ၸုမ်းႁႅင်းၵၢၼ် MWG ပိုၼ်ၽၢဝ်ႇပၼ်ၾၢင်ႉၵႂႃႇ ၼႂ်းဝၼ်းတီႈ 18 လိူၼ်ၾႅပ်ႉပိဝ်ႊရီႊၼႆႉဝႃႈ သင်လူင်ပွင်ၸိုင်ႈမိူင်းထႆး ဢမ်ႇတူၺ်းလူလွမ်ပၼ်လုၵ်ႈဢွၼ်ႇႁႅင်းၵၢၼ် လူၺ်ႈပၵ်းပိူင် လီလီၸိုင် လုၵ်ႈဢွၼ်ႇ မွၵ်ႈ 80000 ၵေႃႉၼႆႉ တေၸၢင်ႈပဵၼ်ၵႂႃႇ ႁႅင်းၵၢၼ်လုၵ်ႈဢွၼ်ႇ ၸိူဝ်းဢႃယုဢမ်ႇတဵမ် ဝႃႈၼႆ။

ၼႂ်းမိူင်းထႆးၼႆႉ ႁႅင်းၵၢၼ်ယၢၼ်မိူင်း မီးမွၵ်ႈ 5 လၢၼ်ႉ၊ ပႃးႁႅင်းၵၢၼ်ၵူၼ်းမိူင်းႁူမ်ႈတုမ်မၢၼ်ႈ။ လုၵ်ႈဢွၼ်ႇႁႅင်းၵၢၼ် ၸိူဝ်းၼၼ်ႉသမ်ႉ မီး 78,864 ၵေႃႉ – ၸုမ်း MWG ပိုၼ်ၽၢဝ်ႇဝႆႉ ၼင်ႇၼႆ။

ႁႅင်းၵၢၼ် ၸိူဝ်းႁဵတ်းၵၢၼ်ၵေႃႇသၢင်ႈ၊ ၵၢၼ်ၽုၵ်ႇသွမ်ႈလႄႈ ႁူင်းၵၢၼ် ၼႂ်းမိူင်းထႆးလၢႆလၢႆတီႈၼႆႉ ၵမ်ႈၼမ် ပဵၼ်ၵူၼ်းမိူင်းႁူမ်ႈတုမ်မၢၼ်ႈ။

ၾၢႆႇၼိုင်ႈၵေႃႈ လူင်ပွင်ၸိုင်ႈမိူင်းထႆး ၸီႉသင်ႇဝႆႉတီႈ ႁွင်ႈၵၢၼ်ၽွင်းလူင်ၾၢႆႇပၢႆးပၺ်ႇၺႃႇ ႁႂ်ႈႁပ်ႉဢဝ်လုၵ်ႈဢွၼ်ႇ ၸိူဝ်းပေႃႈမႄႈ ပဵၼ်ႁႅင်းၵၢၼ်ဢမ်ႇမီးဝတ်းဝႂ်သင်ၼၼ်ႉ ၶဝ်ႈ ႁဵၼ်းလိၵ်ႈၼႂ်းႁူင်းႁဵၼ်း၊ ၵူၺ်းၵႃႈ မိူဝ်ႈပေႃႈမႄႈလုၵ်ႈဢွၼ်ႇႁႅင်းၵၢၼ် ၵႂႃႇသႂ်ႇသဵၼ်ႈၸိုဝ်ႈ ဢၢပ်ႈႁူင်းႁဵၼ်းလုၵ်ႈဢွၼ်ႇၼၼ်ႉ ယင်းတိုၵ်ႉမီးလွင်ႈယၢပ်ႇၽိုတ်ႇဝႆႉယူႇ ဝႃႈၼႆ။

ၸုမ်း MWG လၢတ်ႈဝႃႈ – ၵၢၼ်ငၢၼ်းႁဵတ်းဢွၵ်ႇၶူဝ်းၵုၼ်ႇၼႂ်းမိူင်းထႆးၵမ်ႈၼမ်ၼႆႉ လႆႈပိုင်ႈဢိင်ၸႂ်ယႂ်ႇၼိူဝ်ႁႅင်းၵၢၼ်ၶဝ်ဝႆႉ။ ယွၼ်ႉၼၼ် လုၵ်ႈဢွၼ်ႇႁႅင်းၵၢၼ်ၸိူဝ်းၼႆႉၵေႃႈ လမ်ႇလွင်ႈ တွၼ်ႈတႃႇၼႂ်းၶၵ်ႉတွၼ်ႈ ဢဵၼ်ႁႅင်းၵူၼ်းႁဵတ်းၵၢၼ်ၼႂ်းမိူင်းထႆး ၼင်ႇႁိုဝ်တေမီးလွင်ႈၼိမ်သဝ်းၵႂႃႇ ဝႃႈၼႆ။
ယွၼ်ႉၼၼ်လႄႈ သင်ဝႃႈလုၵ်ႈဢွၼ်ႇ ၸိူဝ်းဢႃယုပႆႇတဵမ် ထိုင်ၵႂႃႇၼႂ်းတူင်ႇဝူင်းႁဵတ်းၵၢၼ်ၸိုင် တေၸၢင်ႈမီးၽွၼ်းတုမ်ႉယွၼ်ႈ ၼိူဝ်ၾၢင်ႁၢင်ႈၵၢၼ်ပၢႆးမၢၵ်ႈမီးမိူင်းထႆး ဝႃႈၼႆ။

ယူႇတီႈၸုမ်း MWG လႆႈတုၵ်းယွၼ်းဝႆႉ ႁႂ်ႈလူင်ပွင်ၸိုင်ႈထႆး ယုၵ်ႉမုၼ်းပၵ်းပိူင် လွင်ႈပၼ်သုၼ်ႇ လုၵ်ႈဢွၼ်ႇႁႅင်းၵၢၼ် လႆႈႁဵၼ်းသွၼ်လိၵ်ႈ။ လွင်ႈၵႅတ်ႇၶႄႁႄႉၵင်ႈပၼ် လုၵ်ႈဢွၼ်ႇႁႅင်းၵၢၼ်ၶဝ်ၼႆႉ ပဵၼ်တွၼ်ႈတႃႇ တေႁဵတ်းႁႂ်ႈဢဵၼ်ႁႅင်းၵူၼ်းႁဵတ်းၵၢၼ် မီးလွင်ႈၼိမ်သဝ်းလႄႈ ပဵၼ်ၵၢၼ်လူင်းတိုၼ်းလၢင်း တႃႇၵၢၼ်ပၢႆးမၢၵ်ႈမီးၵူၺ်း ဝႃႈၼႆ။