မိူဝ်ႈဝႃး ဝၼ်းတီႈ 13 လိူၼ်မေႊ ၵၢင်ဝၼ်း ၸဝ်ႈႁၢၼ်ႉၶၢႆၶမ်း ၵေႃႉၼိုင်ႈ ၺႃးၸူၼ် တီႈဝဵင်းၵဵင်းတုင် မိူင်းတႆးပွတ်းဢွၵ်ႇ၊ ၸူၼ်ၼၼ်ႉ လၢၵ်ႈၵွင်ႈယိုဝ်းမၼ်းၸၢႆးယဝ်ႉ ႁိမ်ဢဝ် ၶူဝ်းငိုၼ်းၶူဝ်းၶမ်းလႄႈ ၵႃးမၼ်းၸၢႆး ႁေႃႈပၢႆႈၵႂႃႇ ဝႃႈၼႆ။
မိူဝ်ႈဝႃးၵၢင်ဝၼ်း မွၵ်ႈ 1 မူင်းပၢႆၼႆႉ ၸဝ်ႈႁၢၼ်ႉၶၢႆၶမ်း ၶေႇမရတ်ႉ ပိၵ်ႉႁၢၼ်ႉၶမ်း တီႈၵၢတ်ႇသေ ပွၵ်ႈမိူဝ်းႁိူၼ်းဢၼ်မီးတီႈပွၵ်ႉ 3 ဝဵင်းၵဵင်းတုင်။ ၽွင်းၼၼ်ႉ ထုၵ်ႇၵူၼ်းၸၢႆးၸုမ်းၼိုင်ႈ လၢၵ်ႈၵွင်ႈယိုဝ်းသေ ၸူၼ်ႁိမ် ငိုၼ်းၶမ်းလႄႈ ၶူဝ်းၶွင်။ သုမ်းပႃးၵႂႃႇ ၵႃးလႄႈ ငိုၼ်းၶမ်း ဢၼ်မီးၼႂ်းၵႃးၼၼ်ႉတင်းၼမ်။
ၸဝ်ႈႁၢၼ်ႉၶၢႆၶမ်း ၸၢႆးယီႈတိပ်ႉ ဢႃယု 47 ပီ ၺႃးယိုဝ်းဢမ်ႇယွမ်း 2 ၵမ်း၊ မၢၵ်ႇၵွင်ႈတိူဝ်ႉတီႈ ၶႅၼ်လႄႈ ၵွၵ်းႁူဝ်သေ တၢႆထင်တီႈဝႃႈၼႆ။
ၼႂ်းၵႃး ဢၼ်ၸုမ်းၸူၼ် ႁေႃႈပၢႆႈၵႂႃႇၼၼ်ႉ ပႃးၵႂႃႇ ၶမ်း မွၵ်ႈ 3 ၸွႆႉလႄႈ ငိုၼ်းတွင်း ဢၼ်ၶၢႆၶမ်းသေ တေႃႉမႃးတီႈႁိူၼ်း ဢိၵ်ႇပႃး ၾူၼ်းမၼ်းၸၢႆးထႅင်ႈ။ ၸုမ်းၸူၼ်ၼၼ်ႉ ပဵၼ်ၵူၼ်းၸၢႆး 3 ၵေႃႉ ၶီႇၵႃး Pajero မႃးၸွမ်းၵၼ်သေ လၢၵ်ႈၵွင်ႈယိုဝ်း ၸူၼ်ႁိမ် ႁေႃႈပၢႆႈၵႂႃႇ။
ဝၢႆးၼၼ်ႉ ၸဝ်ႈၼႃႈတီႈ လိုပ်ႈလမ်းသွၵ်ႈႁႃၸုမ်းၸူၼ်ၼၼ်ႉယူႇသေတႃႉ တေႃႇထိုင်မိူဝ်ႈၼႆႉၵၢင်ၼႂ်တႄႉ ပႆႇတီႉၺွပ်းလႆႈ။
မိူၼ်ၼႆ ပူၼ်ႉမႃး မိူဝ်ႈဝၼ်းတီႈ 11 ၼၼ်ႉၵေႃႈ ပဵၼ်လွင်ႈႁိမ်ၸူၼ်ဢဝ်ထူင်ငိုၼ်း ႁိမ်းလုမ်းပႃႇမႆႉ ၼႂ်းဝဵင်းၵဵင်းတုင်၊ သုမ်းပႃးၵႂႃႇ ငိုၼ်းလႄႈ ၾူၼ်း ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ