ပေႃးဢဝ်ၶေႃႈသင်ႇသွၼ်ပုတ်ႉထဝႃႈတႄႉ တႃႇၵိူတ်ႇမႃးပဵၼ်ၵူၼ်းၼႆႉမၼ်းယၢပ်ႇၼႃႇ ၊ ၸင်ႇၼၼ်လႄႈ ပဵၼ်ၵူၼ်းမႃးၼိုင်ႈၵေႃႉယဝ်ႉၸိုင် တၵ်းလူဝ်ႇဝႆႉၵႃႈၶၼ်ၽဝပဵၼ်ၵူၼ်း။ ဝႃႈၼၼ်သေတႃႉ ၼႃႈႁိူၼ်းမၢင်ၸိူဝ်းသမ်ႉ ဢိင်ၼိူဝ်ငဝ်းလၢႆးသေ ၸၢင်ႈဢဝ်လုၵ်ႈဢွၼ်ႇဢၼ်ၵိူတ်ႇဢွၵ်ႇတွင်ႉမႃးၼၼ်ႉ ၵႂႃႇပိုၼ်ႉၵႂႃႇပွႆႇပႅတ်ႈ။ ၶၢဝ်းသိုၵ်းမၢၼ်ႈယိုတ်းမိူင်းလႄႈ ဝၢႆးပၢင်ယၼ်ႇသိုၵ်း 1027 ၼႆႉ လုၵ်ႈဢွၼ်ႇလႅင်ၸိူဝ်းၺႃးပွႆႇပႅတ်ႈၼမ်လိူဝ်မႃးဝႃႈၼႆ ။

လုၵ်ႈဢွၼ်ႇလႅင် ၵိူတ်ႇဢွၵ်ႇတွင်ႉမႃး ယင်းဢမ်ႇတၼ်းႁူႉၸၵ်းပေႃႈႁူႉၸၵ်းမႄႈ သမ်ႉပေႃးၺႃးပွႆႇပိုၼ်ႉပွႆႇပႅတ်ႈ ။ ၼႂ်းပီသွင်ပီမႃးၼႆႉ လုၵ်ႈဢွၼ်ႇလႅင် ၸိူဝ်းၺႃးပွႆႇပႅတ်ႈ ၼမ်ၶိုၼ်ႈမႃးတႄႉတႄႉ။

တေႃႈၼင်ႇ ၸုမ်းပရႁိတ မူႇၸေႈ ၸိုင်ႈတႆးပွတ်းႁွင်ႇ လႄႈ မိူင်းမၢၼ်ႈ တူင်ႇပဵင်း တွင်ႁူႇ ၊ ၸႄႈၵႅင်း ၊ ဝဵင်းလိူဝ်ႇ ၊ တႃႈၵုင်ႈၸိူဝ်းၼႆႉၵေႃႈ ၼႂ်းပီ 2025 ၼႆႉ လႆႈၵဵပ်းလဵင်ႉလုၵ်ႈဢွၼ်ႇၽၢၼ်ပေႃႈမႄႈဝႆႉ တင်းၼမ်တင်းလၢႆ။ မၢင်ၸိူဝ်းၵေႃႈ ပိူၼ်ႈပႅတ်ႈလႄႈ ၵဵပ်းလႆႈဝႆႉ ၊ မၢင်ၸိူဝ်းၵေႃႈ ပိူၼ်ႈမႃးပၼ်ထိုင်တီႈဝႃႈၼႆ။

ၸွမ်းၼင်ႇၸုမ်းပရႁိတၶဝ်လၢတ်ႈတႄႉ ၼႂ်းၼိုင်ႈပီၵူၺ်း ႁူဝ်ၼပ်ႉလုၵ်ႈဢွၼ်ႇလဵၵ်ႉ မီးၼပ်ႉႁူဝ်ပၢၵ်ႇ ။
ပေႃးတူၺ်းၼႂ်းပီ 2023-2024 ၼၼ်ႉၼႆ တႄႇဢဝ်လုၵ်ႈဢွၼ်ႇလႅင်ဢၼ်တိုၵ်ႉၵိူတ်ႇ တေႃႇပေႃးထိုင် 1 ၶူပ်ႇၼၼ်ႉ လႆႈထူပ်းလႆႈၵဵပ်းလဵင်ႉဝႆႉ ၼိုင်ႈပီလႂ် 3 ၵေႃႉ ၊ ၼႂ်းပီ 2025 ၼႆႉတႄႉ ပုင်ႈၶိုၼ်ႈ မီးပဵၼ် 13 ၵေႃႉၼႆ သိုဝ်ႇ BBC ႁၢႆးငၢၼ်းဝႆႉၼင်ႇၼႆ။

ၸွမ်းၼင်ႇ ၸုမ်းပရိႁိတၶဝ်လၢတ်ႈတႄႉ မိူင်းတႆးပွတ်းႁွင်ႇ လႄႈ တိူင်းတၼၢဝ်းသီ ၸိူဝ်းၼႆႉ ငဝ်းလၢႆးဝၢၼ်ႈမိူင်းၵေႃႈယုင်ႈလႄႈ လုၵ်ႈဢွၼ်ႇၽၢၼ်ပေႃႈမႄႈၵေႃႈ ၼမ်လိူဝ်မႃး ။
မိူၼ်ၼင်ႇ တႃႈၵုင်ႈ ၊ ၸႄႈမိူင်းမွၼ်း ၊ ၼေႇပျီႇတေႃႇ ၊ တိူင်းပႃႇၵိူဝ် ၊ တႃႈလိူဝ်ႇ ၸိူဝ်းၼႆႉ ၵႆႉထူပ်းႁၼ်လုၵ်ႈဢွၼ်ႇလႅင် ဢၼ်ၺႃးပွႆႇပႅတ်ႈဝႃႈၼႆ။

ဢွင်ႈတီႈၵဵပ်းလဵင်ႉလုၵ်ႈဢွၼ်ႇၵေႃႈ မၢင်တီႈတတ်းမၵ်းႁူဝ်ၼပ်ႉဝႆႉလႄႈ – သင်ဝႃႈႁူဝ်ၼပ်ႉဢၼ်ၶဝ်ႁပ်ႉလႆႈၼၼ်ႉတဵမ်ယဝ်ႉၸိုင် မႃးမႂ်ႇၵေႃႈဢမ်ႇႁပ်ႉလဵင်ႉထႅင်ႈယဝ်ႉ။
ၵွပ်ႈၼၼ် ၵႂႃႇၶွၼ်ႈၵၼ်ယူႇၸွမ်းဝတ်ႉၵျွင်းမုၼ်ၸဝ်ႈ လႄႈ ဢွင်ႈတီႈသႃသၼႃၶရိတ်ႉၸိူဝ်းၼႆႉ ၼႆ ၽူႈဢွၼ်ႁူဝ်ၸုမ်းပရႁိတလၢတ်ႈတီႈသိုဝ်ႇ BBC ဝႆႉၼင်ႇၼႆ။

လုၵ်ႈဢွၼ်ႇ ၸိူဝ်းဢၼ်ၵဵပ်းလဵင်ႉဝႆႉၸိူဝ်းၼၼ်ႉ ႁၼ်လႂ်ၵေႃႈၵဵပ်းဢဝ်တီႈၼၼ်ႈၵူၺ်းလႄႈ ဢမ်ႇႁူႉဝႃႈ ပေႃႈမႄႈပဵၼ်ၽႂ် ယူႇလႂ်။တႃႇတေႁူႉၶိုၼ်းၼၼ်ႉ ပဵၼ်လွင်ႈ ယၢပ်ႇယဵၼ်း။
မၢင်တီႈၵေႃႈ တူၺ်းၸွမ်း CCTV သေ ၸွမ်းသွၵ်ႈႁႃတူၺ်း ၵေႃႉဢၼ်မႃးဝၢင်းပႅတ်ႈလုၵ်ႈဢွၼ်ႇၸိူဝ်းၼၼ်ႉသေ လႆႈႁူႉၶိုၼ်း ပေႃႈမႄႈလုၵ်ႈဢွၼ်ႇၵေႃႈမီး။

ၵမ်ႈၼမ် ဢၼ်မႃးထိုမ်ႈပႅတ်ႈလုၵ်ႈဢွၼ်ႇၼႆႉ ပဵၼ်ယွၼ်ႉ ႁႃၵိၼ်လဵင်ႉတွင်ႉဢမ်ႇၵုမ်ႇထူၼ်ႈ ၊ ၼႃႈႁိူၼ်းဢမ်ႇထုၵ်ႇမေႃပေႃးၵႂၢမ်းၵၼ် ႁိုဝ်ဢမ်ႇၼၼ် ပေႃႈမႄႈလူႉသဵင်ႈပႅတ်ႈၸိူဝ်းၼႆႉ။

မၢင်ၸိူဝ်းၵေႃႈ တႄႇၼႃႈႁိူၼ်းသေ ၽိူဝ်လိူဝ် ႁဵတ်းဢမ်ႇပႄႉၵိၼ်ဢမ်ႇပေႃးယဝ်ႉ သမ်ႉမႃးမီးလုၵ်ႈ လႆႈဢုမ်ႈလႆႈၸေး ဢမ်ႇယွမ်း 5 ၵေႃႉ။ သမ်ႉမႃးၵိူတ်ႇထႅင်ႈလႄႈ ထိုင်တီႈတႅပ်းတတ်း တႃႇပွႆႇပိုၼ်ႉပွႆႇပႅတ်ႈၽွင်ႈ ၼႆ ၽူႈၶဝ်ႈၸုမ်းၸွႆႈပရႁိတလၢတ်ႈ။

မိူင်းတႆးပွတ်းႁွင်ႇၵေႃႈ ဝၢႆးသေ ပဵၼ်ပၢင်ယၼ်ႇသိုၵ်း 1027 ၼႂ်းပီ 2023 ၼၼ်ႉယဝ်ႉ ပၼ်ႁႃၵေႃႈ မီးမႃးၶိူဝ်းယႂ်း ။ ႁဵတ်းႁႂ်ႈၵူၼ်းမိူင်း ၵူႈၸၼ်ႉထၢၼ်ႈ တုမ်ႉတိူဝ်ႉပၢႆးတူဝ်ပၢႆးၸႂ်။ လုၵ်ႈဢွၼ်ႇၽၢၼ်ပေႃႈမႄႈ လိူင်ႇၼမ် မႃးၸွမ်း ၼႂ်းၽေးပၢင်တိုၵ်း။

ၽူႈၶဝ်ႈၸုမ်းပရႁိတ မူႇၸေႊၵေႃႉၼိုင်ႈလၢတ်ႈဝႃႈ – “ ပေႃႈမႄႈလုၵ်ႈဢွၼ်ႇမၢင်ၸိူဝ်းၵေႃႈ တၢႆယွၼ်ႉ မၢၵ်ႇလူင်သိုၵ်းမၢၼ်ႈ ၊ တၢႆယွၼ်ႉမၢၵ်ႇမႅင်းၾင်လိၼ်ၸိူဝ်းၼႆႉ။ လုၵ်ႈဢွၼ်ႇမၢင်ၵေႃႉဢမ်ႇမီးမႄႈ ၊ မၢင်ၵေႃႉဢမ်ႇမီးပေႃႈ ” – ဝႃႈၼႆ။

မိူဝ်ႈပႆႇတႄႇ ပၢင်ယၼ်ႇသိုၵ်း 1027 ၼၼ်ႉ ႁူဝ်ၼမ်ႉလုၵ်ႈဢွၼ်ႇ မီးမွၵ်ႈ 70 ၵူၺ်းသေတႃႉ ၊ ဝၢႆးမီးပၢင်ယၼ်ႇသိုၵ်းယဝ်ႉ တႄႇဢဝ်လိူၼ် ဢွၵ်ႊထူဝ်ႊပိူဝ်ႊ 2023 မႃး မီးထိုင် 100 ၵေႃႉ ၼႆ ၽူႈမီးပုၼ်ႈၽွၼ်းႁူင်းၵဵပ်းလဵင်ႉလုၵ်ႈဢွၼ်ႇ လၢတ်ႈၼင်ႇၼႆ။

ဢွင်ႈတီႈ ဢၼ်ဢမ်ႇပဵၼ်ပၢင်တိုၵ်း မိူၼ်ၼင်ႇတၢင်းတိူင်းတႃႈၵုင်ႈၵေႃႈယင်းမီးလုၵ်ႈဢွၼ်ႇၽၢၼ်ပေႃႈမႄႈၼမ်ၶိုၼ်ႈမႃး။ မိူၼ်ၼင်ႇတီႈ ၵျွင်းပရႁိတမၢၼ်ႇၵိၼ်း ၼၼ်ႉ လုၵ်ႈဢွၼ်ႇၽၢၼ်ပေႃႈမႄႈ မီးၸမ် 200 ၵေႃႉ။ ပဵၼ်လုၵ်ႈဢွၼ်ႇၼႂ်းတိူင်းတႃႈၵုင်ႈလႄႈ တိူင်းၵုၼ်ၵဵဝ် ဢေႇရႃႇဝတီႇ ဝႃႈၼႆ။

မၢင်ၸိူဝ်း တႄႇၼႃႈႁိူၼ်းယဝ်ႉ မီးလုၵ်ႈႁူမ်ႈၵၼ် ပႆႇတၼ်းႁိုင် ၵေႃႉပဵၼ်ၽူဝ်လႆႈဢွၵ်ႇတၢင်းၵႂႃႇႁၢပ်ႇၵၢၼ်သိုၵ်းမၢၼ်ႈ။ ၵေႃႉပဵၼ်ၼၢင်းယိင်းလႄႈ လုၵ်ႈလၢင်းသမ်ႉ ၽႂ်ဢမ်ႇဢဝ်ပုၼ်ႈၽွၼ်းတူၺ်းလူလွမ်ပၼ်။ ၵွပ်ႈၼႆလႆႈဢဝ် လုၵ်ႈဢွၼ်ႇၵႂႃႇပွႆႇပႅတ်ႈၵေႃႈမီး ။
ပၢႆးမၢၵ်ႈမီးတူၵ်း ၊ ပၼ်ႁႃတူင်ႇၵူၼ်းၼမ် ၊ ပၼ်ႁႃၼႃႈႁိူၼ်းၼမ် လႄႈ ႁဵတ်းႁႂ်ႈ ၵူၼ်းမိူင်းၸိူဝ်းႁႃၸဝ်ႉၵိၼ်ၶမ်ႈ ဝူၼ်ႉပွတ်းသေ ႁဵတ်းၵႂႃႇလူၺ်ႈလိုမ်းဝူၼ်ႉသုၼ်ႇလႆႈလုၵ်ႈဢွၼ်ႇ။

မိူၼ်ၼင်ႇ ၸႄႈမိူင်းရၶၢႆႇ ဢွင်ႈတီႈ ဢၼ်ယူႇတႂ်ႈ ႁူဝ်ပဝ်ႈသိုၵ်းရၶၢႆ AA ၸွမ်ႁၢၼ်ထုၼ်းမျၢတ်ႉၼၢႆႇၼၼ်ႉၵေႃႈ မေးၼၢင်းၸွမ်ႁၢၼ်ထုၼ်းမျၢတ်ႉၼၢႆႇ ပိုတ်ႇဝႆႉႁူင်းလုမ်းလႃးလုၵ်ႈဢွၼ်ႇၽၢၼ်ပေႃႈမႄႈ ။
ပိူင်လူင်တႃႇ ၸွႆႈထႅမ် လုၵ်ႈဢွၼ်ႇၸိူဝ်းဢမ်ႇမီးတီႈယူႇတီႇၵိၼ် ၊ လုၵ်ႈဢွၼ်ႇၸိူဝ်းဢၼ် ၵိူတ်ႇမႃးတီႈ ၼၢင်းယိင်းဢၼ်ၺႃးၵၼ်ႉၸၼ်ၸိူဝ်းၼၼ်ႉ ၼႆ ယဝ်ႉ။

တီႈမူႇၸေႊ ၼႆႉ ႁူင်းၵဵပ်းလဵင်ႉလုၵ်ႈဢွၼ်ႇလဵၵ်ႉ ၵဵပ်းလဵင်ႉဝႆႉ ၸမ်ၸမ် 200 ၵေႃႉ ။တႃႇယူႇတႃႇၵိၼ်ၶဝ်လႄႈ တႃႇသူင်ႇၵႂႃႇမႃးၶိုၼ်းႁဵၼ်းၸိူဝ်းၼႆႉ ၼိုင်ႈလိူၼ် လႂ် သဵင်ႈၼပ်ႉႁူဝ်ပၢၵ်ႇသႅၼ်ပျႃး ။
တႃႇႁႂ်ႈလုၵ်ႈဢွၼ်ႇၸိူဝ်းၼႆႉ တေယႂ်ႇမႃႈၵႃႈသုင်မႃး လၵ်းလႅမ်မႃးၼၼ်ႉၵေႃႈ လႆႈသႂ်ႇၸႂ်။ ၼင်ႇႁိုဝ် ၶေႃႈၵႂၢမ်း တေဢမ်ႇၵႂႃႇၸူၵ်ႉၸႂ်ၶဝ်ၸိူဝ်းၼႆႉၵေႃႈ လႆႈၾၢင်ႉတႄႉတႄႉ ၊ ယွၼ်ႉၶဝ်ႇၵိူတ်ႇမႃးတီႈဢၼ်ပေႃႈမႄႈပွႆႇၽႃႈလႄႈ ၼႆ ၽူႈမီးပုၼ်ႈၽွၼ်းၼႂ်းပရႁိတလၢတ်ႈ။

ႁူင်းၵဵပ်းလဵင်ႉလုၵ်ႈဢွၼ်ႇၽၢၼ်ပေႃႈမႄႈၼႆႉ မၼ်းဢမ်ႇမီးၵူႈၸႄႈဝဵင်းလႄႈ ၸႄႈဝဵင်းဢၼ်မီးၼၼ်ႉၵေႃႈ လႆႈၵဵပ်းလဵင်ႉလူၼ်ႉလိူဝ် ဢမ်ႇၸၢင်ႈၵႂႃႇၾၢၵ်ႇတၢင်ႇတီႈၸွႆႈလဵင်ႉ ပဵၼ်ဢၼ် ၵိၼ်းၸႂ်တႄႉတႄႉၼႆ ၵူၼ်းႁဵတ်းၵၢၼ်ၼႂ်းပရႁိတလၢတ်ႈ။

ၶၢဝ်းဝၢၼ်ႈမိူင်းယုင်ႈၼႆႉ ၶႃႈႁၢပ်ႇၵၢၼ်ၶုၼ် ၼႂ်းႁွင်ႈၵၢၼ်လၢႆၾၢႆႇၵေႃႈ ဢွၵ်ႇႁဵတ်း CDM ၼမ် ၊ ယႃႇဝႃႈ တေလုမ်းလႃးလုၵ်ႈဢွၼ်ႇၽၢၼ်ပေႃႈမႄႈဢၼ်မီးမႃးမႂ်ႇမႂ်ႇ ။ တေႃႈၼင်ႇ လွင်ႈလိူတ်ႇလွင်ႈမႆႈၵူၼ်းမိူင်းဢၼ်မီးယူႇ ယင်းဢမ်ႇၵႄႈလႆႈ။

ႁွင်ႈၵၢၼ်ၾၢႆႇ တူၺ်းလူပူၵ်းပွင်တူင်ႇဝူင်းၵူၼ်း လူမှုဝန်ထမ်းဦးစီးဌာန လၢတ်ႈဝႃႈ တႃႇလုမ်းလႃးလုၵ်ႈဢွၼ်ႇၼၼ်ႉ မၼ်းတိုၼ်းမီးဝႆႉ ၼႂ်းပိူင်မိူင်း မတ်ႉတႃ 57 ။ ယွၼ်ႉၼၼ်လႄႈ ၸင်ႇပိုတ်ႇဝႆႉပၼ် တႃႇလုမ်းလႃးလုၵ်ႈဢွၼ်ႇ ၽၢၼ်ပေႃႈမႄႈ 8 တီႈ ။ ၸဵမ်မိူဝ်ႈ 2020 ၼၼ်ႉၵေႃႈ သမ်ႉပေႃး ပိုတ်ႇႁပ်ႉလဵင်ႉလူလုၵ်ႈဢွၼ်ႇၵိူတ်ႇမႂ်ႇ ထိုင် 10 ၶူပ်ႇယဝ်ႉ ဝႃႈၼႆယူႇ။

ဢၼ်ႁူင်းလဵင်ႉလူလုၵ်ႈဢွၼ်ႇ ဢၼ်ယူႇတႂ်ႈႁွင်ႈၵၢၼ် တူၺ်းလူပူၵ်းပွင်တူင်ႇဝူင်းၵူၼ်း ပိုတ်ႇဝႆႉၼၼ်ႉ မီး 8 တီႈ ပဵၼ် တီႈဝဵင်းတႃႈၵုင်ႈ ၊ ဝဵင်းလိူဝ်ႇ ၊ မၵူၺ်း ၊ ၸႄႈမိူင်းမွၼ်း ၊ မိူင်းတႆးပွတ်းဢွၵ်ႇ ၊ ဢေႇရႃႇဝတီႇ လႄႈ မိူင်းရၶၢႆႇ ၼႆယဝ်ႉ။
ၼႂ်းပီ 2020 တေႃႇထိုင် 2025 ၶၢဝ်းတၢင်း 6 ပီၸမ်ၸမ်ၼႆႉ ၵဵပ်းလဵင်ႉဝႆႉ လုၵ်ႈဢွၼ်ႇ 256 ၵေႃႉ ၵွၼ်ႇၼႃႈၼၼ်ႉ 2015- 2019 တႄႉ ၵဵပ်းလဵင်ႉလုၵ်ႈဢွၼ်ႇဢၼ်ၺႃးပွႆႇပႅတ်ႈ 358 ၵေႃႉ ဝႃႈၼႆ။
လွင်ႈပွႆႇပႅတ်ႈလုၵ်ႈဢွၼ်ႇလဵၵ်ႉၼႆႉ ပေႃးဢဝ်ပိူင်ၸိုင်ႈမိူင်းဝႃႈ တီႈလႂ်ၵေႃႈ မၼ်းၽိတ်းပၵ်းပိူင်ယဝ်ႉ၊ ၼႂ်းမိူင်းႁူမ်ႈတုမ်မၢၼ်ႈၼႆႉၵေႃႈ မိူၼ်ၵၼ် ပေႃးပွႆႇပႅတ်ႇလုၵ်ႈဢွၼ်ႇလဵၵ်ႉ ဢၼ်ဢႃယု တႅမ်ႇလိူဝ် 12 ပီ ၵေႃႉပဵၼ်ပေႃႈပဵၼ်မႄႈႁိုဝ်ဢမ်ႇၼၼ် ၽူႈၵွၼ်းၼႃႈႁိူၼ်း တၵ်းၺႃးတၢမ်ႇၶွၵ်ႈ 7 ပီ လူၺ်ႈမတ်ႉတႃ 317 ။

သင်ဝႃႈ ၵိူတ်ႇလုၵ်ႈယဝ်ႉ ၊ ႁိုဝ်ဢမ်ႇၼၼ် ဢမ်ႇပႆႇတၼ်းၵိူတ်ႇသေ ထိုင်တီႈလုၵ်ႈဢွၼ်ႇလႆႈလူႉတၢႆၵႂႃႇၵေႃႈ တေဢမ်ႇလႆႈဢဝ်ၵႂႃႇၽင်ၵႂႃႇပႅတ်ႈႁင်းၵူၺ်း။ ၸွမ်းၼင်ႇ မတ်ႉတႃ ရႃႇၸတၢတ်ႈ – ရာဇသတ်ကြီး ဥပဒေပုဒ်မ 318 – ၼၼ်ႉ တၵ်းၺႃးတၢမ်ႇၶွၵ်ႈ 2 ပီ ၼႆ ပိူင်းၼႄၼႂ်းပိူင်ဝႆႉၼင်ႇၼၼ်။

ၵွပ်ႈၼၼ် တေႁဵတ်းသင်ၵေႃႈ ႁႂ်ႈဝူၼ်ႉႁႂ်ႈသွၼ်ႇလီလီ ၊ ႁႂ်ႈမေႃႁူႉၾိင်ႈၵူၼ်း ၊ ႁႂ်ႈမေႃႁူႉပိူင်မိူင်း ။ မီးလုၵ်ႈဢွၼ်ႇယဝ်ႉ ယႃႇပွႆႇပိုၼ်ႉပွႆႇပႅတ်ႈ သင်ဝႃႈ မီးတၢင်းလိူတ်ႇမႆႈႁႅင်းၼႃႇၵေႃႈ ထုၵ်ႇလီဢုပ်ႇဢူဝ်းလၢတ်ႈၼႄၸုမ်းပရႁိတ ၸၢင်ႈလႆႈၶေႃႈတွပ်ႇလီယူႇၼႆ – ၸုမ်းပရႁိတ ၾၢႆႇလဵင်ႉလူလုၵ်ႈဢွၼ်ႇ လၢတ်ႈပၼ်ၾၢင်ႉဝႆႉၼင်ႇၼႆ။

ပိၼ်ႇၽႃႇသႃႇ – BBC