ငဝ်းလၢႆး ၼႂ်းပိုၼ်ႉတီႈ ဢမ်ႇပႆႇၼိမ်သဝ်း ဢမ်ႇမီးလွင်ႈႁူမ်ႇလူမ်ႈ  လႄႈ ၵူၼ်း ၵေးသီး  60 ပၢႆ  ဢၼ်ပၢႆႈၽေးသိုၵ်း မႃးသွၼ်ႈဝႆႉတီႈၸႄႈဝဵင်းလၢႆးၶႃႈ ၼၼ်ႉ   ဢွၼ်ၵၼ် တႄႇဝၢၼ်ႈ မႂ်ႇ သေ ဢၢၼ်းတေယူႇသဝ်းၵႂႃႇတေႃႇထိုင်ဝၢၼ်ႈမိူင်းပေႃးၵတ်းယဵၼ်ဝႃႈၼႆ။

ၵူၼ်းဝၢၼ်ႈ ဢၼ်ပၢႆႈမႃးသၢင်ႈဝၢၼ်ႈမႂ်ႇၼၼ်ႉ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ -“တၢင်းယၢပ်ႇၽိုတ်ႇတႄႉ မီးယူႇၵူႈ ဢၼ်ဢေႃႈ ယွၼ်ႉတိုၵ်ႉတႄႇမႂ်ႇၵူၺ်းလႄႈ ဢၼ်ၵိၼ်ဢၼ်ယႅမ်ႉတႄႉၵေႃႈ ၶိုၼ်းဢဝ်ဢၼ်ပီႈၼွင်ႉမႃးလူႇဝႆႉ ၸိူဝ်းၼၼ်ႉ သေ ၵိၼ်ယႅမ်ႉၵႂႃႇထႃႈၵူၺ်းၶႃႈ။ ၽၵ်းၶဵဝ်တႄႉ ၵႂႃႇယွၼ်း လူႇၶၢမ်ႇၼႂ်းဝၢၼ်ႈမႃးၵိၼ် ယွၼ်ႉၸမ်ဝၢၼ်ႈဝႆႉၶႃႈဢေႃႈ”- ဝႃႈ ၼႆ။

ယၢမ်းလဵဝ် ပိူင်လူင်ယၢပ်ႇၽိုတ်ႇတႃႇပၢႆးယူႇလီ၊ ပၢႆးပၺ်ႇၺႃႇ တႃႇလုၵ်ႈဢွၼ်ႇ လႄႈ တႃႇပူၵ်းပွင် ၼႂ်းပိုၼ်ႉတီႈ ၸိူဝ်းၼႆႉ ။

“ဢၼ်လမ်လွင်ႈသုတ်းတႄႉ ပၢႆးယူႇလီ ပၢႆးပၺ်ႇၺႃႇ ၸိူဝ်းၼႆႉ။ ယႃႈယႃ ၸိူဝ်းၼႆႉတႄႉ ၼင်ႇဢၼ် ယိုၼ်းထိုင်လႆႈ ၼၼ်ႉ ၵေႃႈ သိုဝ်ႉဝႆႉ။ ၵၢၼ်တႄႇတင်ႈ ဝၢၼ်ႈမႂ်ႇၼႆႉ ဢၼ်လမ်ႇလွင်ႈမၼ်းၵေႃႈ မႆႉ လဵၵ်းမုင်း ၸိူဝ်းၼႆႉ လူဝ်ႇတင်းၼမ်ၶႃႈ”-  ၵူၼ်း ဝၢၼ်ႈဢၼ်ပၢႆႈမႃးသၢင်ႈဝၢၼ်ႈမႂ်ႇၼၼ်ႉ ၶိုၼ်းသိုပ်ႇလၢတ်ႈၼႄၼင်ႇၼႆ။

ၵူၼ်းၵေးသီး ဢၼ်ပၢႆႈၽေးသိုၵ်း လူင်းမႃးထိုင်တၢင်းလၢႆးၶႃႈၼႆႉ မႃးတႄႇဝၢၼ်ႈယူႇသဝ်းတီႈဝၢၼ်ႈထီႇ ဢၼ်မီးၾၢႆႇႁွင်ႇဝဵင်းလၢႆးၶႃႈ။  ပဵၼ်ဝၢၼ်ႈမႂ်ႇလႄႈ  ယၢမ်းလဵဝ်တႄႉ ယၢပ်ႇၽိုတ်ႇတႃႇယူႇသဝ်းၵိၼ်သၢင်ႈ။   

“ႁဝ်းၶႃႈ ပဵၼ်ၵူၼ်း ဝၢၼ်ႈၼႃးတုၼ်ႇ၊ ၵုင်း ၵႅတ်ႇ၊ ၵုင်းၵၢင် ၸႄႈဝဵင်းၵေးသီး ၶႃႈဢေႃႈ။ ႁူဝ်ၵူၼ်းတႄႉ တေမီး 61 ၵေႃႉ လင်ႁိူၼ်းတေမီး 50 လင် ယၢမ်းလဵဝ် မႃးႁဵတ်းႁွင်ႈသေ ႁူင်းႁေႃးလူင်သေ ႁူမ်ႈၵၼ်ယူႇဝႆႉ ၸိူဝ်းၼႆႉၶႃႈ”-  ၽူႈတူင်ႉၼိုင်ၸွႆႈထႅမ် ၵူၼ်းပၢႆႈ ၽေးသိုၵ်း လၢႆးၶႃႈ ၵေႃႉၼိုင်ႈ လၢတ်ႈၼႄၽူႈတွႆႇႁွၵ်ႈၼင်ႇၼႆ။

ၵူၼ်းဝၢၼ်ႈ ၸိူဝ်းၼႆႉ ပၢႆႈၽေး ပၢင်တိုၵ်းသိုၵ်းသိူဝ် ၼႂ်းၵႄႈ   သိုၵ်း RCSS တင်း SSPP ဢၼ် ပိုတ်းယိုဝ်းၵၼ် တီႈလွႆႁူၼ်း တႄႇမႃးၸဵမ်မိူဝ်ႈဝၼ်းတီႈ 1/6/2021  ပုၼ်ႉမႃး။ ၸိူဝ်းၶဝ်ဢမ်ႇႁတ်းပွၵ်ႈၶိုၼ်းဝၢၼ်ႈၵဝ်ႇမိူင်းလင်လႄႈ ၸင်ႇႁဵတ်းဝၢၼ်ႈမႂ်ႇသေ ယူႇသဝ်းၵႂႃႇတီႈဝၢၼ်ႈထီႇ ၊ လၢႆးၶႃႈ။