လုင်းလၢႆးၸိုၼ်ႈလူႇ ဢႃယု 84 ပီ ပၢႆႈၽေးသိုၵ်း ဢွၵ်ႇႁိူၼ်းမႃးလႆႈၶိုင်ႈပီ ပႆႇတၼ်းလႆႈပွၵ်ႈၶိုၼ်းႁိူၼ်း လူႉတၢႆပႅတ်ႈလူၺ်ႈတၢင်းပဵၼ်လူမ်းႁူဝ်ၸႂ်။
လုင်းလၢႆးၸိုၼ်ႈလူႇၼႆႉ လူႉတၢႆၵႂႃႇမိူဝ်ႈ ဝၼ်းတီႈ 17/2/2022 ယၢမ်းၵၢင်ၼႂ် 7 မူင်း တီႈႁူင်းႁေႃ ၵေႃလိၵ်ႈလၢႆးလႄႈၾိင်ႈငႄႈတႆး ဝဵင်းၵျွၵ်ႉမႄး။
ၸၢႆးလႅင်းႁၢၼ် ႁူဝ်ပဝ်ႈ ၵေႃလိၵ်ႈလၢႆး ၵျွၵ်ႉမႄး လၢတ်ႈတီႈၽူႈတွႆႇႁွၵ်ႈဝႃႈ – “ ၵူၼ်းထဝ်ႈ ဢႃယု 84 ပီ ၵိုင်ႉၵၢင်ႉလူႉသဵင်ႈ လူၺ်ႈတၢင်းပဵၼ်ႁူဝ်ၸႂ်ၵပ်ႉၵေႃႈ။ ပူၼ်ႉၶၢပ်ႈတူဝ်ပၼ် ဝၼ်းၼၼ်ႉၵမ်းလဵဝ်ယဝ်ႉၶႃႈ ”- ဝႃႈၼႆ။
လုင်းလၢႆးၸိုၼ်ႈလူႇၼႆႉ ပဵၼ်ၵူၼ်းၸႃတိ ဝၢၼ်ႈတူၼ်ႈႁိူၵ်ႈ။ ၸုမ်းဢူၺ်းလီပွတ်းႁွင်ႇလႄႈ RCSS ပိုတ်းယိုဝ်းၵၼ် ႁၢဝ်ႈႁႅင်းလႄႈ ပၢႆႈဢွၵ်ႇဝၢၼ်ႈမႃးၸဵမ်မိူဝ်ႈၵၢင်ပီပီၵၢႆ။ မႃးသွၼ်ႈယူႇဝႆႉ တီႈဝၢၼ်ႈႁူးသူၼ် ၶၢဝ်းတၢင်း 2 လိူၼ်ပၢႆ။ ယဝ်ႉၵေႃႉ ၶၢႆႉမႃးသွၼ်ႈဝႆႉတီႈၵေႃလိၵ်ႈ လၢႆးၼႆႉ ၶၢဝ်းတၢင်း 4 လိူၼ်ပၢႆ ႁူမ်ႈၵၼ် ပၢႆႈဢွၵ်ႇမႃး မီးၶၢဝ်းတၢင်း 6 လိူၼ်ပၢႆ။
ယၢမ်းလဵဝ် ၵူၼ်းပၢႆႈၽေးသိုၵ်း ဢၼ်ပၢႆႈမႃးသွၼ်ႈဝႆႉတီႈ ၵေႃလိၵ်ႈလၢႆးလႄႈ ၾိင်ႈငႄႈတႆး ၸႄႈဝဵင်းၵျွၵ်ႉမႄးၼႆႉ တင်းမူတ်းမီး ႁူဝ်ၵူၼ်း 290 ပၢႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ