သိုၵ်းမၢၼ်ႈၶဝ်ႈတီႉၺွပ်းၼၢင်းယိင်း ၵူၼ်းမိူင်းဝဵင်းဢေးတႃႇယႃႇၵေႃႉၼိုင်ႈ ဢၼ်ႁဵတ်းလွင်ႈတူင်ႉၼိုင် ၼႂ်းဝၼ်းၵိူတ်ႇ တေႃႇဢွင်ႇသၢၼ်းၸူႉၵျီႇသေ တၢင်ႇၼိူဝ်သိုဝ်ႇ TikTok ။
မိူဝ်ႈဝႃး ၼႂ်းဝၼ်းတီႈ 19 လိူၼ်ၵျုၼ်ႊ 2026 ဝၼ်းၵိူတ်ႇတေႃႇဢွင်ႇသၢၼ်းၸူႉၵျီႇ ဢႃယုၶွပ်ႈတဵမ် 81 ပီ ၸုမ်းၸိူဝ်းတူင်ႉၼိုင်တႃႇတီႊမူဝ်ႊၶရေႊၸီႊ တင်ႈႁူဝ်ၶေႃႈဝႃႈ “နှင်းဆီ လှုပ်ရှားမှု – Rose Movement: Roses of Hope” ၼႆသေ ဢဝ်မွၵ်ႇမၼ်းမူၺ်(မွၵ်ႇၼၢင်းသီ) သႂ်ႇမေႃႈၼမ်ႉၽြႃး၊ ဢဝ်မႃးပၵ်းတီႈၶူၼ်ႁူဝ် သေ ထၢႆႇႁၢင်ႈတၢင်ႇသိုဝ်ႇၼႅင်ႈသၢၼ် ။
ၼႂ်းၼၼ်ႉ မၼွႆႇၼွႆႇ ဢႃယု 30 ပၢႆ ယူႇဝဵင်းဢေးတႃႇယႃႇ ဝဵင်းတူၼ်ႈတီးၵေႃႈ ၼုင်ႈသိူဝ်ႈသီလႅင် ယိပ်းမွၵ်ႇမၼ်းမူၺ်သီလႅင် တင်းၽဵင်းၵႂၢမ်းၵူၼ်းၼုမ်ႇၸိူဝ်းသၢၼ်ၶတ်းၸဝ်ႈဢႃႇၼႃႇသိုၵ်းဢၼ်မီးၸိုဝ်ႈဝႃႈ “GZ တို့၏ တိုက်ပွဲခေါ်သံ” ၼၼ်ႉသေတၢင်ႇၼိူဝ်သိုဝ်ႇ TikTok မၼ်းၼၢင်း ။
ဝၢႆးၼၼ်ႉပလိၵ်ႈသိုၵ်းမၢၼ်ႈၶဝ်ႈတီႉၺွပ်းမၼ်းၼၢင်း တီႈၼႂ်းပွၵ်ႉ 2 ဝဵင်းဢေးတႃႇယႃႇ ။ ယၢမ်းလဵဝ် ထုၵ်ႇၵုမ်းၶင်တူဝ် တီႈဝဵင်းဢေးတႃႇယႃႇ သေဢဝ်လိူင်ႈဝႆႉလူၺ်ႈတၢင်းပၵ်းပိူင်မၢႆမီႈ 505- က ၼႆယဝ်ႉ ။
ၼၢင်းယိင်းဝဵင်းတူၼ်ႈတီးလၢတ်ႈၽူႈတွႆႇႁွၵ်ႈဝႃႈ -“ မိူဝ်ႈဝႃးၼႆႉၵေႃႈ ပလိၵ်ႈၶဝ်ႈတီႉၺွပ်းထႅင်ႈ ၼၢင်းယိင်းၵေႃႉၼိုင်ႈ တီႈဢေးတႃႇယႃႇ ၼႆ ။ မၼ်းၼုင်ႈသိူဝ်ႈသီလႅင် ယိပ်းမွၵ်ႇမၼ်းမူၺ်သီလႅင်သေ တၢင်ႇၼိူဝ် TikTok မၼ်းလႄႈဝႃႈ ပလိၵ်ႈၶဝ်ၸင်ႇၶဝ်ႈတီႉၼႆ ၊ လွင်ႈ KTV လိူင်ႇ ၽူႈလၵ်ႉၵူၼ်းၸူၼ် ၼၢင်းယိင်းထုၵ်ႇၵႃႉၶၢႆ ယူႇၼႆႉၶဝ်ဢမ်ႇႁဵတ်းပၼ် ဢမ်ႇပုၼ်ႈၽွၼ်းပၼ် လွင်ႈၸိူဝ်းၼႆႉတႄႉ ၶဝ်ၶဝ်ႈတီႉၼႄ ၶဝ်ၶႂ်ႈလွၵ်ႇၵူၼ်းမိူင်း ၶႂ်ႈႁဵတ်းၼႄၵူၼ်းမိူင်းႁႂ်ႈၵူဝ်ၵူၺ်း ”- ဝႃႈၼႆ ။
မိူၼ်ၼင်ႇၼႆ ၼႂ်းလိူၼ် မေႊပူၼ်ႉမႃးၼၼ်ႉၵေႃႈ ၼၢင်းယိင်း ၵူၼ်းဝဵင်းတူၼ်ႈတီး ၵေႃႉၼိုင်ႈၵေႃႈ ၺႃးမၢပ်ႇမႂ်ႇဝႃႈ ၵႂႃႇတႅမ်ႈတၢင်းႁၼ်ထိုင် တႂ်ႈၽဵင်ႈၵႂၢမ်း “လရောင်အောက်က ကုမုဒြာ” ဢၼ်တႅမ်ႈဝႆႉလွင်ႈ ၽူႈဢွၼ်ႁူဝ်သိုၵ်းမၢၼ်ႈ ၼႆသေ ၺႃး သိုၵ်းမၢၼ်ႈ တီႉၺွပ်းၼင်ႇၵဝ်ႇ။
ၸွမ်ႁၢၼ် မိၼ်းတူႇ ၵႅမ်ၽွင်းလူင်ၾၢႆႇၼႂ်းမိူင်း ၸုမ်းလူင်ပွင်ၸိုင်ႈသိုၵ်းယိုတ်းမိူင်း လၢတ်ႈၵႂႃႇတီႈၼႂ်းပၢင်ၵုမ် တႅၼ်းၽွင်းၵူၼ်းမိူင်း ၼႂ်းဝၼ်းတီႈ18 လိူၼ်ၵျုၼ်ႊၼၼ်ႉဝႃႈ – လႆႈပၵ်းတႃပႂ်ႉတူၺ်းၸွမ်း ၵူၼ်းၸိူဝ်းပိုၼ်ၽႄႈ ၶၢဝ်ႇပွမ်ၶၢဝ်ႇၽၢင်း လႄႈ ၵူၼ်းၸိူဝ်းလၢတ်ႈသေႃႇသူၼ်း တိုၵ်းတေႃး ၾၢႆႇတၢင်းၵၢၼ်မိူင်း ၸိူဝ်းၼႆႉယူႇ။ ၸွမ်းၼင်ႇပၵ်းပိူင် မၢႆမီႈ ၽဵဝ်ႈမူၺ်ႉတိုၵ်းတေႃး လွင်ႈၵေႃႇၵၢၼ်ႁၢႆႉ ပီ 2014 မတ်ႉတႃ 50၊ 52၊ 505- က ၸိူဝ်းၼႆႉသေ လႆႈၵူတ်ႇထတ်းဢဝ်လိူင်ႈဝႆႉယူႇ ဝႃႈၼႆ။
တႄႇဢဝ်ပီ 2024 တေႃႇထိုင် လိူၼ်မေႊ ပီ 2026 (ၼႂ်းၶၢဝ်းတၢင်း 2 ပီပၢႆၼႆႉ) ၵူၼ်းၸိူဝ်းၺႃးတီႉၺွပ်း ဢဝ်လိူင်ႈ ယွၼ်ႉမတ်ႉတႃ 50၊ 52 မီးႁိမ်းၸမ် 14000 ၵေႃႉ၊ ၸိူဝ်းၺႃးဢဝ်လိူင်ႈယွၼ်ႉမတ်းတႃ 505-က သမ်ႉ မီးႁိမ်းၸမ် 2000 ၵေႃႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ