ၵူၼ်းပိုၼ်ႉတီႈပၼ်ၾၢင်ႉၵၼ် သိုၵ်းမၢၼ်ႈၵူတ်ႇထတ်းရူတ်ႉၵႃးဢမ်ႇမီးဝႂ်လၢႆႊသိၼ်ႊ ဢၼ်ၵႂႃႇမႃးၼႂ်းၵႄႈ ႁူဝ်ပူင်း-တူၼ်ႈတီး ႁၢဝ်ႈႁႅင်း ၊ ဝၼ်းၵၢတ်ႇဝၼ်းၵျွင်းၵူၼ်းတၢင်းဝၢၼ်ႈတေၶိုၼ်ႈဝဵင်းသိုဝ်ႉၶၢႆမၢၵ်ႇၶဝ်ႈတဝ်ႈၼမ်ႉသမ်ႉပေႃးယၢပ်ႇၽိုတ်ႇ ဝႃႈၼႆ။

ၽူႈၸၢႆး ၵူၼ်းမိူင်းဝဵင်းႁူဝ်ပူင်းၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ ပေႃးၶဝ်ပႂ်ႉၵူတ်ႇထတ်းတီႉရူတ်ႉဢမ်ႇမီးဝႂ်ႁၢဝ်ႈႁႅင်းၸိူင်ႉၼႆ ႁဵတ်းႁႂ်ႈႁဝ်းၶႃႈၸဝ်ႈသူၼ်ၸဝ်ႈၼႃးယၢပ်ႇၶႃႈဢိူဝ်ႈ။ ၵူၼ်းတၢင်းဝၢၼ်ႈၼႆႉ လိူၼ်လပ်းလိူၼ်မူၼ်းႁႃႉ ဝၼ်းၵၢတ်ႇဝၼ်းသႃးႁႃႉၼႆလႆႈမႃးဝဵင်းဢမ်ႇၸႂ်ႈၶႃႈႁိုဝ်။ ၵမ်ႈၽွင်ႈမေႃယႃၶိၼ်းဝႆႉလႄႈ ၵႂႃႇႁူင်းယႃ ၸိူဝ်းၼႆႉ။ ၺႃးတီႉ ၺႃးယွၼ်းငိုၼ်းယူႇတိၵ်းတိၵ်းၼႆႉ မၼ်းယၢပ်ႇၶႃႈဢိူဝ်ႈ။ ၶဝ်ၼႆႉလႅတ်းၼႃႇ ၵမ်ႈၼမ်ၶဝ်သမ်ႉပႂ်ႉထတ်းၼႆႉပဵၼ်ဝၼ်းၵၢတ်ႇဝၼ်းသိၼ် ဝၼ်းပိူၼ်ႈၶိုၼ်ႈဝဵင်းလွၼ်ႉလွၼ်ႉဢိူဝ်ႈ” – ဝႃႈၼႆ။

ၵူၼ်းတၢင်းဝၢၼ်ႈတႄႉ ယွၼ်ႉပိူဝ်ႈမီးၵၢၼ်ႁႆႈၵၢၼ်သူၼ် ၵူၺ်းလႄႈသိုဝ်ႉရူတ်ႉၵႃးဢမ်ႇမီးဝႂ်ၶွၼ်ႇ(ၵႃႈၶၼ်ၵေႃႈဢမ်ႇသုင်) ၼၼ်ႉမႃးၸႂ်ႉတိုဝ်းၼႂ်းဝၢၼ်ႈၼႂ်းသူၼ်။ ၾၢႆႇၼိုင်ႈၵေႃႈယွၼ်ႉပိူဝ်ႈ ၾၢႆႇတၢင်းႁွင်ႈၵၢၼ်ၾၢႆႇတေႃႉသူင်ႇၶဝ်ဢမ်ႇႁဵတ်းပႂ်ဝႂ်မၢႆၾၢင် လၢႆႊသိၼ်ႊ လႄႈၵႃႈလႆႈၸႂ်ႉရူတ်ႉၼၼ်ႉၵႂႃႇမႃးၼမ်သုတ်းၵေႃႈၶိုၼ်ႈဝဵင်းၶၢႆမၢၵ်ႇၶဝ်ႈတဝ်ႈၼမ်ႉ။

ၵူၼ်းမိူင်းၼႂ်းၸႄႈဝဵင်းႁူဝ်ပူင်းလၢတ်ႈဝႃႈ -“ ပၢႆလိူဝ်ဢမ်ႇမီးငိုၼ်းလႄႈၸင်ႇသိုဝ်ႉၶီႇရူတ်ႉဝိတ်ႉတွၵ်ႉ။ ၵမ်းၼႆႉသမ်ႉၵမ်းၵမ်းၺႃးတီႉတိၵ်းတိၵ်း ၵုမ်ႇလႆႈပၼ်ငိုၼ်းပလိၵ်ႈမၢၼ်ႈသိုၵ်းမၢၼ်ႈယူႇၸိူင်ႉၼႆၵူၺ်းယဝ်ႉ။ ဢမ်ႇသၢင်ႇထုၵ်ႇသမ်ႉဢဝ်ပႃးၵႃးႁဝ်းလူင်ၼႆႉ။ သမ်ႉလူဝ်ႇႁႃၵိၼ်လဵင်ႉတွင်ႉလႄႈ ဢမ်ႇၸၢင်ႈႁဵတ်းႁိုဝ်ၼေႃႈ မီးသင်ၵေႃႈၵႃႈလႆႈဢဝ်ဢၼ်ၼၼ်ႉတေႃႉသူင်ႇ ၶႃႈဢိူဝ်ႈ။ သင်ၶဝ်ပိုတ်ႇပၼ်ၵူၼ်းမိူင်းႁဵတ်းဝႂ်လၢႆႊသိၼ်ႊ ၵေႃႈယင်းၶႅၼ်းဢိတ်းၼိုင်ႈၼေႃႈ။ၸိူင်ႉႁိုဝ်ၵေႃႈမႃးၼႃႇတီႈၵူၼ်းဝၢၼ်ႈၵူၼ်းမိူင်းယူႇတိၵ်းတိၵ်းၵူၺ်းယဝ်ႉၶႃႈ”- ဝႃႈၼႆ။

ၽွင်းလူင်ၾၢႆႇၵပ်းသိုပ်ႇတေႃႉသူင်ႇ ၾၢႆႇသဵၼ်ႈတႃႈသၢႆတၢင်းလႄႈ ၾၢႆႇႁႅင်းထၢတ်ႈ ႁႅင်းၸၢၵ်ႈလႄႈ ၾႆးၾႃႉ လၢတ်ႈၽွင်းပၢင်ၵုမ်သၽႃးၸိုင်ႈတႆး မိူဝ်ႈဝၼ်းတီႈ 9/6/2026 ၼၼ်ႉဝႃႈ- ပႆႇမီးၽႅၼ်ၵၢၼ်တႃႇႁဵတ်းပၼ်ဝႂ်လၢႆႊသိၼ်ႊ ရူတ်ႉၶိူင်ႈလႄႈရူတ်ႉၵႃးၼႂ်းမိူင်းတႆး ။ တေႁဵတ်းပၼ်ရူတ်ႉၵႃးဢၼ်လုၵ်ႉတီႈႁွင်ႈၵၢၼ်ၾၢႆႇတေႃႉသူင်ႇလူင်ပွင်ၸိုင်ႈ ၼမ်းၶဝ်ႈပဵၼ်တၢင်းၵၢၼ်ၼၼ်ႉၵူၺ်း၊ ရူတ်ႉၵၼ်လၵ်ႉဢဝ်ၶဝ်ႈမိူင်းၼႆႉဢမ်ႇႁဵတ်းပၼ်ဝႂ်လၢႆႊသိၼ်ႊ -ဝႃႈၼႆ။

တွၼ်ႈတႃႇတေၵုမ်းလႆႈ ရူတ်ႉၸိူဝ်းလၵ်ႉဢဝ်ၶဝ်ႈမိူင်းသဵၼ်ႈတၢင်းလႅၼ်လိၼ် လႄႈသဵၼ်ႈတၢင်းၼမ်ႉၼၼ်ႉၼႆသေ သိုၵ်းမၢၼ်ႈပိုၼ်ၽၢဝ်ႇသင်ႇၵိုတ်းလွင်ႈႁဵတ်းပႂ်ဝႂ်လၢႆႊသိၼ်ႊ ၸဵမ်မိူဝ်ႈပီဢွၼ် 2023 ။

ၸၢႆးသႅင်ဢၢႆႈ- တႅမ်ႈၾၢႆႇမၢၼ်ႈ