ၶၢဝ်းၵတ်းမိူင်းတႆး ၵတ်းႁႅင်းၼႃႇလႄႈ ၵူၼ်းပၢႆႈၽေးသိုၵ်း တီႈၸႄႈဝဵင်းၵျွၵ်ႉမႄး ႁူဝ်ၵူၼ်း 200 ပၢႆ ယၢပ်ႇၽိုတ်ႇ ၽႃႈႁူမ်ႇၶူဝ်းၼွၼ်း သိူဝ်ႈသွၼ်ႉ သိူဝ်ႈၼႃ ၵူၼ်ၼႃ တႃႇလုၵ်ႈဢွၼ်ႇ ၵူၼ်းထဝ်ႈ ဝႃႈၼႆ။
ၵူၼ်းပၢႆႈၽေးသိုၵ်း ဢၼ်ပၢႆႈမႃးသွၼ်ႈဝႆႉတီႈ ၼမ်ႉၸေႃႉ၊ မိူင်းတၢင်ႈ၊ ပဵင်းၶႃးလႄႈ ၼႃးမူၼ်း ၼႂ်းၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ ႁူဝ်ၵူၼ်း 200 ပၢႆၼႆႉ ယၢပ်ႇၽိုတ်ႇ ၽႃႈႁူမ်ႇၶူဝ်းၼွၼ်း၊ ၶူဝ်းဢုၼ်ႇ ယွၼ်ႉပဵၼ်ၶၢဝ်းၵတ်းလႄႈ လူဝ်ႇလွင်ႈၼုင်ႈဝႆ ဢိၵ်ႇပႃးတင်း ၶဝ်ႈ ၼမ်ႉတင်းၵိၼ် ၸိူဝ်းၼႆႉထႅင်ႈ ၼႆယဝ်ႉ။
ၽူႈၸွႆႈထႅမ် ၵူၼ်းပၢႆႈၽေးသိုၵ်း တီႈဢိူင်ႇမိူင်းတၢင်ႈ လၢတ်ႈတီႈၽူႈတွႆႇႁွၵ်ႈဝႃႈ – “တီႈၼမ်ႉၸေႃႉၼႆႉ ၵိုတ်းဝႆႉ 69 ၵေႃႉ၊ မိူင်းတၢင်ႈ 62 ၵေႃႉ၊ တီႈ ပဵင်းၶႃး 62 ၵေႃႉ၊ တီႈၼႃးမူၼ်းသမ်ႉ 39 ၵေႃႉၶႃႈ။ လူဝ်ႇၽႃႈႁူမ်ႇၶူဝ်းၼွၼ်း ၶူဝ်းဢုၼ်ႇ ၸိူဝ်းၼႆႉၶႃႈဢေႃႈ။ တၢင်းၵိၼ် တၢင်းယႅမ်ႉ ၵေႃႈလူဝ်ႇၶႃႈ။ ၶဝ်ႈ၊ ၽၵ်း ၼမ်ႉမီႇ ၼမ်ႉမၼ်းၼၼ်ႉၼႃႇၼေႃႈ”- ဝႃႈၼႆ။
ၵူၼ်းပၢႆႈၽေးသိုၵ်း ဢၼ်မီးတီႈၵေႃလိၵ်ႈလၢႆးလႄႈ ၾိင်ႈငႄႈတႆး တီႈဝဵင်းၵျွၵ်ႉမႄးသမ်ႉယၢပ်ႇ ၽိုတ်ႇတႃႇၼမ်ႉၸႂ်ႉ။ ၾႆးၾႃႉၵႆႉမွတ်ႇလႄႈ တႃႇတေတၢင်ႇၼမ်ႉၶိုၼ်ႈၵေႃႈယၢပ်ႇ ၊ ၼူဝ်းၸၢၵ်ႈလုတ်ႇၼမ်ႉၵေႃႈ ယၢပ်ႇ။
လုင်းၸၢႆးလႅင်းႁၢၼ် ႁူဝ်ပဝ်ႈ ၵေႃလိၵ်ႈလၢႆး ဝဵင်းၵျွၵ်ႉမႄး လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈလဵဝ်ၼႆႉ ၾႆးၾႃႉသမ်ႉၵမ်း ၵမ်းမွတ်ႇ။ ပေႃးၾႆး ၾႃႉမွတ်ႇ ဢမ်ႇၸၢင်ႈတၢင်ႇၼမ်ႉ ၼမ်ႉၵိၼ်ၼမ်ႉၸႂ်ႉၵေႃႈ ယၢပ်ႇ။ သမ်ႉလူဝ်ႇၸၢၵ်ႈၾႆး။ ပေႃးဢမ်ႇမီးၸၢၵ်ႈၾႆး ၵေႃႈယၢပ်ႇ”- ဝႃႈၼႆ။
ၽွင်းၼႆႉ ပဵၼ်ၽွင်းတၢင်းပဵၼ်ၶူဝ်ႊဝိတ်ႉ 19 ၽႄႈလၢမ်း ၵူၼ်းပၢႆႈၽေးသိုၵ်း ၸိူဝ်းမီး မၢႆၾၢင်(မၢတ်ႈပူင်ႇတိၼ်ႇ) လႆႈသမ်းယႃ ႁႄႉၵင်ႈ ၶူဝ်ႊဝိတ်ႉ ယဝ်ႉသေတႃႉ ၸိူဝ်းဢမ်ႇမီး မၢႆၾၢင်/ဝႂ်ၵပ်းတူဝ် ၵမ်ႈၼမ်သမ်ႉပႆႇလႆႈသမ်း လႄႈ ယင်းမႆႈၸႂ် ၵူဝ်တၢင်းပဵၼ် ၽႄႈ ၸပ်းၵၼ် ထႅင်ႈ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ