မိူဝ်ႈၼႆႉ ဝၼ်းတီႈ 22/7/2021 ယၢမ်းၵၢင်ၼႂ် ၸၢႆးဝုၼ်းလိူၼ်း ဢႃယု 40 ပီ ၽူႈၼမ်းၼႂ်းၵူႈလွင်ႈလွင်ႈ ၸုမ်းၵူၼ်းၼုမ်ႇတႆး TYO ပွတ်းဢွၵ်ႇၶူင်း ၵိုင်ႉၵၢင်ႉၼၢဝ်သေလႄႈ လူႉသဵင်ႈၵႂႃႇ တီႈဝဵင်းတူၼ်ႈတီး။
ၽူႈမီးပုၼ်ႈၽွၼ်းၼႂ်းၸုမ်းၵူၼ်းၼုမ်ႇတႆး TYO ဝဵင်းတူၼ်ႈတီး ၵေႃႈၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ -“ ပီႈဝုၼ်းလိူၼ်းၼႆႉ မိူဝ်ႈဝႃးတင်းမိူဝ်ႈသိုၼ်းတႄႉ မီးလူမ်းၼၢဝ်ဢိတ်းဢိတ်းၶႃႈဢေႃႈ။ ထိုင်ၼႂ်ၼႆႉတႄႉ လူမ်းမႆႈၶိုၼ်ႈႁႅင်းသေ ၽိူဝ်ႇလုၵ်ႈမေးမၼ်းဢဝ်ၵႂႃႇႁူင်းယႃ ၵႂႃႇလူႉပႅတ်ႈၵၢင်တၢင်း ၶႃႈဢေႃႈ။ ၽိူဝ်ႇဢဝ်ၵႂႃႇႁူင်းယႃၵေႃႈ ႁူင်းယႃဢမ်ႇႁပ်ႉၵူတ်ႇထတ်းပၼ်ၶူဝ်ႊဝိတ်ႉသေဢမ်ႇၵႃး ဢမ်ႇႁပ်ႉၶၢပ်ႈတူဝ်ဝႆႉပႃးၶႃႈလူင်။ ယၢပ်ႇၽိုတ်ႇတႃႇဢဝ်ၵႂႃႇၽဝ်ဢေႃႈ တလဵဝ်” – ဝႃႈၼႆ။
ယွၼ်ႉပိူဝ်ႈၶၢဝ်းၼႆႉ ၵူၼ်းမိူင်း တိတ်းၸပ်းတၢင်းပဵၼ်ၶူဝ်ႊဝိတ်ႉသေလူႉတၢႆ ၼမ်လႄႈ ပေႃးဢမ်ႇပႃးဝႂ်တၢႆတီႈႁူင်းယႃသမ်ႉ ၸုမ်းၸွႆႈထႅမ်လွင်ႈၸဵပ်းမႆႈလူႉတၢႆၵမ်ႈၼမ်ဢမ်ႇႁပ်ႉၶၢပ်ႈတူဝ်ၵႂႃႇၽဝ်ပၼ် ၊ ႁဵတ်းႁႂ်ႈၵူၼ်းမိူင်း ၸိူဝ်းလူႉတၢႆၶၢဝ်းၼႆႉ ယၢပ်ႇၽိုတ်ႇတႃႇၽဝ်ၶၢပ်ႈတူဝ် လႆႈႁူႉၼင်ႇၼႆ။
လိုၼ်းသုတ်းၶၢဝ်းယၢမ်းၵၢင်ဝၼ်းတဵင်ႈၼႆႉ ၸုမ်းၶႂၢႆႇၶႂႃပႄလႅင် ဝဵင်းတူၼ်ႈတီး ဝႃႈတေမႃး ႁပ်ႉၶၢပ်ႈတူဝ် ၸၢႆးဝုၼ်းလိူၼ်း ၵႂႃႇၽဝ်ပၼ်ဝႃႈၼႆ။
ၸၢႆးဝုၼ်းလိူၼ်းၼႆႉၸႃႇတိတီႈၵိူတ်ႇပဵၼ်ဝဵင်းၵဵင်းတုင်၊ ယၢမ်းလဵဝ်ၵိုတ်းဝႆႉမေးၼၢင်း ၼၢင်းမူဝ်ၶၢဝ် (ၽူႈၶဝ်ႈၵေႃႇမတီႇငဝ်ႈငုၼ်း TYO) လႄႈ လုၵ်ႈၸၢႆးဢွၼ်ႇ ဢႃယု 1 ပီ ၵေႃႉၼိုင်ႈ။ ယူႇသဝ်းဝႆႉတီႈဝဵင်းတူၼ်ႈတီး။
ၸၢႆးဝုၼ်းလိူၼ်းၼႆႉ ၸဵမ်မိူဝ်ႈပၢၼ်ပဵၼ်မၢဝ်ႇဢွၼ်ႇ ယူႇသဝ်းတီႈဝဵင်းၵဵင်းတုင်ပုၼ်ႉၵေႃႈ မၼ်းၸၢႆးၶဝ်ႈပႃးတူင်ႉၼိုင်ၼႂ်းၵၢၼ်ၾိင်ႈငႄႈလိၵ်ႈလၢႆးတႆး၊ ၼႂ်းတူင်ႇဝူင်းၵူၼ်းလႄႈ ၸွႆႈထႅမ်ၵၢၼ်ၵိၼ်လူႇလူႉတၢႆမႃးတႃႇသေႇ။
