ၸုမ်းဢူၺ်းလီပွတ်းႁွင်ႇလႄႈ RCSS ပိုတ်းယိုဝ်းတိုၵ်းတေႃးၵၼ်ၼႂ်းၸႄႈဝဵင်းၵျွၵ်ႉမႄးလၢမ်းလူင်းမႃးထိုင် ၼႂ်းၸႄႈဝဵင်းလွၵ်ႉၸွၵ်ႇ၊ ၵူၼ်းမိူင်းၵျွၵ်ႉမႄးပၢႆႈၽေးသိုၵ်း လၢႆတေႃႇလၢႆၵမ်း ယၢမ်းလဵဝ် သိုပ်ႇပၢႆႈ ၵမ်းထူၼ်ႈသီႇ ႁွတ်ႈထိုင်ဝဵင်းတူၼ်ႈတီး။
မိူဝ်ႈၼႆႉဝၼ်းတီႈ 16/2/2022 ၵူၼ်းမိူင်းၵျွၵ်ႉမႄး ပွတ်းဝၢၼ်ႈဢိူင်ႇ ႁူးသူၼ် ႁူးၵွတ်ႈ ဢၼ်ပၢႆႈၽေးသိုၵ်း ထိုင် ၸႄႈဝဵင်းႁူဝ်ပူင်း ၼၼ်ႉ သိုပ်ႇပၢႆႈၵႂႃႇထိုင်ဝဵင်းတူၼ်ႈတီး ။
ၵူၼ်းၼုမ်ႇဝဵင်းတူၼ်ႈတီး ဢၼ်ၸွႆႈထႅမ်ၵူၼ်းပၢႆႈၽေးသိုၵ်းလၢတ်ႈတီႈၽူႈတွႆႇႁွၵ်ႈဝႃႈ -“ ၵူၼ်းၵျွၵ်ႉမႄး ဢၼ်ပၢႆႈၽေးသိုၵ်းလူင်းမႃးထိုင် တီႈၵျွင်းၵျီႇတေႃႇ ဝၢၼ်ႈမိူင်းပဵင်း ႁူဝ်ပူင်းၼၼ်ႉ တင်းမူတ်းမီး 528 ၵေႃႉဝႃႇ ၶဝ်တေသိုပ်ႇပၢႆႈမႃးတူၼ်ႈတီး။ ၶမ်ႈၼႆႉတႄႉ ႁွတ်ႈထိုင်ဝဵင်းတူၼ်ႈတီး 300 ပၢႆ။ ဢၼ်ၵိုတ်း 100 ပၢႆၼၼ်ႉတေသိုပ်ႇမႃးထႅင်ႈတၢင်းလင် ၼႆဢေႃႈ ။ ၸုမ်းပရႁိတလႄႈၸုမ်းတူင်ႇဝူင်းၵူၼ်း ဝဵင်းတူၼ်ႈတီးၼႆႉ ဢုပ်ႇၵၼ်သေၶိုင်ဝႆႉပၼ်တီႈလိုဝ်ႈသဝ်းၶဝ်ၶႃႈဢေႃႈ”- ဝႃႈၼႆ။
တွၼ်ႈတႃႇၵူၼ်းပၢႆႈၽေးသိုၵ်း ဢၼ်လုၵ်ႉႁူဝ်ပူင်းမႃးၼႆႉ တမ်းဝၢင်းပၼ်တီႈယူႇတီႈ ဝတ်ႉၵျွင်းဝေႇလုဝုၼ်ႇ၊ ၵျွင်းၵမထၢၼ်းလႄႈ လုမ်းၵေႃလိၵ်ႈလၢႆး ၸိူဝ်းၼႆႉ ။ ယၢပ်ႇၽိုတ်ႇ လွင်ႈၵိၼ်ယမ်ႉလႄႈၶူဝ်းၸႂ်ႉၶူဝ်းသွႆဝႃႈၼႆ။
ၵူၼ်းဝၢၼ်ႈႁူးသူၼ် ႁူးၵွတ်ႈၸႄႈဝဵင်းၵျွၵ်ႉမႄး ၼႆႉ ပၢႆႈၽေးသိုၵ်း လူင်းမႃးတၢင်းဢိူင်ႇၵဵင်းၶမ်း ဝဵင်းၵျွၵ်ႉၵူႇ ၸႄႈဝဵင်းလွၵ်ႉၸွၵ်ႇၸဵမ်မိူဝ်ႈႁူဝ်လိူၼ် ၵျၼ်ႊၼိဝ်ႊရီႊ၊ ယွၼ်ႉပိူဝ်ႈပၢင်တိုၵ်းၸမ်မႃးလၢမ်းမႃး၊ သိုၵ်းမၢၼ်ႈဢဝ်ၶိူင်ႈမိၼ်ယိုဝ်းသိုၵ်း မႃးယိုဝ်းၼႂ်းၵႄႈပၢင်တိုၵ်း 2 ၸုမ်း။ မၢၵ်ႇလူင်တူၵ်းတႅၵ်ႇ ၸမ်ဝၢၼ်ႈ ၵဵင်းၶမ်းႁႅင်းလႄႈ ႁူဝ်လိူၼ်ၾႅပ်ႉပိဝ်ႊရီႊၼႆႉ ၸိူဝ်းၶဝ်သိုပ်ႇပၢႆႈလူင်းမႃးတၢင်း ၵျွင်းၵျီႇတေႃႇ ဝၢၼ်ႈမိူင်းပဵင်း ဝဵင်းႁူဝ်ပူင်း။ ယၢမ်းလဵဝ်ၵေႃႈ သွင်ၾၢႆႇႁၢင်ႈႁႅၼ်းသိုၵ်းလူင်းမႃးတၢင်းၸၢၼ်းထႅင်ႈလႄႈ ၵူၼ်းပၢႆႈၽေးသိုၵ်း လုၵ်ႉတီႈၵျွင်းၵျီႇတေႃႇ သိုပ်ႇၶၢႆႉပၢႆႈထိုင် ဝဵင်းတူၼ်ႈတီး။
