ဝၼ်းတီႈ 19/06/2026 ၼႆႉပဵၼ်ဝၼ်းၵိူတ်ႇ ၻေႃႇဢွင်ႇသၢၼ်းၸူႉၵျီႇ ၶွပ်ႈတဵမ် 81 ပီ လႄႈ ၵူၼ်းၼုမ်ႇမိူင်းမၢၼ်ႈ ၸိူဝ်းယူႇၼႂ်းမိူင်း ၼွၵ်ႈမိူင်း တင်းလုမ်ႈၾႃႉ ၸူဝ်းၵၼ်ႁဵတ်းလွင်ႈတူင်ႉၼိုင်” ROSE Movement: Roses of Hope” ၽွမ်ႉၽွမ်ႉၵၼ်ဝႃႈၼႆ။

လွင်ႈတူင်ႉၼိုင်ပၢင်ၼႆႉ တေပဵၼ်ပၢင်ႁႅၵ်ႈလႄႈ ပၢင်ယႂ်ႇသုတ်းၼႂ်းပီ 2026 ။ တေႁဵတ်းၽွမ်ႉၵၼ်တင်း Campaign – “Proof of Life” ။ တေႁဵတ်းၵူႈပိုၼ်ႉတီႈ ပႃးၸဵမ်ၼႂ်းပိုၼ်ႉတီႈ လွတ်ႈလႅဝ်းလႄႈၼႂ်းပိုၼ်ႉတီႈ သိုၵ်းမၢၼ်ႈၽွင်းငမ်း။ တေဢွၼ်ၵၼ်ၶၢၼ်ပၢၵ်ႇဢွၵ်ႇသဵင်ဝႃႈ “ ၶဝ်ႈပၢင်တိုၵ်းၸွမ်း ဢွင်ႇသၢၼ်းၸူႉၵျီႇ ” ၼႆသေ တေႁဵတ်းၵႂႃႇၾၢင်ႁၢင်ႈၸေးလၢႆး ႁင်းၽႂ်မၼ်း ႁႂ်ႈပေႃးဢွင်ႇမၢၼ်ထိုင်တီႈ ၼႄလႆႈလုမ်ႈၾႃႉႁူႉၸွမ်းလွင်ႈတၢင်းၶတ်းၸႂ်တီႊမူဝ်ႊၶရေႊသီႊ ၵူၼ်းမိူင်းမၢၼ်ႈ ဝႃႈၼႆ။

ၵူၼ်းမိူင်းၸိူဝ်းၶဝ်ႈႁူမ်ႈၸွမ်းလွင်ႈတူင်ႉၼိုင်ၼႂ်းဝၼ်းတီႈ 19 ၼႆႉ – တေတၢင်ႇၶႅပ်းႁၢင်ႈတီႈသိုဝ်ႇၼႅင်ႈသၢၼ် ဢၼ်ပဵၼ်ၶႅပ်းႁၢင်ႈ မွၵ်ႇမၼ်းမူၺ်(ၼိၼ်းသီႇ) ဢၼ်ယူႇတီႈတူၼ်ႈ ၊ဢၼ်ပိတ်းမႃးသႂ်ႇမေႃႈၼမ်ႉၽြႃး၊ ဢၼ်ဢဝ်မႃး တႅင်ႇတၢင်းႁၢင်ႈလီ၊ သင်ဢမ်ႇမီးမွၵ်ႇမၼ်းမူၺ် ဢဝ်မွၵ်ႇသင်ၵေႃႈလႆႈ။ ပေႃးပဵၼ်ၵူၼ်းၸိူဝ်းတူင်ႉၼိုင်ၼႂ်းပိုၼ်ႉတီႈသမ်ႉ တေယိပ်းမွၵ်ႇမၼ်းမူၺ် သေ ဢွၵ်ႇပႆတၢင်းၼႄၵၢင်ၸႂ် – ၾၢႆႇတၢင်းၸုမ်းဢွၼ်တူင်ႉၼိုင် ပိုၼ်ၽၢဝ်ႇဝႆႉၼင်ႇၼႆ။

တွၼ်ႈတႃႇပၢင်တူင်ႉၼိုင်ႁူမ်ႈၵၼ်တင်းလုမ်ႈၾႃႉပွၵ်ႈၼႆႉ တေမီးၶေႃႈတုၵ်းယွၼ်း 3 ၶေႃႈ မိူၼ်ၼင်ႇ- ႁႂ်ႈပွႆႇပၼ်ဢွင်ႇသၢၼ်းၸူႉၵျီႇ လႄႈ ၵူၼ်းတူၵ်းၶွၵ်ႈၵၢၼ်မိူင်းတင်းမူတ်း ဝႆးဝႆးလူၺ်ႈဢမ်ႇမီးၶေႃႈၼွင်ႇ ငိူၼ်ႈၶႆသင်။ ႁႂ်ႈယႃႉပႅတ်ႈပၵ်းပိူင်မၢႆမီႈၵူၼ်းမိူင်းႁၢပ်ႇၵၢၼ်သိုၵ်းၼၼ်ႉၵမ်းလဵဝ် လႄႈ ယူႇတီႈၵူၼ်းမိူင်းတႄႉ မၵ်းမၼ်ႈ ၸွမ်ၸိုင်ႈၼႆႉပဵၼ်ဢူးဝိၼ်းမျိၼ်ႉၵူၺ်း – ၽူႈၵိူဝ်းၵုမ်ၸိုင်ႈမိူင်းပဵၼ် ဢွင်ႇသၢၼ်းၸူႉၵျီႇ ၵူၺ်း – ၸဵမ်ၸိူဝ်းၼႆႉ။

ၼႂ်းလိၵ်ႈပိုၼ်ၽၢဝ်ႇဢၼ်ၸုမ်းၵူၼ်းၼုမ်ႇပိုၼ်ဢွၵ်ႇဝႆႉတႃႇႁဵတ်းလွင်ႈတူင်ႉၼိုင်ၼႆႉၼၼ်ႉပႃးဝႆႉဝႃႈ – သိုၵ်းမၢၼ်ႈၼႆႉယူႇတီႈလၢႆလၢႆမိူင်းၼႂ်းလုမ်ႈၾႃႉပၼ်ႁႅင်းဢီးသေ ပွႆႇပၼ်ၵူၼ်းတူၵ်းၶွၵ်ႈၵၢၼ်မိူင်း ယူႇသေတႃႉၵေႃႈ တူဝ်ဢွင်ႇသၢၼ်းၸူႉၵျီႇသမ်ႉဢမ်ႇႁတ်းပွႆႇတႄႉတႄႉ – ယၢမ်းလဵဝ်ၶၢႆႉတီႈယူႇဝႃႈၵႂႃႇၵုမ်းၶင်ၵိုၵ်းႁိူၼ်း ၼႆသေ မီးယူႇတီႈလႂ်ဢမ်ႇႁူႉ။ ပွႆႇပၼ်ဢူးဝိၼ်းမျိၼ်ႉသေတႃႉ ပၵ်းတႃပႂ်ႉတူၺ်းဝႆႉ ဢမ်ႇပၼ်သုၼ်ႇတူင်ႉၼိုင်ႁဵတ်းသင်။ ၵူၼ်းတူၵ်းၶွၵ်ႈၵၢၼ်မိူင်းၸိူဝ်းပႆႇပူၼ်ႉတူတ်ႈတၢမ်ႇၵေႃႈ ထုၵ်ႇသိုၵ်းမၢၼ်ႈ ဢဝ်ပဵၼ်ၶိူင်ႈမိုဝ်းၼႂ်းၵၢၼ်တေႃႇလွင်းၵၢၼ်မိူင်း။

သိုၵ်းမၢၼ်ႈၼႆႉ ၾၢႆႇၼႃႈ ၶိၼ်ႁဵတ်းၼႄ လွင်ႈၵတ်းယဵၼ်ၼိမ်တဵင်ႈယူႇသေတႃႉ လပ်ႉလင်/ၼႂ်းလုမ်းၼႂ်းၸႆးတႄႉမီးလွင်ႈၵိၼ်သူးၵိၼ်လၢပ်ႈ ၊ ပၵ်းပိူင်ဢမ်ႇသုမ်ႇငမ်း ၊ ၵူၼ်းမိူင်းထုၵ်ႇၶီႇၼဵၵ်းတဵၵ်းတဵင် ပူၼ်ႉပႅၼ်သုၼ်ႇလႆႈ။ တီႉၺွပ်းၵူၼ်းမိူင်းၵူၼ်းၼုမ်ႇၵႂႃႇႁဵတ်းသိုၵ်း၊ ၸႂ်ႉၶိုၼ်ႈၼႃႈသိုၵ်းသေၵႂႃႇတၢႆ ၼႂ်းပၢင်တိုၵ်းတင်းၼမ်တင်းလၢႆ- ပႃးဝႆႉၼင်ႇၼႆ။

ၶေႃႈပိုၼ်ၽၢဝ်ႇလႄႈလွင်ႈတူင်ႉၼိုင်ၼႆႉ ပဵၼ်ၸုမ်း People Movement Platform ၶဝ် ဢွၼ်ၼမ်းၸတ်းႁဵတ်း။

ၸုမ်းၼႆႉ ယၢမ်ႈႁဵတ်းလွင်ႈတူင်ႉၼိုင် သၢၼ်ၶတ်းပၢင်လိူၵ်ႈတင်ႈပွမ် Anti-Sham Election Campaign လူၺ်ႈလၢႆးတၢင်း People Survey၊ Silent Strike၊ Comment Campaign
လႄႈ Profile Campaign ၸိူဝ်းၼႆႉ။ တေႃႇထိုင်ပေႃးလႆႈၾႅတ်ႊတရႄႊ တီႊမူဝ်ႊၶရေႊသီႊ ၸိုင်ႈမိူင်းၼင်ႇယိူင်းဢၢၼ်းဝႆႉၼၼ်ႉ တေႁူမ်ႈမိုဝ်းၵၼ်တင်းၸုမ်းၼွၵ်ႈမိူင်းၼႂ်းမိူင်းသေ တေႁဵတ်းသၢင်ႈၶိုၼ်ႈၼႃႈၵႂႃႇတိၵ်းတိၵ်း – ပႃးဝႆႉၼႂ်းလိၵ်ႈပိုၼ်ၽၢဝ်ႇၶဝ်ၼင်ႇၼႆ။