မိူဝ်ႈၼႆႉ ဝၼ်းတီႈ 9/12/2021 ယၢမ်းၵၢင်ၼႂ် RCSS တင်း SSPP ယိုဝ်းၵၼ် ႁိမ်းဝၢင်ႈမိူင်းလႄႈ ၵူၼ်းဝၢၼ်ႈ ဢၼ်ပၢႆႈၽေးမႃးမီး တီႈၵျွင်းမုၼ်ၸဝ်ႈ ဝၢင်ႈမိူင်းၼၼ်ႉ သိုပ်ႇပၢႆႈၵႂႃႇတၢင်း ႁၢမ်းငၢႆး – ဢၼ်မီးၼႂ်းၵႄႈ ၵေးသီး – မိူင်းၵိုင်။
မိူဝ်ႈဝႃး တင်းမိူဝ်ႈၼႆႉ သိုၵ်းသွင်ၸုမ်း တိုၵ်းတေႃးၵၼ် ၼႂ်းၵႄႈ ႁၢမ်းငၢႆး တင်း ဝၢင်ႈမိူင်း ၸႄႈဝဵင်းမိူင်းၵိုင် ၸႄႈတွၼ်ႈ လွႆလႅမ်။ ပၢင်တိုၵ်းၼႆႉ ႁဵတ်းႁႂ်ႈၵူၼ်းဝၢၼ်ႈၵုင်းၶမ်း၊ ၽႃလၢမ်း၊ ဝၢၼ်ႈပႅၵ်ႇ၊ ဝၢၼ်ႈၼႃးမူၼ်း၊ ဝၢၼ်ႈပၢင်ႇၼွင် တင်း ဝၢၼ်ႈၼႃးၽွၵ်း ၸိူဝ်းၼႆႉ ၵူၼ်းဝၢၼ်ႈလႆႈပၢႆႈ ဢွၵ်ႇမႃး တင်းဝၢၼ်ႈ ။ ဢၼ်ၺႃးတၢမ်ႇသိုၵ်း လင်ႁိူၼ်း 400 ပၢႆ ႁူဝ်ၵူၼ်း 1,000 ပၢႆ ။
ၵူၼ်းပိုၼ်ႉတီႈ မိူင်းၵိုင် လၢတ်ႈတီႈၽူႈတွႆႇႁွၵ်ႈဝႃႈ -“ ၵူၼ်းပၢႆႈၽေးဢၼ်မႃးမီး တီႈၵျွင်းလူင်ဝၢင်ႈမိူင်း ၼၼ်ႉမိူဝ်ႈၼႆႉ လႆႈပၢႆႈမႃးတီႈၵျွင်းၵုင်းၸူင် ဢိူင်ႇႁၢမ်းငၢႆးဢေႃႈ။ တိုၵ်ႉပၢႆႈဢွၵ်ႇဝၢၼ်ႈမႃးယူႇတိၵ်းတိၵ်းဢေႃႈ”- ဝႃႈ ၼႆ။
ၵူၼ်းမိူင်းၵိုင် ၵမ်ႈၼမ်တႄႉ ဢွၼ်ၵၼ်ၶၢင်းပွင်ႉဝႃႈ တၢင်းပဵၼ်ၶူဝ်ႊဝိတ်ႉ 19 ၽႄႈ၊ ၵၢၼ်မိူင်းသုၵ်ႉ၊ သိုၵ်းသွင်ၸုမ်းၼႆႉ သမ်ႉမႃးယိုဝ်းၵၼ်၊ ဢမ်ႇပၼ်ၽွၼ်းလီသင်သေဢိတ်း ၼႆ ၸဝ်ႈတူၼ်ႈၶူး ၸဝ်ႈၼိုင်ႈ ပူင်လၢတ်ႈၼင်ႇၼႆ။
“သိုၵ်းဢၼ်ဝႃႈၼႆႉ တႃႇၵႅတ်ႇၵင်ႈၸိူဝ်ႉၸၢတ်ႈ ၼႆႉသမ်ႉၵုမ်ႇယိုဝ်းၵၼ်ယူတိၵ်းတိၵ်း၊ ဢၼ်ၶၢၼ်းၶွၼ်ႇ၊ ၶၢၼ်းငိုၼ်း၊ ၶၢၼ်းၶဝ်ႈ ၵဵပ်းၵႃႈ ရူတ်ႉၵႃႈၵႃး ဢၼ်လႅၼ်ႈၼိူဝ် တၢင်းၵေႃႈ မိူၼ်ၵၼ် တင်းသွင်ၸုမ်းယဝ်ႉ၊ ဢီးလူၵူၼ်းမိူင်းတႄႉ” – ၸဝ်ႈတူၼ်ၶူး ပူင်လၢတ်ႈၼင်ႇၼႆ။
သိုၵ်းသွင်ၸုမ်း ဢၼ်ယိုဝ်းၵၼ်သေႁဵတ်းႁႂ်ႈၵူၼ်းမိူင်းလႆႈပၢႆႈ ယၢပ်ႇၽိုတ်ႇတုၵ်ႉၶ ယူႇယၢမ်းလဵဝ်ၼႆႉ ၸုမ်းၼိုင်ႈ လူင်းလၢႆးမိုဝ်း ပႆၸွမ်း သဵၼ်ႈတၢင်း NCA သေ ဢမ်ႇမီးၽႅၼ် တႃႇယိုဝ်းၸုမ်းသိုၵ်းမၢၼ်ႈ ယိုတ်းဢႃႇၼႃႇ၊ ၸုမ်းၼိုင်ႈသမ်ႉ ဢမ်ႇလူင်းလၢႆးမိုဝ်း NCA ဢမ်ႇႁၼ်လီၸွမ်း NCA သေတႃႉ သမ်ႉလီၵၼ်တင်း ၸုမ်းသိုၵ်းမၢၼ်ႈ မိူၼ်ၵၼ်ၼင်ႇၵဝ်ႇ။
