ယၢမ်းလဵဝ် ၵူၼ်းပၢႆႈၽေးသိုၵ်း ၼႂ်းဢိူင်ႇႁူၺ်ႈလူင် ၸႄႈဝဵင်းမိူင်းၵိုင် ၵိုတ်း   100 ပၢႆ ပႆႇၸၢင်ႈပွၵ်ႈႁိူၼ်းယေး  ၵမ်ႈၼမ် ပဵၼ်ၵူၼ်းထဝ်ႈလႄႈ လုၵ်ႈဢွၼ်ႇ။

တႄႇဢဝ် ႁူဝ်လိူၼ်ၵျုႊလၢႆႊမႃးတေႃႇထိုင် ႁူဝ်လိူၼ်ဢေႃႊၵတ်ႊသ် 2021 ၼႆႉ ၵူၼ်းၼႂ်းဢိူင်ႇမိူင်းၶုၼ် ဢၼ်ပၢႆႈၽေး သိုၵ်းမႃးသွၼ်ႈဝႆႉတီႈၼႂ်းဢိူင်ႇႁူၺ်ႈလူင် ၸႄႈဝဵင်းမိူင်းၵိုင် ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း ႁူဝ်ၵူၼ်းႁဵင်ပၢႆ ၼၼ်ႉ ယၢမ်းလဵဝ် တီႈဝတ်ႉဝၢၼ်ႈလႅင်ႉ တိုၵ်ႉၵိုတ်းဝႆႉ ၵူၼ်းထဝ်ႈလႄႈ လုၵ်ႈဢွၼ်ႇ ႁူဝ်ၵူၼ်း 100 ပၢႆ  ။

ၽူႈၸွႆႈထႅမ် ၵူၼ်းပၢႆႈၽေးသိုၵ်း တီႈမိူင်းၵိုင် ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၼႂ်းဝၼ်းသွင်ဝၼ်းၼႆႉ ၵပ်းၸူးတၢင်း ၶွမ်ႊမတီႊ တီႈၵူၼ်းပၢႆႈၽေးၼၼ်ႉၵေႃႈ ဢမ်ႇလႆႈ ။ မိူဝ်ႈပူၼ်ႉမႃး မွၵ်ႈ 4 ဝၼ်းၼႆႉ ယူႇတီႈၾၢႆႇၽူႈၵွၼ်းၸႄႈဝဵင်းၶဝ် ၵႂႃႇ တူၺ်းမႃး တိုၵ်ႉၵိုတ်းဝႆႉ 100 ပၢႆ ပႆႇပွၵ်ႈ။  ပဵၼ်ၵူၼ်းထဝ်ႈလႄႈ လုၵ်ႈဢွၼ်ႇၵမ်ႈၼမ်ၼႆၶႃႈ။ လိူဝ်ၼၼ်ႉတႄႉ ပွၵ်ႈၵၼ်မူတ်း ယဝ်ႉ။ ဢၼ်ပႆႇပွၵ်ႈၼၼ်ႉတႄႉ ယွၼ်ႉသဵၼ်ႈတႃႈ သၢႆတၢင်းဢုင် ၵႂႃႇမႃးယၢပ်ႇ ”- ဝႃႈၼႆ။

  လွင်ႈၼႆႉ တႃႇ ၵိၼ်ယႅမ်ႉ  တႄႉ တိုၵ်ႉ လႆႈမႆႈၸႂ်ဝႆႉယူႇ ထႅင်ႈၾၢႆႇၼိုင်ႈၵေႃႈ ယွၼ်ႉ တၢင်းပဵၼ်ၶူဝ်ႊဝိတ်ႉ 19 သေ ၸွမ်းဢိူင်ႇ/ ဝၢၼ်ႈ ၸိူဝ်းၼႆႉၵေႃႈ ပိၵ်ႉႁၢမ်ႈၵူၼ်းတၢင်းၼွၵ်ႈၶဝ်ႈလႄႈ ယူႇတီႈ ၸုမ်းၸွႆႈထႅမ် ၵူၼ်းပၢႆႈၽေးသိုၵ်း ၸႄႈဝဵင်းမိူင်းၵိုင် ဢမ်ႇၸၢင်ႈၶဝ်ႈမိူဝ်းၸွႆႈ လႆႈၵိုတ်းယင်ႉဝႆႉ ဝႃႈၼႆ။

“လွင်ႈၵိၼ်ယႅမ်ႉတႄႉ လႆႈမႆႈၸႂ်ဝႆႉယူႇၶႃႈ ႁူဝ်ၵူၼ်းတိုၵ်ႉမီးယူႇ 100 ပၢႆ ၵူၺ်းၵႃႈ လႆႈငိၼ်းဝႆႉထႅင်ႈလွင်ႈၼိုင်ႈ ၸိူဝ်းပဵၼ် လုၵ်ႈလၢၼ် ၵူၼ်းၼုမ်ႇ ဢၼ်ပွၵ်ႈမိူဝ်းႁိူၼ်း ၸိူဝ်းၼၼ်ႉၵေႃႈ ပွၵ်ႈမႃးတူၺ်းယူႇ လႅပ်ႈတေဢဝ် ၶွင်ၵိၼ်ယႅမ်ႉၸိူဝ်းၼႆႉ မႃးၸွႆႈပၼ်ဝႆႉယူႇ။ ႁဝ်းၶႃႈသမ်ႉ ဢမ်ႇၸၢင်ႈတေႃႉဢဝ်ၶွင်ၵိၼ်ယႅမ်ႉၼႆႉ ၶဝ်ႈမိူဝ်းၸွႆႈယဝ်ႉ ယွၼ်ႉတၢင်းပဵၼ်ၶူဝ်ႊဝိတ်ႉ 19 ၼႆႉသေ ယူႇတီႈၽူႈၵွၼ်းဢိူင်ႇ/ ဝၢၼ်ႈ ႁၢမ်ႈၵူၼ်းတၢင်းၼွၵ်ႈၶဝ်ႈလႄႈ ၵွပ်ႈၼႆ ႁဝ်းၶႃႈ လႆႈၵိုတ်းယင်ႉဝႆႉ”- ၽူႈၸွႆႈထႅမ် ၵူၼ်းပၢႆႈၽေး တီႈမိူင်းၵိုင် သိုပ်ႇလၢတ်ႈၼႄၼင်ႇၼႆ။

ၵူၼ်းပၢႆႈၽေးသိုၵ်း ၼႂ်းဢိူင်ႇမိူင်းၶုၼ် ဢၼ်လႆႈပၢႆႈၽေးသိုၵ်း မႃးသွၼ်ႈဝႆႉတီႈ ၼႂ်းဢိူင်ႇႁူၺ်ႈလူင်ၼႆႉ တေမီးႁူဝ်ၵူၼ်း မွၵ်ႈႁဵင်ပၢႆ။ ဢၼ်လႆႈပၢႆႈၵႂႃႇတၢင်း ၸႄႈဝဵင်းလၢႆးၶႃႈၵေႃႈမီး ယွၼ်ႉသိုၵ်း RCSS တင်း SSPP ပဵၼ်ပၢင်တိုၵ်းၵၼ် ႁၢဝ်ႈႁႅင်း ၼႂ်းဢိူင်ႇမိူင်းၶုၼ်သေ တႄႇဢဝ် ႁူဝ်လိူၼ်ၵျုႊလၢႆႊၼႆႉမႃး ၵူၼ်းမိူင်းလႆႈဢွၼ်ၵၼ်ပၢႆႈၽေးသိုၵ်း ဢွၵ်ႇမႃး ၼႆ ယဝ်ႉ။

မိူဝ်ႈဝၼ်းတီႈ 1/6/2021 ၼၼ်ႉ သိုၵ်း RCSS တင်း SSPP ပဵၼ်ပၢင်တိုၵ်းၵၼ် ႁၢဝ်ႈႁႅင်း တၢင်းလွႆႁူၼ်း ၸႄႈဝဵင်းၵေးသီး ၼၼ်ႉသေ ၵူၼ်းမိူင်းပိုၼ်ႉတီႈ ၼပ်ႉႁူဝ်ႁဵင် လႆႈပၢႆႈယၢၼ်ႁိူၼ်းယေးၵၼ် ၼႆယဝ်ႉ။