RCSS တင်း SSPP ပိုတ်းယိုဝ်းၵၼ် ၼႂ်းၸႄႈဝဵင်းမိူင်းၵိုင်

129

မိူဝ်ႈၼႆႉ ဝၼ်းတီႈ 14/9/2021 ယၢမ်းၵၢင်ၼႂ်မွၵ်ႈ 8 မူင်းၶိုင်ႈ သိုၵ်း RCSS တင်း SSPP ပဵၼ်ပၢင်တိုၵ်းၵၼ် ႁၢဝ်ႈႁႅင်း တီႈ ႁိမ်းဝၢၼ်ႈၼမ်ႉဢုၼ်ႇ ဢိူင်ႇႁူဝ်ၶၢႆး ၸႄႈဝဵင်းမိူင်းၵိုင် ၸႄႈတွၼ်ႈလွႆလႅမ် ၸိုင်ႈတႆး ပွတ်းၸၢၼ်း။

ပၢႆႉတၢင်းၶဝ်ႈဝၢၼ်ႈဢိူင်ႇႁူဝ်ၶၢႆး

ၸဝ်ႈႁၢၼ် ၶမ်းၸၢမ်ႇ ၽူႈၶၢၼ်ပၢၵ်ႇ RCSS လၢတ်ႈတီႈၽူႈတွႆႇႁွၵ်ႈဝႃႈ –“ ၸႂ်ႈၶႃႈဢေႃႈ ပဵၼ်ပၢင်တိုၵ်းၵၼ်  မိူဝ်ႈၼႆႉ ၵၢင်ၼႂ် 8 မူင်း တေႃႇထိုင်ယၢမ်းလဵဝ်။ လၢႆးႁူဝ်ယွႆႈမၼ်းတႄႉ ပႆႇလႆႈႁူႉ”- ဝႃႈၼႆ။

  ပၢင်တိုၵ်း  RCSS တင်း SSPP ၼႆႉယွၼ်ႉသင်လႄႈ ပဵၼ်ဢၼ်ဝႃႈၼၼ်ႉ ပႆႇ လႆႈႁူႉတႅတ်ႈတေႃး ဝႃႈၼႆ။

ၵူၼ်းပိုၼ်ႉတီႈ ဢိူင်ႇႁူဝ်ၶၢႆး ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ယၢမ်းလဵဝ် ၵူၼ်းပၢႆႈၽေးပႆႇမီး ၵူၺ်းၵႃႈ ဢၼ်ငိူင်ႉဝႄႈ ၵႂႃႇသွၼ်ႈဝႆႉၵျွင်းမုၼ်ၸဝ်ႈတႄႉ မီးယူႇ။ ပၢင်တိုၵ်း တႄႇပဵၼ်မိူဝ်ႈၼႆႉ ၵၢင်ၼႂ် သွင်ၾၢႆႇ ပဵၼ်ၵၼ်ႁၢဝ်ႈႁႅင်း”-  ဝႃႈၼႆ။

တႄႇႁူဝ်လိူၼ်ၵျုၼ်ႊၼၼ်ႉမႃး သိုၵ်း RCSS တင်း SSPP ပဵၼ်ပၼ်ႁႃၵၼ် ၵဵဝ်ႇလူၺ်ႈလွင်ႈႁိမ်ၼႃႈတီႈၵၼ် တေႃႇထိုင် ယၢမ်းလဵဝ် လွင်ႈၼႆႉ ပႆႇယဝ်ႉ ဝႃႈၼႆ။

ယွၼ်ႉ RCSS တင်း SSPP,TNLA ပဵၼ်ပၢင်တိုၵ်းၵၼ်မႃး ႁၢဝ်ႈႁႅင်း ဝၢႆးၶွင်ႇသီႇသိုၵ်းမၢၼ်ႈ ယိုတ်းဢႃႇၼႃႇမႃး ၼႂ်းမိူင်းတႆး ပွတ်းႁွင်ႇ ပွတ်းၸၢၼ်း တုမ်ႉယွၼ်ႈ ၵူၼ်းမိူင်းၼႂ်းပိုၼ်ႉတီႈ လႆႈပၢႆႈၽေးသိုၵ်း ၼပ်ႉႁူဝ်ႁဵင်။ ယၢမ်းလဵဝ်သမ်ႉ ပဵၼ်ၶၢဝ်း တၢင်းပဵၼ်ၶူဝ်ႊဝိတ်ႉ 19 ၽႄႈလၢမ်ႈႁၢဝ်ႈႁႅင်းထႅင်ႈသေ ၵူၼ်းမိူင်းပၢႆႈၽေး လႆႈထူပ်းတၢင်းယၢပ်ႇၽိုတ်ႇ လွင်ႈၽေးသိုၵ်း ၵူၺ်းဢမ်ႇၵႃး လႆႈမႆႈၸႂ် ၵူဝ်ပႃး တၢင်းပဵၼ်ထႅင်ႈ ၼႆယဝ်ႉ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ