သိုၵ်းတဢၢင်း TNLA ၵဵပ်းၶွၼ်ႇၵူၼ်းၶၢႆၶူဝ်းၼႂ်းၵၢတ်ႇၼမ်ႉၶမ်း ႁၢဝ်ႈႁႅင်း ထပ်းၵၼ်၊ ယွၼ်းၶွၼ်ႇ သုင်လႄႈ ၵူၼ်းၶၢႆၶူဝ်းၵိၼ်းၸႂ် ၽွမ်ႉၵၼ်တေၼႄၵၢင်ၸႂ်လူၺ်ႈလၢႆးဢမ်ႇပိုတ်ႇႁၢၼ်ႉၶၢႆၶူဝ်းၼႂ်းၵၢတ်ႇ 3 ဝၼ်း ဝႃႈၼႆ။
ၵူၼ်းၶၢႆၶူဝ်းၵုၼ်ႇၼႂ်းၵၢတ်ႇၼမ်ႉၶမ်းၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ပေႃးပဵၼ်ႁၢၼ်ႉၶၢႆၶူဝ်းၵုၼ်ႇ ၵိၼ်ယႅမ်ႉ (ၵူင်ႇၸူင်ႇသႅင်ႇ) ၼႆ ၶဝ်ယွၼ်း တီႈၵႄႇသုတ်း 6 သႅၼ်ပျႃး။ ႁဝ်းၶႃႈ ဢွၼ်ၵၼ်ယွၼ်းသဵတ်ႈ လႄႈ တႅမ်ႇသုတ်းလႆႈပၼ် 350000 ပျႃး။ ၵူႈပွၵ်ႈ လႆႈသႂ်ႇ 1 ပီၼိုင်ႈပွၵ်ႈ ပီၼႆႉ ထပ်းၵၼ်လၢႆၵမ်းယဝ်ႉ ၶဝ်ယွၼ်းၼႆႉ ။ 2-3လိူၼ်ၼိုင်ႈပွၵ်ႈၼႆႁဝ်းၶႃႈၵေႃႈဢမ်ႇပဵၼ်လႆႈ။ ၶၢႆၶူဝ်း 2-3 လိူၼ် ယင်းဢမ်ႇမီး ၼမ်ႉတွၼ်း 3 သႅၼ်ၶႃႈလူး။ ႁဝ်းၶႃႈၵူၼ်းၶၢႆၶူဝ်းၼႂ်းၵၢတ်ႇဢမ်ႇပဵၼ်လႆႈယဝ်ႉ တေၽွမ်ႉၵၼ်ၼႄၵၢင်ၸႂ် တေပိၵ်ႉၵၢတ်ႇ ၶႃႈဢေႃႈ ဝၼ်းတီႈ 13 တေႃႇထိုင်ဝၼ်းတီႈ 17 ၶႃႈဢေႃႈ ”- ဝႃႈၼႆ။
သိုၵ်းတဢၢင်း TNLA ၼႆႉ တင်ႈဢဝ်လိူၼ်ၼူဝ်ႊဝႅမ်ႊပိူဝ်ႊ မႃးတေႃႇထိုင်ယၢမ်းလဵဝ် ယွၼ်းၶွၼ်ႇတီႈ ႁၢၼ်ႉၶၢႆ ၶူဝ်းၼႂ်းဝဵင်းၼမ်ႉၶမ်းၵူႈႁၢၼ်ႉ။ ဝူင်ႈပူၼ်ႉမႃးၼႆႉသမ်ႉ ၵူၼ်း TNLA 2-3 ၵေႃႉ ဢဝ်ဝႂ်ဢၼ်ပႃးၸိုဝ်ႈလႄႈတီႈၵပ်းသိုပ်ႇ TNLA ၼၼ်ႉ ၸႅၵ်ႇၼႂ်းၵၢတ်ႇ လူင်ၼမ်ႉၶမ်း ၵူႈႁၢၼ်ႉ ပႃးၸဵမ်ၵူၼ်းၶၢႆထူဝ်ႇၽူး ထူဝ်ႇၼဝ်ႈ ၽၵ်းယိူဝ်ႈၼၢင်းၶဵဝ် ၵေႃႈဢမ်ႇဝႆႉ ၵူၼ်းၼမ်ႉၶမ်းလၢတ်ႈၼင်ႇၼႆ။
“ၵူၼ်းမႃးပၼ် ဝႂ်တႃႇသႂ်ႇၶွၼ်ႇၼၼ်ႉ ယင်းလွၵ်ႇပႃးသေၵွၼ်ႇဢေႃႈ ၽႂ်ဢမ်ႇၵႂႃႇသႂ်ႇ ဢမ်ႇလႆႈ ၼႆ။ ပေႃးသိုပ်ႇၾူၼ်းၸူးၶဝ်ယဝ်ႉၼႆ ၶဝ်တေဝႃႈ ႁၢၼ်ႉသူၼႆႉ တေလႆႈပၼ်ၶွၼ်ႇ 7 သႅၼ် ဢမ်ႇၼၼ် 10 သႅၼ် ဢမ်ႇၼၼ် ၵႃႈႁိုဝ်ၼႆၶဝ်တေလၢတ်ႈမႃး။ ယဝ်ႉၵေႃႈတေၶိၼ်းႁဝ်းၵႂႃႇပၼ်ၶဝ် တီႈၼၼ်ႈတီႈၼႆႈ မၢင်ၵေႃႉ ၺႃးၶိၼ်းၵႂႃႇပၼ်းတၢင်း ၶူင်ႇႁိူဝ်းမိၼ်၊ ၵမ်ႈၽွင်ႈ ပၢင်ႇလူင်၊ မၢင်ၵေႃႉလႆႈၵႂႃႇပၼ် ၵၢင်တၢင်း တီႈၼၼ်ႈ တီႈၼႆႈ ၼႆဢေႃႈ ၵေႃႉၼိုင်ႈလႄႈၵေႃႉၼိုင်ႈဢမ်ႇမိူၼ်ၵၼ်ၶႃႈတီႈမၼ်းၵေႃႈ ”- ၵူၼ်းၶၢႆၶူဝ်းၼႂ်းၵၢတ်ႇၼမ်ႉၶမ်းၼၼ်ႉလၢတ်ႈၼင်ႇၼႆ။
ၼႂ်းဝဵင်းၼမ်ႉၶမ်းၼႆႉ မီးၵၢတ်ႇ 3 တီႈ ။ မိူဝ်ႈၼႆႉ ၸဝ်ႈႁၢၼ်ႉၶၢႆၶူဝ်းၼႂ်းၵၢတ်ႇလူင် ၵမ်ႈၽွင်ႈၵမ်ႈၼမ် ဢွၼ်ၵၼ်တေႃႉၶူဝ်း ၵႃႈၶၼ်ယႂ်ႇၶဝ်မိူဝ်းဝႆႉတီႈႁိူၼ်းၽႂ်မၼ်းယူႇယဝ်ႉ၊ ပေႃးပဵၼ်လႆႈတႄႉ ၶႂ်ႈႁႂ်ႈ ၸုမ်းယိပ်းၵွင်ႈၵၢင်ႇၵူႈၸုမ်း ပွင်ႇၸႂ်ပၼ်လွင်ႈၵူၼ်းမိူင်းႁႃၵိၼ်ယၢပ်ႇၼႆႉသေလူတ်းယွၼ်ႇ ပၼ်လွင်ႈသႂ်ႇၶွၼ်ႇၼႆႉသေၵမ်း ၵူၼ်းၶၢႆၶူဝ်း ၼႂ်းၵၢတ်ႇၼမ်ႉၶမ်း တုၵ်းယွၼ်းၼင်ႇၼႆ။
လွင်ႈၼႆႉ ၽူႈၶၢၼ်ပၢၵ်ႇ TNLA တႃႉဢၢႆႈၵျေႃႇ ယၢမ်ႈလၢတ်ႈတီႈၽူႈတွႆႇႁွၵ်ႈဝႃႈ ဢမ်ႇၸႂ်ႈတဵၵ်းငႅၼ်ႉယွၼ်းၶွၼ်ႇ။ ဢၼ်ထုၵ်ႇလီၵဵပ်းၼၼ်ႉ ၸဝ်ႈၼႃႈတီႈ ၾၢႆႇၵဵပ်းၶွၼ်ႇ တူၺ်းတူၺ်းသေယွၼ်းၵႂႃႇၼင်ႇၵႃႈၵူၼ်းမိူင်းပဵၼ်လႆႈၼၼ်ႉၵူၺ်း ဝႃႈၼႆ။
ၸဝ်ႈႁၢၼ် မၢႆးဢၢႆႈၵျေႃႇယၢမ်ႈလၢတ်ႈတီႈၽူႈတွႆႇႁွၵ်ႈဝႃႈ – “ ဢမ်ႇၵဵပ်းၼမ်လူၼ်ႉလိူဝ် ဢမ်ႇႁႂ်ႈမၼ်း လိူဝ်မႃႇ လိူဝ်ႁႅင်းၵူၼ်းမိူင်းၼင်ႇၵဝ်ႇ။ ဢမ်ႇႁႂ်ႈမၼ်းပဵၼ်ႁၢပ်ႇၼၵ်းၵူၼ်းမိူင်းၼင်ႇၵဝ်ႇ။ ၵဵပ်းတၢၼ်ႇ တၢၼ်ႇ မၼ်းၵူၺ်းၶႃႈ။ ၼိုင်ႈပီၼႆႉ ႁဝ်းႁႂ်ႈ ထၢမ်းပၼ် ၼိုင်ႈပွၵ်ႈၵူၺ်း။ ဢမ်ႇၵႃးတီႈဝဵင်းၼမ်ႉၶမ်း ၵူၺ်းၶႃႈ ၼႂ်းၼႃႈလိၼ်ဢၼ်ႁဝ်းၶႃႈတူင်ႉၼိုင်ၼၼ်ႉ ႁဝ်းၶႃႈၵဵပ်းၶႃႈဢေႃႈ။ ၵမ်ႈၽွင်ႈၵေႃႈၶႂ်ႈၸွႆႈထႅမ် ၸုမ်းႁဝ်းသေ မႃးသူင်ႇႁင်းၵူၺ်း၊ ၵမ်ႈၽွင်ႈၵေႃႈ ပေႃးႁွင်ႉယွၼ်း ၸင်ႇ သူင်ႇပၼ် ၸိူင်ႉၼႆဢေႃႈ။ ” – ဝႃႈၼႆ။
ၵူၼ်းၶၢႆၶူဝ်းၵိုၵ်းႁိူၼ်းၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ- “ၾၢႆႇၼိုင်ႈသမ်ႉၵၢၼ်မိူင်းလႄႈႁႃၵိၼ်ယၢပ်ႇ၊ ၾၢႆႇၼိုင်ႈၵေႃႈ တၢင်းပဵၼ်ၶူဝ်ႊဝိတ်ႉလႄႈ ႁႃၵိၼ်ယၢပ်ႇ။ ယၢမ်းၼႆႉသမ်ႉမီးၸုမ်းသိုၵ်းၸုမ်းၼိုင်ႈယဝ်ႉ ၸုမ်းၼိုင်ႈမႃးယွၼ်းၶွၼ်ႇထႅင်ႈ။ ဢမ်ႇလီယူႇသေဢိတ်းယဝ်ႉၶႃႈဝဵင်းၼမ်ႉၶမ်းၼႆႉ။ ၵူၼ်းမိူင်းတုၵ်ႉၶ ၼႃႇယဝ်ႉ။ ဢၼ်ပၢႆႈၵႂႃႇယူႇတၢင်ႇတီႈၵေႃႈၵႂႃႇ။ ၸိူဝ်းဢမ်ႇပၢႆႈ ၵမ်ႈၽွင်ႈ သမ်ႉပေႃးၶႂ်ႈဢိုပ်းယူႇ ပဵၼ်ၵမ်းယဝ်ႉဢေႃႈ ။ လွင်ႈႁူမ်ႇလူမ်ႈၵေႃႈဢမ်ႇမီး၊ ၵၢၼ်ႁႃၵိၼ်သမ်ႉယၢပ်ႇ၊ ဢမ်ႇမီးၽႂ် ၸုမ်းလႂ် ၸွႆႈၵူၼ်းမိူင်းယဝ်ႉၶႃႈ”- ဝႃႈၼႆ။
တီႈဝဵင်းၼမ်ႉၶမ်းၼႆႉ ၼႂ်းပီ 2021 ၼႆႉ ၵူၼ်းမိူင်းလႆႈပၼ်ၶွၼ်ႇၼမ်လိူဝ်ပိူၼ်ႈၼႆႉပဵၼ် တီႈ သိုၵ်း TNLA တီႈသွင်သမ်ႉပဵၼ် SSPP တီႈသၢမ်သမ်ႉပဵၼ် သိုၵ်းၶၢင် KIA လႄႈ သိုၵ်း RCSS ၵေႃႈ ယွၼ်းယူႇ ၼိုင်ႈပီ ၼိုင်ႈပွၵ်ႈ – ၸဝ်ႈႁၢၼ်ႉၶၢႆၶူဝ်းၼၼ်ႉလၢတ်ႈၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ