ၵူၼ်းပၢႆႈၽေးသိုၵ်း 1500 ပၢႆ ဢၼ်မီးၼႂ်းၸႄႈဝဵင်းပၢင်လွင်း ၸိုင်ႈတႆးပွတ်းၸၢၼ်း ဢမ်ႇလႆႈတင်းၵမ်ႉၸွႆႈမႃး ပီပၢႆယဝ်ႉ လူဝ်ႇတၢင်းၸွႆႈထႅမ်ႁၢဝ်ႈႁႅင်း ဝႃႈၼႆ ။
ၵူၼ်းၸွႆႈထႅမ် ၵူၼ်းပၢႆႈၽေးသိုၵ်းၼႂ်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“တီႈယူႇတႄႉ လႆႈႁဵတ်း သုမ်ႉယူႇတီႈလိၼ်ဢၼ်ၵူၼ်းဝၢၼ်ႈပၼ်ဝႆႉ ၊ တႃႇၵိၼ်တႃႇယႅမ်ႉတႄႉ ယၢပ်ႇၽိုတ်ႇဝႆႉဢေႃႈ ။ ယွၼ်ႉၵူၼ်းပၢႆႈၽေးသိုၵ်းၵမ်ႈၼမ် ပဵၼ်ၵူၼ်းႁဵတ်းၵၢၼ်ႁႃၸဝ်ႉၵိၼ်ၶမ်ႈ ၊ မိူဝ်ႈလဵဝ် ၵၢၼ်ၵေႃႈ ႁႃယၢပ်ႇ ဢမ်ႇမီးၵၢၼ် ၊ ဢမ်ႇမီးၸဝ်ႈတႃႇၼ မႃးၵမ်ႉၸွႆႈၼႆႉ မီးမွၵ်ႈပီပၢႆယဝ်ႉ”– ဝႃႈၼႆ ။
ၵူၼ်းပၢႆႈၽေးသိုၵ်း 1500 ပၢႆ ယၢမ်းလဵဝ် ယူႇဝႆႉတီႈ ဝၢၼ်ႈ ၼမ်ႉထႃး (နန်းထာ ) ၊ သွင်သၶႃး (ဆောင်စခါး) ၊ ယၢၼ်ႇၵိၼ်း(ရန်ကင်း) ၊ ဝႃးလီး (ဝါးလီး) ဢၼ်မီးၼႂ်းၸႄႈဝဵင်းပၢင်လွင်း ၸိူဝ်းၼႆႉ ၊ ၵမ်ႈၼမ်ပဵၼ်ၵူၼ်းတၢင်းလႅၼ်လိၼ် ပၢင်လွင်း – ၾၢႆၶုၼ် ၸိူဝ်းၼႆႉ ပၢႆႈၽေးသိုၵ်းမႃးယူႇသဝ်းဝႆႉ ဝႃႈၼႆ ။
ယၢမ်းလဵဝ် ယွၼ်ႉဢမ်ႇမီးၵူၼ်းမႃးၵမ်ႉၸွႆႈ ၊ ဢမ်ႇမီးၵၢၼ်တႃႇႁႃၵိၼ်လဵင်ႉတွင်ႉလႄႈ ၵူၼ်းပၢႆႈၽေးသိုၵ်းၵမ်ႈၼမ် လႆႈၵူႈယိုမ်ငိုၼ်းသေ ယူႇၵိၼ်ဝႆႉ ။ ၵူၼ်းပၢႆႈၽေးသိုၵ်း မၢင်ၸိူဝ်း ဢွၼ်ၵၼ် ၶႂ်ႈပွၵ်ႈႁိူၼ်းယူႇသေတႃႉ ယွၼ်ႉမႆႈၸႂ်လွင်ႈမၢၵ်ႇမႅင်း ဢၼ်ၵိုတ်းၶၢင်ႉ ၽွင်းပၢင်တိုၵ်း လႄႈ မႆႈၸႂ်လွင်ႈႁူမ်ႈလူမ်ႈ ဢမ်ႇႁတ်းပွၵ်ႈၶိုၼ်း ၼႆယဝ်ႉ ။
ၵူၼ်းၸၢႆးၸွႆႈထႅမ် ၵူၼ်းပၢႆႈၽေးသိုၵ်း ၼႂ်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ပၢႆႈမႃးမီး 3 ပီယဝ်ႉၶႃႈ မၢင်ၸိူဝ်းၵေႃႈ ၶႂ်ႈမိူဝ်းယူႇဢေႃႈ ၵူၺ်းဢမ်ႇၸၢင်ႈမိူဝ်း ၊ မၢင်ၸိူဝ်းၵေႃႈ ပွၵ်ႈမိူဝ်း ၸႂ်းသူၼ်ၸႂ်းႁိူၼ်း တီႇၽဵဝ်ႈယဝ်ႉၵမ်းၼိုင်ႈသေ ပွၵ်ႈမႃးၶိုၼ်း ၊ ၼၼ်ႉတၢင်းလႆႈမႆႈၸႂ်ဝႆႉဢေႃႈ ယွၼ်ႉ ၵူဝ်မီး မၢၵ်ႇမႅင်းၵိုတ်းၶၢင်ႉဝႆႉ”-ဝႃႈၼႆ ။
မိူၼ်ၼင်ႇၼႆ တီႈတၢင်းပၢင်သဝ်းၵူၼ်းပၢႆႈၽေးသိုၵ်း ၊ ဝၢၼ်ႈ ၵွင်လိူဝ်း၊ ဝၢၼ်ႈပၢင်ၶွၼ်ႇ ၊ ဝၢၼ်ႈၼမ်ႉၽိူၵ်ႇ ၊ ၼွင်တယႃး လႄႈ ႁိမ်းၸမ်ဝဵင်းပၢင်လွင်း ယၢၼ်ၵႆၵၼ် မွၵ်ႈ 8 လၵ်းၸိူဝ်းၼႆႉၵေႃႈ ယၢမ်းလဵဝ် လူဝ်ႇတၢင်းၸွႆႈထႅမ်ဝႆႉ ၼႆယဝ်ႉ ။
ၸွမ်းၼင်ႇ ၵူၼ်းၼုမ်ႇဝဵင်းၾၢႆၶုၼ်လႆႈၵဵပ်းၶေႃႈမုလ်းဝႆႉၼၼ်ႉတႄႉ ၵူၼ်းပၢႆႈၽေးသိုၵ်း ၼႂ်းၸႄႈဝဵင်းပၢင်လွင်း- ၾၢႆၶုၼ် ႁူဝ်ၵူၼ်းမီးၸမ် 7 ႁဵင် ပၢႆ ။ မၢင်ၸိူဝ်းပၢႆႈၵႂႃႇယူႇ ၼႂ်းထိူၼ်ႇၼႂ်းၶိူဝ်း လႄႈ ပၢႆႈယူႇႁိူၼ်းပီႈႁိူၼ်းၼွင်ႉ ၸိူဝ်းၼၼ်ႉၵေႃႈမီး ဝႃႈၼႆ ။
ၼႂ်းလိူၼ် ၼူဝ်ႊဝႅမ်ႊပိူဝ်ႊ ၾိင်ႈၾႃႉရႃႇသီႇလႅၵ်ႈလၢႆႈ ၼႂ်းမိူင်းတႆးၵတ်းလိူဝ်ၸႂ်ႁႅင်းလႄႈ ၼႂ်းၶၢဝ်းတၢင်းလိူၼ်လဵဝ်ၵူၺ်း ၵူၼ်းပၢႆႈၽေးသိုၵ်း တီႈဝၢၼ်ႈၼွင်တယႃးလႄႈ ဝၢၼ်ႈၼွင်ၶႃႇ ၊ ဝၢၼ်ႈပၢင်ၶွၼ် တၢႆ 6 ၵေႃႉ ပဵၼ် ထဝ်ႈယိင်း 4 ၵေႃႉ လႄႈ ထဝ်ႈၸၢႆး 2 ၵေႃႉ ။
ၼႂ်းႁူဝ်ပီၼႆႉ သိုၵ်းမၢၼ်ႈ ထႅမ်ႁႅင်းသိုၵ်း ႁႅင်းၵွင်ႈၵၢင်ႇ ႁူမ်ႈတင်း ပျီႇတူႉၸိတ်ႉပဢူဝ်းသေ ထူဝ်းသိုၵ်းလေႃႇတိုၵ်းၸုမ်းလုၵ်ႉၽိုၼ်ႉႁၢဝ်ႈႁႅင်း ယဝ်ႉယိုတ်းၵုမ်းလႆႈၶိုၼ်း တၢင်းဝၢၼ်ႈ ၵေႃမႆႉသၢင်း၊ ဝၢၼ်ႈၼမ်ႉၼဵင်ႈ ၊ ဝၢၼ်ႈပၢင်ပုမ်ႇ ၊ လူင်ပႅၼ်ႈ ၼႂ်းၸႄႈဝဵင်းပၢင်လွင်းသေ ႁဵတ်းႁႂ်ႈၵူၼ်းမိူင်းလႆႈငိူင်ႉပၢႆႈၽေးသိုၵ်းထိုင်ဝၼ်းမိူဝ်ႈၼႆႉ ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ