ၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇၵေႃႈ မီးၵူၼ်းတိတ်းၸပ်းၸိူဝ်ႉမႅင်းၼမ်ၶိုၼ်ႈမႃး 700 ပၢႆ လူႉတၢႆယဝ်ႉ 30 ပၢႆ ၵူၼ်း ပိုၼ်ႉတီႈ ၸိူဝ်း ပႆႇယုမ်ႇ ၶူဝ်ႊဝိတ်ႉ 19 ၼႆႉၵေႃႈ တိုၵ်ႉမီးၼမ်လႄႈ ၸုမ်းၸွႆႈထႅမ်တူင်ႇဝူင်းၵူၼ်းမႆႈၸႂ်လွင်ႈလွတ်ႈၽေးၶူဝ်ႊဝိတ်ႉတႃႇၵူၼ်းၼႂ်းပွၵ်ႉယွမ်ႇဝၢၼ်ႈဢိူင်ႇ  ။

မိူဝ်ႈဝႃး ဝၼ်းတီႈ 28/7/2021 ၼႂ်းၸႄႈဝဵင်းသီႇပေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ မီးၵူၼ်းလူႉတၢႆ ယွၼ်ႉတၢင်း ပဵၼ်ၶူဝ်ႊဝိတ်ႉ 19 ထႅင်ႈ 4 ၵေႃႉ ၼႂ်းၼၼ်ႉ ပႃးမႄႈထဝ်ႈ ဢႃယု 71 ၵေႃႉၼိုင်ႈ။ မႄႈထဝ်ႈၼႆႉ ၵိုင်ႉၵၢင်ႉလူမ်ႉတၢႆ တီႈၼႂ်း ႁိူၼ်းမၼ်းၼၢင်း တီႈဝၢၼ်ႈသူပ်းလၢၼ်း (ဆွတ်လန်းကျေးရွာ) သေ ယူႇတီႈၽူႈမီးပုၼ်ႈၽွၼ်း ၾၢႆႇမေႃယႃ ၶဝ်လႆႈၵူတ်ႇ ထတ်းတူၺ်းပိူင်ပဵၼ်မၼ်းၵမ်းလင် လႆႈႁူႉဝႃႈ ပဵၼ်တၢင်းပဵၼ်ၶူဝ်ႊဝိတ်ႉ 19 သေတၢႆ ၼႆယဝ်ႉ။

ၽူႈတူင်ႉၼိုင် ၼႂ်းၸုမ်းၼႄႇသီးမၶျႃး ပရႁိတ ဝဵင်းသီႇပေႃႉ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “တၢင်းပဵၼ်ဢၼ်ၼႆႉ မၼ်းပဵၼ်တႄႉၶႃႈဢေႃႈ ပဵၼ်ၵၼ်တင်းလုမ်ႈၾႃႉယဝ်ႉ။ ၵဵဝ်ႇၵပ်းလွင်ႈတၢင်းပဵၼ်ၼႆႉသေ ဢၼ်ပဵၼ်ၵေႃႈမီးတႄႉ ဢၼ် တၢႆၵေႃႈမီးတႄႉ။ ၵူၺ်းၵႃႈ ၵူၼ်းမိူင်းႁဝ်းၶႃႈ ၵမ်ႈၽွင်ႈသမ်ႉ ဢမ်ႇပေႃးၶႂ်ႈယုမ်ႇၵၼ် ဝူၼ်ႉဝႃႈ မၼ်းဢမ်ႇၸႂ်ႈတႄႉ ဢမ်ႇ ပဵၼ်တႄႉၼႆသေ လွင်ႈဝူၼ်ႉၸိူင်ႉၼႆၼႆႉ ပဵၼ်ၽေးၶဵၼ်လူင်ႁဝ်းၶႃႈဢၼ်ၼိုင်ႈ”-  ဝႃႈၼႆ။

တႄႇဢဝ် ၼႂ်းလိူၼ်ၵျုၼ်ႊမႃး တေႃႇထိုင်ဝၼ်းတီႈ 28/7/2021 ၼႆႉ ၼႂ်းၸႄႈဝဵင်းသီႇပေႃႉ မီးၵူၼ်းတိတ်းၸပ်း ၸိူဝ်ႉမႅင်း 700 ပၢႆ လူႉတၢႆ 30 ပၢႆ လႆႈၶႂၢင်ႉလူင်းႁူင်းယႃယဝ်ႉ 200 ပၢႆ။ ၼႂ်းၵူၼ်းပဵၼ်ၼၼ်ႉ ပႃးသင်ၶၸဝ်ႈ 3 တူၼ်လႄႈ ၸဝ်ႈၶၢဝ် 8 ၸဝ်ႈ တိုၵ်ႉယူတ်းယႃတူဝ်ဝႆႉယူႇ ဝႃႈၼႆ။

“ၶႂ်ႈႁႂ်ႈၵူႈၵေႃႉ ၶဝ်ႈႁူမ်ႈပႃးၸွမ်းလွင်ႈၵႅတ်ႇၵင်ႈတၢင်းပဵၼ်ၼႆႉၽွင်ႈၶႃႈ သင်ဝႃႈ ဢမ်ႇယူႇလီ ၼၢဝ်ၼႆၸိုင် ယွၼ်းတၢင်းၸွႆႈ ထႅမ်ၶႃႈလႄႈ ႁဝ်းၶႃႈ တေမႃးၸွႆႈထႅမ် ပၼ်ၵူႈၶၢဝ်းယၢမ်း။ ပေႃးဝႃႈ ႁဝ်းၶႃႈ ယွမ်းႁပ်ႉၸႅတ်ႈတၢင်းပဵၼ်လႄႈ ယူတ်းယႃ တူဝ်ၼႆၸိုင် တၢင်းပဵၼ်ၼႆႉ တေၸၢင်ႈလူတ်းယွမ်းလႆႈၶႃႈဢေႃႈ ပေႃးဢမ်ႇၼမ် ၵူၼ်းထဝ်ႈႁဝ်း ၵူၼ်းႁိူၼ်းႁဝ်း ၸိူဝ်းၼႆႉ ဢမ်ႇၶႂ်ႈလူႉသုမ်းၶဝ်ၵႂႃႇၵေႃႈ ၸၢင်ႈလႆႈလူႉသုမ်းၵႂႃႇၶႃႈဢေႃႈ။ ယွၼ်ႉတၢင်းပဵၼ်ၼႆႉ ပိူၼ်ႈပဵၼ်တၢင်းလုမ်ႈၾႃႉယဝ်ႉ ဢမ်ႇ ထုၵ်ႇလီၵူဝ်လီဢၢႆ သင်ဝႃႈႁဝ်းၶႃႈ ႁူမ်ႈႁွမ်းၵၼ်သေ တိုၵ်းတေႃးၸိုင် တၢင်းပဵၼ်ၼႆႉ ၸၢင်ႈလူတ်းယွမ်းလႆႈၶႃႈ”- ၽူႈတူင်ႉ ၼိုင် ၼႂ်းၸုမ်းၼႄႇသီးမၶျႃး ဝဵင်းသီႇပေႃႉ တုၵ်းသူၼ်းလၢတ်ႈၼႄၼင်ႇၼႆထႅင်ႈ။

တႄႇဢဝ် ၶွင်ႇသီႇသိုၵ်းမၢၼ်ႈ ယိုတ်းဢႃႇၼႃႇ ၸိုင်ႈမိူင်းမႃးၼႆႉ ၼႂ်းၸႄႈဝဵင်းမိူင်းတႆး ဢမ်ႇမီးလွင်ႈၼိမ်သဝ်း ၵတ်းယဵၼ် သင်မႃး ပၢင်တိုၵ်းသိုၵ်းသိူဝ်ၵေႃႈ ၵိူတ်ႇၶိုၼ်ႈပဵၼ်ၼမ်၊ ပၢင်တေႃႇလွင်းၵေႃႈ ပွႆႇပၼ်ၵူၼ်းမိူင်းလဵၼ်ႈ တင်ႈၸႂ် ႁႂ်ႈဢၵျၢင်ႉ တၢင်းယၢမ်ႈလူႉ၊ ယႃႈမဝ်းၵမ် ၵူၼ်းလၵ်ႉၵူၼ်းၸူၼ် လိူင်ႇၼမ်၊ မၢၵ်ႇၵႆႉတႅၵ်ႇ ၾႆးၵႆႉမႆႈ  ၊လွင်ႈၵႅတ်ႇၵင်ႈ တၢင်းပဵၼ်ၶူဝ်ႊဝိတ်ႉ 19 ပွၵ်ႈၵမ်းသၢမ်ၼႆႉၵေႃႈ ဢမ်ႇႁဵတ်းသင်ပၼ်ၵူၼ်းမိူင်းလႆႈ  ။