ ဢၼ်ယၢၼ်ၵႆဝၢၼ်ႈမွၵ်ႈ 1 လၵ်း ၊ ၵေႃႉလဵၵ်ႉၼၼ်ႉမၢတ်ႇၸဵပ်းၸၢၵ်ႇမၢၵ်ႇႁၢဝ်ႈႁႅင်း ။
ၽူႈၶဝ်ႈၸုမ်း ၸွႆႈထႅမ်ပရႁိတ ၵျွၵ်ႉမႄး လၢတ်ႈတီႈၽူႈတွႆႇႁွၵ်ႈဝႃႈ – “ဢၼ်ယဵပ်ႇၺႃးမၢၵ်ႇၼၼ်ႉ ၵေႃႉၼိုင်ႈ ဢႃယု 7 ၶူပ်ႇ ထႅင်ႈၵေႃႉၼိုင်ႈ ဢႃယု 13 ၶူပ်ႇ။ ၵေႃႉလဵၵ်ႉၼၼ်ႉ တိူဝ်ႉၺႃးမၢတ်ႇၸဵပ်းႁႅင်းၶႃႈဢေႃႈ။ ယၢမ်းလဵဝ် တင်းသွင် လႆႈသူင်ႇယူတ်းယႃဝႆႉတီႈလႃႈသဵဝ်ႈယဝ်ႉ”- ဝႃႈၼႆ။
ဢၼ်ယဵပ်ႇၺႃးမၢၵ်ႇၼၼ်ႉ ၵေႃႉလဵၵ်ႉၸိုဝ်ႈႁွင်ႉ မၢႆးမိၼ်းႁၢၼ်ႇဢူး ၵေႃႉယႂ်ႇၸိုဝ်ႉႁွင်ႉ မၢႆးၵျေႃႇယၢၼ်ႇ ။ ၸၢၵ်ႇမၢၵ်ႇ တိူဝ်ႉၸွမ်းၶႃ၊ ၸွမ်းတွင်ႉ၊ ၸွမ်းတူဝ် ၶဝ်ၸိူဝ်းၼႆႉ။
“ဢၼ်ယၢပ်ႇၽိုတ်ႇတႄႉ လွင်ႈငိုၼ်းတွင်းတႃႇယူတ်းယႃၼၼ်ႉၼႃႇၼေႃ ။ ႁူႉယူႇၼၼ်ႉၼႃႇ ၵမ်ႈၼမ် ၵူၼ်းဝၢၼ်ႈတႄႉ ႁဵတ်းၵၢၼ်သူၼ်ႁႆႈၼႃးၵူၺ်းၼႃႇၼေႃႈ။ ပဵၼ်ၸႂ်ဢမ်ႇလီၸွမ်းတႄႉတႄႉၶႃႈ။ ၽႂ်ၵေႃႈ ဢမ်ႇၶႂ်ႈႁႂ်ႈပဵၼ်၊ ဢမ်ႇၶႂ်ႈႁႂ်ႈ တိူဝ်ႉၺႃးၸိူင်ႉၼႆ။ ဢၼ်ယၢပ်ႇၽိုတ်ႇတုၵ်ႉၶတႄႉ ပဵၼ်ၵူၼ်းမိူင်း ၼၼ်ႉၶႃႈယဝ်ႉ”- ၽူႈၶဝ်ႈၸုမ်း ၸွႆႈထႅမ်ပရႁိတ သိုပ်ႇလၢတ်ႈၼႄၼင်ႇၼႆ။
တၢင်းထုင်ႉပၢင်လႅင် ဝဵင်းၵျွၵ်ႉမႄးၼႆႉ မိူဝ်ႈပီၵၢႆ ၽွင်းၸုမ်းယိပ်းၵွင်ႈၵၢင်ႇပိုတ်းယိုဝ်းၵၼ်ၼၼ်ႉ ၵူၼ်းဝၢၼ်ႈ ၵႆႉၵႆႉၵႂႃႇယဵပ်ႇၺႃးမၢၵ်ႇၾင်လိၼ် ဢမ်ႇယွမ်း 10 ၵေႃႉ။ ထုင်ႉပၢင်လႅင်ၼႆႉ မီးၸုမ်းယိပ်းၵွင်ႈၵႂႃႇမႃးတူင်ႉၼိုင် လၢႆလၢႆၸုမ်း ။ ပဵၼ်မၢၵ်ႇၽႂ် ၸုမ်းလႂ်ၵၢင်ဝႆႉဢမ်ႇႁူႉ။ ၵူၼ်းပိုၼ်ႉတီႈတႄႉ တုၵ်းယွၼ်းႁႂ်ႈၽဵဝ်ႈပၼ် မၢၵ်ႇၸိူဝ်းၼၼ်ႉ။ ၵွပ်ႈပိူဝ်ႈဝႃႈ ဢၼ်ယဵပ်ႇၺႃးသေမၢတ်ႇၸဵပ်းလူႉတၢႆၼႆႉပဵၼ်ၵူၼ်းမိူင်းလွၼ်ႉလွၼ်ႉ ဝႃႈၼႆ။
