မိူဝ်ႈၼႆႉဝၼ်းတီႈ 25/1/2026 ပဵၼ်ဝၼ်းပၢင်လိူၵ်ႈတင်ႈၼႆႉ ၵၢင်ႉၵႄႇၼႂ်းဝၢၼ်ႈလွၵ်ႇငိုတ်ႈ ႁႂ်ႈၵူၼ်းပၢႆႈၽေးသိုၵ်း မႃးတွတ်ႈၶႅပ်းၵၢင်ၸႂ် သင်ဢမ်ႇမႃးတွတ်ႈ တေဢမ်ႇပွၵ်ႈၶိုၼ်း ႁိူၼ်းၼႆယဝ်ႉ ။
ၵူၼ်းၸၢႆးပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ ၵူၼ်းပၢႆႈၽေးသိုၵ်းဢၼ်မီးတီႈတၢင်းတူၼ်ႈတီးၼႆႉ လႆႈမိူဝ်းပၼ်ၶႅပ်းၵၢင်ၸႂ်တၢင်းသွင်းပျွင်းၶိုၼ်း ၊ ၵၢင်ႉၵႄႇလၢတ်ႈဝႃႈ ပေႃးၶႂ်ႈမႃးယူႇၶိုၼ်း တီႈဝၢၼ်ႈ တေလႆႈမႃးတွတ်ႈၶႅပ်းၵၢင်ၸႂ်ၼႆ ၊ တၢင်းပုၼ်ႉၼႆႉ PNO ၶဝ်ႁႅင်းယႂ်ႇဝႆႉ ၵူဝ်ဢမ်ႇမီးၵူၼ်းၵႂႃႇ တွတ်ႈၶႅပ်းၵၢင်ၸႂ်လႄႈယူဝ်ႉ ၊ ႁဵတ်းၸိူင်ႉႁိုဝ်ၵေႃႈ PNO တိုၼ်းပႄႉယူႇယဝ်ႉ ပွတ်းၼႆႉတႄႉ”-ဝႃႈၼႆ ။
ၵူၼ်းပၢႆႈၽေးသိုၵ်း ဢၼ်မီးၼႂ်းၸႄႈဝဵင်းပၢင်လွင်းၼႆႉ ႁူဝ်ၵူၼ်းမီး 7000 ပၢႆ ၸိူဝ်းၶဝ် တေလႆႈၵႂႃႇသႂ်ႇ ၶႅပ်းၵၢင်ၸႂ်ၵၼ် တီႈဝၢၼ်ႈသွင်းပျွင်း ဝႃႈၼႆ ။
လိူဝ်ၼၼ်ႉ ၵူၼ်းဝၢၼ်ႈၵႂႃႇပၼ်သဵင်ၵၢင်ၸႂ် မီးဢေႇၼႃႇလႄႈ ၵၢင်ႉၵႄႇပေႃးလႆႈလူင်းၼႂ်းပွၵ်ႉၼႂ်းယွမ်ႇ သေႃႇၸွမ်းၵိဝ်ႇၸွမ်းငွၼ်ႈ လၢတ်ႈႁႂ်ႈၵူၼ်းဝၢၼ်ႈ ၵႂႃႇပၼ်သဵင်ၵၢင်ၸႂ်ပင်လိူၵ်ႈတင်ႈ ဝႆးဝႆး ဝႃႈၼႆ။
ၵူၼ်းၸၢႆးပိုၼ်ႉတီႈသိုပ်ႇလၢတ်ႈထႅင်ႈဝႃႈ -“ၵူၼ်းပၢႆႈၽေးသိုၵ်း တၢင်းပၢင်လွင်းၼႆႉ တေလႆႈၵႂႃႇတွတ်ႈၶႅပ်းၵၢင်ၸႂ်တီႈဝၢၼ်ႈသွင်းပျွင်းၼႆ ၊ တလဵဝ် ဢမ်ႇမီးၵူၼ်းၵႂႃႇတွတ်ႈၶႅပ်းၵၢင်ၸႂ်ၼမ်လႄႈ ၶဝ်ဢွၼ်ၵၼ်သေႃႇၸွမ်းၼႂ်းပွၵ်ႉၼႂ်းၵိဝ်ႇ လၢတ်ႈၵူၼ်းပိုၼ်ႉတႃႇၵႂႃႇသႂ်ႇၶႅပ်းၵၢင်ၸႂ်”- ဝႃႈၼႆ ။
မိူၼ်ၼင်ၼႆႉ တီႈၼိူဝ်ဝဵင်းပၢင်လွင်းၵေႃႈ ပလိၵ်ႈသိုၵ်းမၢၼ်ႈဢဝ်ႁူမ်ႇလူမ်ႈပိုၼ်ႉတီႈႁၢဝ်းႁႅင်း ၼႂ်းဝၼ်းပၢင်လိူၵ်ႈတင်ႈၼႆႉ ၼႆယဝ်ႉ ။
တီႈဝဵင်းပၢင်လွင်းၼႆႉ တီႈၼႂ်းၸႄႈဝဵင်းပၢင်လွင်းၼႆႉ ႁူင်းတွတ်ႈၶႅပ်းၵၢင်ၸႂ် ႁူမ်ႈသဵင်ႈ မီး 140 ႁူင်း ။ ပႃႇတီႇဢၼ်ၶဝ်ႈလိူၵ်ႈတင်ႈ မီး 5 ဢၼ် ။ပဵၼ် ပႃႇတီႇ ပႃႇတီႇသိူဝ်ၽိူၵ်ႇ (SNDP) ၊ ပႃႇတီႇသၢင်ႇသီႈ (USDP) ၊ ပႃႇတီႈပဢူဝ်း (PNO) ၊ ပႃႇတီႇဢွၼ်ၼမ်းၵူၼ်းမိူင်း (PPP) ၊ ပႃႇတီႇၸိူဝ်ႉၸၢတ်ႈဢၢင်းသႃး (အင်းအမျိုးသားအဖွဲ့ချုပ်ပါတီ INLP) ၸိူဝ်းၼႆႉသေ မီးၵူၼ်းမီးသုၼ်ႇတွတ်ႈၶႅပ်းၵၢင်ၸႂ်မီး 138349 ၵေႃႉ ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ