မိူဝ်ႈၼႆႉ ဝၼ်းတီႈ 8/12/2021 ယၢမ်းၵၢင်ၼႂ် သဵင်ၵွင်ႈတႅၵ်ႇႁိမ်းဝၢၼ်ႈပၢင်ႇၵွင်းမူးသၢႆးလႄႈ ဝၢၼ်ႈၵုင်းၶမ်း ၼႂ်းၵႄႈဢိူင်ႇႁၢမ်းငၢႆး – ဢိူင်ႇဝၢင်ႈမိူင်း ၼႂ်းၸႄႈဝဵင်းမိူင်းၵိုင် ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း  ၵူၼ်းမိူင်း  လၢႆလၢႆဝၢၼ်ႈ ႁူဝ်ၵူၼ်းႁဵင်ပၢႆ လႆႈပၢႆႈၽေးသိုၵ်း  ။

ၵူၼ်းမိူင်းၵိုင် လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ တေႃႇထိုင်ယၢမ်းလဵဝ် သဵင်ၵွင်ႈတိုၵ်ႉတႅၵ်ႇယူႇၶႃႈ။  ပဵၼ် SSPP တင်း RCSS ၶႃႈဢေႃႈ။ ပဵၼ်သိုၵ်းႁဝ်းၼင်ႇၵၼ် ယိုဝ်းၵၼ်ၶႃႈဢေႃႈ။ ပၢင်တိုၵ်း ပဵၼ်ႁႅင်းၶႃႈဢေႃႈ တႄႇဢဝ်ၵၢင်ၼႂ်ၼႆႉမႃး ႁၢၼ်ႉတေႃႇထိုင် 12 မူင်းၶိုင်ႈ ၼႆႉ သဵင်ၵွင်ႈၸင်ႇတေယဵၼ်ၶႃႈ”- ဝႃႈၼႆ။

လိူဝ်ၼၼ်ႉ ၵူၼ်းဝၢၼ်ႈၵုင်းၶမ်း၊ ဝၢၼ်ႈၽႃႈလၢမ်း၊ ဝၢၼ်ႈပႅၵ်ႇၼႃးမူၼ်းလႄႈ ဝၢၼ်ႈပၢင်ႇၼွင်ၼႃးၽွၵ်း ၸိူဝ်းၼႆႉ လႆႈပၢႆႈၽေးသိုၵ်းၵၼ် ႁူဝ်ၵူၼ်း ႁဵင်ပၢႆ ၼႆယဝ်ႉ။

“ယၢမ်းလဵဝ် ၵူၼ်းဝၢၼ်ႈၽႃလၢမ်း၊ ဝၢၼ်ႈၵုင်းၶမ်း၊ ဝၢၼ်ႈပႅၵ်ႇၼႃးမူၼ်းလႄႈ ဝၢၼ်ႈပၢင်ႇၼွင်ၼႃးၽွၵ်း တင်းမူတ်း လင် ႁိူၼ်း 400 ပၢႆ ႁူဝ်ၵူၼ်း 1,000 ပၢႆ လႆႈဢွၼ်ၵၼ်ပၢႆႈဢွၵ်ႇမႃးသွၼ်ႈဝႆႉတီႈၵျွင်းဝၢင်ႈမိူင်းဝႆႉၶႃႈဢေႃႈ။ ဢၼ်ယၢပ်ႇၽိုတ်ႇ ဝႆႉတႄႉလွင်ႈၵိၼ်ယႅမ်ႉလႄႈ ၶူဝ်းၼုင်ႈတၢင်းဝႆ။  ယဝ်ႉၵေႃႈယႃႈယႃ ၶႆႈ ၼၢဝ် ဝတ်း ၸိူဝ်းၼႆႉ”- ၵူၼ်းပိုၼ်ႉတီႈမိူင်းၵိုင် သိုပ်ႇ လၢတ်ႈၼႄၼင်ႇၼႆ။

ၵူၼ်းမိူင်းၵိုင် ၵမ်ႈၼမ်တႄႉ ဢွၼ်ၵၼ်ၶၢင်းပွင်ႉဝႃႈ တၢင်းပဵၼ်ၶူဝ်ႊဝိတ်ႉ 19 ၵေႃႈ ပိူင်ၼိုင်ႈ၊ ၵၢၼ်မိူင်း ၵေႃႈသုၵ်ႉယုင်ႈၵေႃႈ ပိူင်ၼိုင်ႈ ယဝ်ႉၵေႃႈ လွင်ႈသိုၵ်းၸၢဝ်းၶိူဝ်းၼႂ်းမိူင်းတႆးၼင်ႇၵၼ် ပိုတ်းယိုဝ်းၵၼ်ၸိူင်ႉၼႆၵေႃႈ ပိူင်ၼိုင်ႈသေ ႁဵတ်းႁႂ်ႈၵူၼ်းမိူင်းၵိုင် ထူပ်းတၢင်း ယၢပ်ႇၽိုတ်ႇၵိၼ်းၸႂ်ၵၼ်မႃး လွင်ႈၵၢၼ်ႁႃၵိၼ်လဵင်ႉတွင်ႉ ၼႆယဝ်ႉ။

တႄႇဢဝ် ဝၼ်းတီႈ 14/9/2021 ၼၼ်ႉမႃးသေ RCSS တင်း SSPP ပဵၼ်ပၢင်တိုၵ်းၵၼ် တၢင်းဢိူင်ႇႁူဝ်ၶၢႆး ၸႄႈဝဵင်း မိူင်းၵိုင် ႁၢဝ်ႈႁႅင်း။ ၽႄႈလၢမ်းမႃးတၢင်း ဢိူင်ႇပၢင်ႇၵေႇတု၊ ႁၢမ်းငၢႆးလႄႈ တူင်ႇလၢဝ်း ၸိူဝ်းၼႆႉ ၵူၼ်းမိူင်းၼႂ်းပိုၼ်ႉတီႈ လႆႈပၢႆႈယၢၼ်ႁိူၼ်းယေး ၼပ်ႉႁူဝ်ႁဵင်။