ၵူၼ်းမိူင်းတၢင်ႈ ၸႄႈဝဵင်းၵျွၵ်ႉမႄး ၵိူတ်ႇလုၵ်ႈဢွၼ်ႇလႅင်ၽွင်းပၢႆႈၽေးပၢင်တိုၵ်းမႃးႁွတ်ႈထိုင်တီႈ ဝၢၼ်ႈလူင် ။
မႄႈမၢၼ်းၼႆႉပဵၼ်ၵူၼ်းဝၢၼ်ႈ ပၢင်ၵွၼ်၊ ပၢႆႈၽေးပၢင်တိုၵ်းမႃးထိုင်တီႈဝၢၼ်ႈလူင်ၼႂ်းဢိူင်ႇမိူင်းတၢင်ႈလႆႈမႃးၶၢဝ်းတၢင်း 10 ဝၼ်းယဝ်ႉသေ ၵိူတ်ႇလုၵ်ႈမၼ်းၼၢင်းၼႂ်းပၢင်သဝ်းၵူၼ်းပၢႆႈၽေး ၼႂ်းဝၼ်းတီႈ 26/8/2021 ပူၼ်ႉမႃး။
ၽူႈမီးပုၼ်ႈၽွၼ်းတီႈပၢင်သဝ်းၵူၼ်းပၢႆႈၽေးသိုၵ်းၼၼ်ႉလၢတ်ႈတီႈၽူႈတွႆႇႁွၵ်ႈဝႃႈ – ပဵၼ်လုၵ်ႈဢွၼ်ႇယိင်းဢွၼ်ႇဢေႃႈ။ ယၢမ်းလဵဝ် တင်းမႄႈလႄႈ တင်းလုၵ်ႈဢွၼ်ႇ ယူႇလီၵိၼ်ဝၢၼ်ယူႇ။ ပဵၼ်ၵူၼ်းဝၢၼ်ႈပၢင်ၵွၼ်ၼင်ႇၵၼ်ၶိုၼ်းၵူၺ်းဢၼ်လဵင်ႉပၼ်လုၵ်ႈမၼ်းၵေႃႈ။ ပဵၼ်ၾၢႆႇပၢႆးယူႇလီတီႈဝၢၼ်ႈဢၼ်ပၢႆႈၽေးသိုၵ်းမႃးၸွမ်းၵၼ်ၼၼ်ႉဢေႃႈ – ဝႃႈၼႆ။
ၼၢင်းယိင်းဢၼ်ၵိူတ်ႇလုၵ်ႈဢွၼ်ႇၼႆႉ ၸိုဝ်ႈႁွင်ႉၼၢင်းၽိဝ်ႇဝိၼ်း ဢႃယု 28 ပီ ပဵၼ်ၵူၼ်းဝၢၼ်ႈပၢင်ၵွၼ်။ ပၢႆႈၽေးပၢင်တိုၵ်းၼႂ်းၵႄႈၸုမ်းဢူၺ်းလီပွတ်းႁွင်ႇလႄႈသိုၵ်း RCSS ပိုတ်းယိုဝ်းၵၼ်တၢင်းဝၢၼ်ႈပၢင်ၵွၼ်။
ယၢမ်းလဵဝ်တီႈပၢင်သဝ်းၵူၼ်းပၢႆႈၽေးသိုၵ်းတီႈဢိူင်ႇမၢင်းတၢင်ႈၼႆႉ မီးမွၵ်ႈ 120 ၵေႃႉ။ ယၢပ်ႇၽိုတ်ႇၶဝ်ႈၼမ်ႉတၢင်းၵိၼ်။
ပူၼ်ႉမႃးဝၼ်းတီႈ 29/8/2021 ၼႆႉၵေႃႈ သွင်ၾၢႆႇပိုတ်းယိုဝ်းၵၼ်ႁၢဝ်ႈႁႅင်းႁိမ်းဝၢၼ်ႈမွၵ်ႇငႃးၸၢင်ႉလႄႈ ၵူၼ်းဝၢၼ်ႈထုင်ႉၼၼ်ႉၵေႃႈ ပၢႆႈၽေးသိုၵ်း ပႆႇၸၢင်ႈပွၵ်ႈႁိူၼ်းၶိုၼ်း။