ၵူၼ်းတိတ်းၸပ်းတၢင်းပဵၼ်ၶူဝ်ႊဝိတ်ႉ ၼမ်ၼႃႇယဝ်ႉလႄႈ တီႈႁူင်းယႃၸႄႈဝဵင်းၵျွၵ်ႉမႄး ႁပ်ႉယူတ်းယႃၵူၼ်းဢၼ်ဢွၵ်ႊသီႊၵျိၼ်ႊ တူၵ်းႁႅင်းဢႃးလႃးၵူၺ်း၊ ၵူၼ်းၸဵပ်းမႆႈၶႆႈၼၢဝ်လႄႈၵူၼ်းၸပ်းၶူဝ်ႊဝိတ်ႉတႄႉႁႂ်ႈယူတ်းယႃႁင်းၵူၺ်းတီႈႁိူၼ်း လႆႈႁူႉၼင်ႇၼႆ။
လုၵ်ႈၸုမ်းပရႁိတ ၼမ်ႉၶူင်း ၵျွၵ်ႉမႄး ၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ “ ၵူၼ်းပဵၼ်ၶူဝ်ႊဝိတ်ႉၵေႃႈၶဝ်ဢမ်ႇႁပ်ႉယဝ်ႉၶႃႈ တီႈႁူင်းယႃၵျွၵ်ႉမႄး။ ယွၼ်ႉဝႃႈၵူၼ်းတဵမ်ႁူင်းယႃ ယဝ်ႉဢေႃႈ။ ၶဝ်တေႁပ်ႉၵူၼ်းပဵၼ်လိူဝ်ႁႅင်း ၵူၺ်းယဝ်ႉၶႃႈ ” – ဝႃႈၼႆ။
ယၢမ်းလဵဝ် တီႈဝဵင်းၵျွၵ်ႉမႄးၼႆႉၵူၼ်းပဵၼ်ၶူဝ်ႊဝိတ်ႉၼမ်ႁႅင်းဢႃးလႃးလႄႈ မီးထိုင်လၢႆၵေႃႉယဝ်ႉ တၢႆလၢႆၵေႃႉယဝ်ႉဢမ်ႇႁူႉတႅတ်ႈတေႃး၊ ယွၼ်ႉပိူဝ်ႈဢမ်ႇမီးၶိူင်ႈၵူတ်ႇထတ်း တၢင်းပဵၼ်၊ ပေႃးၾၢင်ႁၢင်ႈတၢင်းပဵၼ်ပေႃႇမႃးၸင်ႇတေႁူႉဝႃႈၸပ်းတၢင်းပဵၼ် – ၵူၼ်းၵျွၵ်ႉမႄး ဢၼ်ၸွႆႈထႅမ်တေႃႉသူင်ႇၵူၼ်းပဵၼ်ၶူဝ်ႊဝိတ်ႉလၢတ်ႈၼင်ႇၼႆ။
တေႃႇထိုင်ဝၼ်းတီႈ 13/8/2021 တႄႉတီၵျွၵ်ႉမႄး ၵူၼ်းၸပ်းတၢင်းပဵၼ်ၶူဝ်ႊဝိတ်ႉ မီး 600 ပၢႆ။ ၵူၺ်းၵႃႈဝႆၢးၼႆႉမႃး ၶိူင်ႈထတ်းၶူဝ်ႊဝိတ်ႉႁႃယၢပ်ႇၼႃႇယဝ်ႉလႄႈ ဢမ်ႇႁူႉလႆႈတႅတ်ႈတေႃးယဝ်ႉ ဝႃႈၼႆ။
“တၢင်းပဵၼ်ၼႆႉလၢမ်းၽႄႈထိုင် တၢင်းဝၢၼ်ႈၼွၵ်ႈၼႃးပၢင်ႇမူတ်းယဝ်ႉ။ ပွတ်းတၢင်းဝၢၼ်ႈၵျွႆးၵုင်း ၶူဝ်မုင်းၸိူဝ်းၼႆႉ ၵူၼ်းတၢႆယွၼ်ႉတၢင်းပဵၼ်မီးၼမ်ၼႃႇယဝ်ႉ မၢင်ဝၼ်းတၢႆ ပဵၼ် 5 ၵေႃႉၵေႃႈမီး။ ဢၼ်လႆႈသုတ်ႇဢွၵ်ႊသီႊၵျိၼ်ႊ ၵေႃႈမီးၼမ်ၼႃႇ။ ဢၼ်တၢႆၼႆႉၵမ်ႈၼမ်ပဵၼ်ၵူၼ်းထဝ်ႈ ။ မၢင်ၵေႃႉယူတ်းယႃၶႅၼ်းသေလူင်းႁူင်းယႃမႃးယူႇႁိူၼ်း 2-3 ဝၼ်းသေတၢႆၵေႃႈမီး ” ၵူၼ်းဝၢၼ်ႈၶူဝ်မုင်း ၵျွၵ်ႉမႄး ၵေႃႉၼိုင်ႈၵေႃႈလၢတ်ႈတီႈၽူႈတွႆႇႁွၵ်ႈၼင်ႇၼႆ။
ဝၼ်းတီႈ 17/8/2021 ၼႆႉၼႂ်းဝဵင်းၵျွၵ်ႉမႄး ၵူၼ်းတိတ်းၸပ်းတၢင်းပဵၼ်ၶူဝ်ႊဝိတ်ႉသေ လူႉတၢႆထႅင်ႈ 2 ၵေႃႉ။ မၢင်ဝၼ်း ဝၼ်းလဵဝ်လူႉတၢႆထိုင် 15 ၵေႃႉၵေႃႈမီး။ ၵွပ်ႈၼႆလႄႈဢၼ်လူႉတၢႆၵေႃႈ မီးၵႃႈႁိုဝ်တႄႉတႄႉ ဢမ်ႇႁူႉလႆႈတႅတ်ႈတေႃး။ ၸွမ်းၼင်ႇၾၢႆႇပၢႆးယူႇလီၸႄႈဝဵင်းလၢတ်ႈတႄႉ တေႃႇထိုင်ယၢမ်းလဵဝ် တီႈဝဵင်းၵျွၵ်ႉမႄးၼႆႉၵူၼ်းတၢႆယွၼ်ႉတၢင်းပဵၼ်ၶူဝ်ႊဝိတ်ႉမီး 30 ပၢႆ ဝႃႈၼႆ။
