ၵူၼ်းပၢႆႈၽေးသိုၵ်း တီႈမိူင်းၵိုင် ၵိုတ်းထႅင်ႈ 100 ပၢႆ ၵူၼ်းထဝ်ႈလႄႈ လုၵ်ႈဢွၼ်ႇ ပႆႇႁတ်းပွၵ်ႈႁိူၼ်းယေး ၸိူဝ်းၼၼ်ႉ တိုၵ်ႉႁူပ်ႉ တၢင်းယၢပ်ႇ ၵဵဝ်ႇၵပ်း ၵၢၼ်ၵိၼ်ၵၢၼ်ယမ်ႉ လွင်ႈယူႇ လွင်ႈသဝ်း။
မိူဝ်ႈဝႃး ဝၼ်းတီႈ 21/7/2021 ယၢမ်းဝၢႆးဝၼ်း ၵူၼ်းပၢႆႈၽေးသိုၵ်း ၼႂ်းဢိူင်ႇမိူင်းၶုၼ် တင်း ဢိူင်ႇႁူၺ်ႈလူင် ဢၼ်ပၢႆႈမႃး တီႈဝတ်ႉပၢင်ႇလႅင်၊ ဝတ်ႉၼွင်လီ၊ ႁူင်းႁဵၼ်း ဝတ်ႉႁူၺ်ႈလူင်လႄႈ ဝတ်ႉၼွင်လႅင်၊ ဝတ်ႉၼၢင်း ဢူးပဵမ်ႇ ၼႂ်းၸႄႈဝဵင်းမိူင်းၵိုင် ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း ၸိူဝ်းၼႆႉ ဢွၼ်ၵၼ်ပွၵ်ႈၶိုၼ်း ႁိူၼ်းယေး ႁူဝ်ၵူၼ်း ႁဵင်ပၢႆ သေတႃႉ ၸိူဝ်းၵိုတ်း ၵမ်ႈၼမ် ပဵၼ် ၵူၼ်းထဝ်ႈ၊ လုၵ်ႈဢွၼ်ႇ ႁူဝ်ၵူၼ်းတင်း မူတ်း 100 ပၢႆ တိုၵ်ႉယၢပ်ႇၽိုတ်ႇ တႃႇလႆႈပွၵ်ႈႁိူၼ်းယေးယူႇ။
ၽူႈၸွႆႈထႅမ် ၵူၼ်းပၢႆႈၽေးသိုၵ်း တီႈမိူင်းၵိုင် လၢတ်ႈတီႈၽူႈတွႆႇႁွၵ်ႈဝႃႈ – “ၸိူဝ်းၵိုတ်း ပဵၼ်ၵူၼ်းထဝ်ႈလႄႈ လုၵ်ႈဢွၼ်ႇဢေႃႈ။ ယွၼ်ႉဝႃႈ ပဵၼ်ၶၢဝ်းၽုၵ်ႇသွမ်ႈလႄႈ သင်ဝႃႈ ဢမ်ႇႁဵတ်းဢမ်ႇၽုၵ်ႇၼႂ်းလိူၼ်ၼႆႉၸိုင် တေတူၵ်းလႃႈတူၵ်းလိုၼ်းပႅတ်ႈမူတ်းယဝ်ႉ ပီၼႃႈ တေဢမ်ႇမီးသင်ၵိၼ်ယဝ်ႉ။ ၸိူဝ်းၵိုတ်းၵေႃႈ ယၢပ်ႇမိူၼ် ၵၼ်ယူႇၶႃႈ”- ဝႃႈၼႆ။
ၵူၼ်းပၢႆႈၽေးသိုၵ်း တီႈမိူင်းၵိုင်ၼႆႉ ၵမ်ႈၼမ် ပဵၼ်ၵူၼ်းႁဵတ်းႁႆႈ ႁဵတ်းၼႃး၊ ယၢမ်းလဵဝ်သမ်ႉ ပဵၼ်ၶၢဝ်း လူဝ်ႇၽုၵ်ႇ လူဝ်ႇသွမ်ႈ။ သင်ဢမ်ႇလႆႈၽုၵ်ႇသွမ်ႈၶၢဝ်းၼႆႉ တႃႇၵိၼ် ပီႈၼႃႈတေဢမ်ႇမီးသင်လႄႈ ဢွၼ်ၵၼ် မႆႈၸႂ်။
“လွင်ႈၼိုင်ႈ ၸိူဝ်းၵိုတ်းၵေႃႈ လႆႈမႆႈၸႂ်ပႃးတႃႇယူႇ တႃႇၵိၼ်ၵူၺ်းဢမ်ႇၵႃး လႆႈၵူဝ်ပႃး ၽေးၶူဝ်ႊဝိတ်ႉ 19 ၼၼ်ႉၶႃႈၼႃႇ၊ ယႃလၢင်ႉမိုဝ်းဢမ်ႇၵုမ်ႇ၊ ၽႅၼ်ပူၵ်ႉသူပ်းၵေႃႈ တႃႇၶၢဝ်းယၢဝ်းတေဢမ်ႇငၢႆႈ”- ဝႃႈၼႆ။
ၵူၼ်းပၢႆႈၽေးသိုၵ်း ၼႂ်းဢိူင်ႇမိူင်းၶုၼ်လႄႈ ဢိူင်ႇႁူၺ်ႈလူင် ဢၼ်ပၢႆႈၽေးသိုၵ်းၼႆႉ တႄႇဢဝ် ႁူဝ်ၵျုႊလၢႆႊၼႆႉမႃး တေမီးၶၢဝ်းတၢင်း ၽၢၵ်ႇလိူၼ်ယဝ်ႉ ယွၼ်ႉသိုၵ်း SSPP တင်း RCSS တိုၵ်းတေႃးၵၼ် တၢင်းသၼ်လွႆႁူၼ်းယဝ်ႉ လူင်းမႃးလေႃႇတိုၵ်းၵၼ်ၸွမ်းတူင်ႈ/ၸွမ်းဝၢၼ်ႈ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ