သိုၵ်း SSPP တင်း RCSS ပဵၼ်ပၢင်တိုၵ်းၵၼ်ထႅင်ႈႁၢဝ်ႈႁႅင်း ၼႂ်းဝဵင်းၼမ်ႉလၼ်ႈ ၵူၼ်းဝၢၼ်ႈၼပ်ႉႁူဝ်ပၢၵ်ႇ လႆႈပၢႆႈယၢၼ် ႁိူၼ်းယေး မၢင်ၸိူဝ်းလႆႈပၢႆႈသွၼ်ႈတၢင်းမိူင်းၵိုင်ၵေႃႈမီး ဝႃႈၼႆ။
မိူဝ်ႈၼႆႉ ဝၼ်းတီႈ 23/8/2021 ယၢမ်းၵၢင်ၼႂ် သိုၵ်း SSPP တင်း RCSS ပဵၼ်ပၢင်တိုၵ်းၵၼ် ၼႂ်းဢိူင်ႇဝၢၼ်ႈၸိင်း ဝဵင်းၼမ်ႉ လၼ်ႈ ၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ ၵူၼ်းမိူင်းၼပ်ႉႁူဝ်ပၢၵ်ႇ လႆႈပၢႆႈၽေးသိုၵ်း ၼႆ ယဝ်ႉ။
ၵူၼ်း ၼႂ်းဢိူင်ႇဝၢၼ်ႈၸိင်း ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈၼႆႉ သဵင်ၵွင်ႈတႅၵ်ႇၸဵမ်ၸဝ်ႉမွၵ်ႈ 6 မူင်း ၶိုင်ႈၼႆႉ ၵူၼ်းဝၢၼ်ႈ ဢမ်ႇႁတ်းယူႇ ၼႅတ်ႈပၢႆႈဢွၵ်ႇမႃးၶႃႈဢေႃႈ မၢင်ၵေႃႉ ဢမ်ႇတၼ်းလႆႈထူဝ်ႈ လႆႈလေႃႉသင်။ယၢမ်းလဵဝ် ပၢႆႈမႃး သွၼ်ႈ ဝႆႉတီႈၵျွင်းမုၼ်ၸဝ်ႈ တေမီးႁူဝ်ၵူၼ်း မွၵ်ႈ 500 ၼႆႉၶႃႈ။ ပၢင်တိုၵ်း မိူဝ်ႈၼႆႉ တႅၵ်ႇလၢႆတီႈၶႃႈဢေႃႈ။ ၼႂ်းဢိူင်ႇၵွင်း ႁၵ်ႉၼၼ်ႉၵေႃႈ သဵင်ၵွင်ႈ တိုၵ်ႉတႅၵ်ႈယူႇတိၵ်းတိၵ်းၶႃႈ”- ဝႃႈၼႆ။
ၼႂ်းဢိူင်ႇဝၢၼ်ႈၸိင်း ဝဵင်းၼမ်ႉလၼ်ႈၼႆႉ ယွၼ်ႉပဵၼ်ပၢင်တိုၵ်းလၢႆတီႈလႄႈ ၵူၼ်းဝၢၼ်ႈၵမ်ႈၽွင်ႈ ပႆႇၸၢင်ႈပၢႆႈဢွၵ်ႇဝၢၼ်ႈ ။ၶမ်ဝႆႉ ၼႂ်းၵႄႈပၢင်တိုၵ်းၵေႃႈမီး၊ ၵူၼ်းဝၢၼ်ႈ ၸိူဝ်းပၢႆႈပူၼ်ႉမႃးသမ်ႉ မၢင်ၵေႃႉ ဢမ်ႇတၼ်းလႆႈၶဝ်ႈၼမ်ႉတၢင်းၵိၼ်သင် ထူပ်းတၢင်းယၢပ်ႇၽိုတ်ႇဝႆႉၵေႃႈမီး ၼႆယဝ်ႉ။
“မိူဝ်ႈလဵဝ် တႃႇတေၶဝ်ႈမိူဝ်းဢဝ်ၶဝ်ႈၼမ်ႉတၢင်းၵိၼ်တႄႉ မၼ်းၶၢၼ်ၸႂ်။ သိုၵ်းၸိူဝ်းၼၼ်ႉၵေႃႈ ဢမ်ႇပေႃးၶႂ်ႈပၼ်ၶဝ်ႈ ဢွၵ်ႇ။ ပေႃးၶဝ်ၵုမ်ႇထႅမ်ႁႅင်းသိုၵ်းယူႇတိၵ်းတိၵ်းတႄႉ ပၢင်တိုၵ်းၼႆႉ တေပဵၼ်ႁႅင်းၶၢဝ်းႁိုင်။ မိူၼ်ၸိူင်ႉ ပီႈၼွင်ႉဢၼ်လူဝ်ႇ ႁဵတ်းႁႆႈသူၼ် လူဝ်ႇၵႂႃႇဢဝ်ထူဝ်ႇ ၸိူဝ်းၼႆႉၵေႃႈၼမ်။ ပၢင်တိုၵ်း တေပဵၼ်မိူဝ်ႈလႂ် တေတႅၵ်ႇထႅင်ႈၶၢဝ်းလႂ် ၽႂ်ၵေႃႈ ဢမ်ႇလၢမ်းႁူႉလႆႈ”- ၵူၼ်း ဢိူင်ႇဝၢၼ်ႈၸိင်း လၢတ်ႈၼႄထႅင်ႈၼင်ႇၼႆ။
ပူၼ်ႉမႃး မိူဝ်ႈဝၼ်းတီႈ 20/8/2021 ၼၼ်ႉၵေႃႈ ၵူၼ်းဝၢၼ်ႈၵုင်း ၼႂ်းဢိူင်ႇၵုင်းၵေႃႇ ၵေႃႉၼိုင်ႈ လႆႈၽႃႇၺႃးမၢၵ်ႇ ဢၼ်ႁၢင်ႈ ၵၢင်ဝႆႉၼၼ်ႉ လုၵ်ႈၼိုင်ႈတႅၵ်ႇတိူဝ်ႉသႂ်ႇ ၵူၼ်းပိုၼ်ႉတီႈ ဢိူင်ႇဝၢၼ်ႈၸိင်းလၢတ်ႈ။
ၼွၵ်ႈလိူဝ်ၼၼ်ႉ ၵူၼ်းပွတ်းဝဵင်းၼမ်ႉလၼ်ႈ ၵမ်ႈၽွင်ႈ ပၢႆႈၵႂႃႇတၢင်း ဢိူင်ႇတူင်ႇလၢဝ်း ၸႄႈဝဵင်းမိူင်းၵိုင် ၸိုင်ႈတႆးပွတ်း ၸၢၼ်းၼၼ်ႉၵေႃႈ မီးထႅင်ႈၼပ်ႉႁူဝ်ပၢၵ်ႇ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ