တီႈပၼ်သဵင်ၵၢင်ၸႂ် ပၢင်လိူၵ်ႈတင်ႈတီႈဝဵင်းမိူင်းသၢတ်ႇ ၸိုင်ႈတႆးပွတ်းဢွၵ်ႇၼၼ်ႉ လူဝ်ႇၵူဝ်ႇပႃႇတီႇ တီႈပႅၼ်ႈတဵၵ်းတုမ်ႇပၼ်သဵင်ၵၢင်ၸႂ်ၼၼ်ႉလဵၵ်ႉၼႃႇလႄႈၵူၼ်းထဝ်ႈ ၵူၼ်းဢႃယုယႂ်ႇ လႄႈၵူၼ်းတႃမူဝ်းၶဝ်ဢမ်ႇႁၼ်လီ လၢမ်းလိမ်းတဵၵ်းပၼ်သဵင်မႃးၵူၺ်းဝႃႈၼႆ။
ပၢင်လိူၵ်ႈတင်ႈ ၵမ်းထိ 1 ဢၼ်သိုၵ်းမၢၼ်ႈဢွၼ်ၼမ်းၸတ်းၼႂ်းဝၼ်းတီႈ 28/12/2025 မိူဝ်ႈၼႆႉ ၼႂ်းမိူင်းတႆးပွတ်းဢွၵ်ႇ ပႃး 3 ၸႄႈဝဵင်း ပဵၼ် မိူင်းသၢတ်ႇ ဝဵင်းတႃႈၶီႈလဵၵ်း လႄႈ ၵဵင်းတုင်။

လွင်ႈၼႆႉ ၵူၼ်းမိူင်းသၢတ်ႇၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈ ဝႃႈ “ မိူဝ်ႈၼႆႉ မႄႈပႃႈၵေႃႉၼိုင်ႈ ၵႂႃႇတွတ်ႈမႃး မၼ်းဢမ်ႇႁၼ်လူဝ်ႇၵူဝ်ႇ ဢမ်ႇႁၼ်ႁၢင်ႈပႃႇတီႇမၼ်းလီလီၼႆၶႃႈ ။ မၼ်းၵေႃႈ လၢမ်းလိမ်းတဵၵ်း ၵႂႃႇႁဵတ်းၼၼ်ၵူၺ်းၼႆၼေႈ ” – ဝႃႈၼႆ။
ၵူၼ်းတႃႈၶီႈလဵၵ်းၵေႃႈၼင်ႇၼၼ် ၸိူဝ်းၵႂႃႇတွတ်ႈၵေႃႈ မိူၼ်ဝႃႈ ယႃႇဢမ်ႇလွတ်ႈလႆႈလႄႈၵႂႃႇတွတ်ႈၵူၺ်း ။ ၸိူဝ်းဢမ်ႇတွတ်ႈၵေႃႈ မီးယူႇ။ မၢင်ႁိူၼ်းၵေႃႈ ပႃးသဵၼ်ႈၸိုဝ်ႈတင်းႁိူၼ်းသေတႃႉ ဢမ်ႇၵႂႃႇတွတ်ႈသေၵေႃႉၵေႃႈမီးဝႃႈၼႆ။

ၵူၼ်းတႃႈၶီႈလဵၵ်းၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ တီႈႁိူၼ်းႁဝ်းမီး 5 ၵေႃႉၵေႃႈ ပႃးတင်းႁႃႈၵေႃႉ ။ ၵူၺ်းႁဝ်းဢမ်ႇၵႂႃႇသႂ်ႇ ။ ဢၼ်ပိူၼ်ႈဝႃႈ ပေႃးဢမ်ႇၵႂႃႇသႂ်ႇသုမ်းသုၼ်ႇၼႆၼၼ်ႉ ႁဝ်းဢမ်ႇသူၼ်ၸႂ်လေႃႇ။ ၽႂ်ၵေႃႈ ဢမ်ႇႁဵတ်းႁႂ်ႈၶဝ်ႈသၢၼ်ႁဝ်းတဵမ်မေႃႈ ” – ဝႃႈၼႆ။

ၵွၼ်ႇၼႃႈပၢင်လိူၵ်ႈတင်ႈဝၼ်းၼိုင်ႈမိူၼ်ၼင်ႇမိူဝ်ႈဝႃး ဝၼ်းတီႈ 27/12/2025 ၼႆႉသမ်ႉ မီးၶၢဝ်ႇမၢၵ်ႇတႅၵ်ႇ ႁိမ်းလုမ်းပႃႇတီႇသၢင်ႇသီႈ ႁိမ်းႁူင်းပလိၵ်ႈ လႄႈႁိမ်းႁူင်းတွတ်ႈၶႅပ်းၵၢင်ၸႂ် ၸိူဝ်းၼႆႉလႄႈ ႁဵတ်းႁႂ်ႈၵူၼ်းမိူင်းတၢင်းမိူင်းတႃႈၶီႈလဵၵ်း ၵဵင်းတုင်ၵေႃႈလွမ်လွမ်မႆႈၸႂ် – ယွၼ်ႉဝႃႈ ပဵၼ်ဝဵင်းႁိမ်းလႅၼ်လိၼ်သေ မိူဝ်ႈၵွၼ်ႇၵေႃႈၵႆႉယၢမ်ႈမီးလွင်ႈမၢၵ်ႇတႅၵ်ႇမႃး။

ၼၢင်းယိင်းၵူၼ်းတႃႈၶီႈလဵၵ်းလၢတ်ႈဝႃႈ – “လႆႈငိၼ်းၶၢဝ်ႇဢၼ်ၼၼ်ႉယဝ်ႉ တီႈၼႆႈၵေႃႈ ၵူဝ်မၼ်းမိူၼ်ၼၼ် ။ တႃႇတေလဵပ်ႈၵႂႃႇၸမ်ႁူင်းတွတ်ႈၶႅပ်းသဵင်ၵၢင်ၸႂ်ၵူၺ်းၵေႃႈ ပေႃးၵူဝ်ႇပႂ်ႉထႃႈယဝ်ႉ” – ဝႃႈၼႆ။
တီႈဝဵင်းၵဵင်းတုင်ၵေႃႈ ၼင်ႇၼၼ် လႆႈႁၼ် ပျီႇတူႉၸိတ်ႉ ၊ ပလိၵ်ႈမၢၼ်ႈၸိူဝ်းၼႆႉ ပႂ်ႉဢဝ်ႁူမ်ႇလူမ်ႈၸွမ်းႁူင်းပၼ်ၶႅပ်းၵၢင်ၸႂ် ။ ၵူၼ်းၵႂႃႇပၼ်သဵင်ၵၢင်ၸႂ်ၼႆႉ ၾူၼ်းၸိူဝ်းၼႆႉဢမ်ႇပၼ်ဢဝ်ၶဝ်ႈ ၼႆယဝ်ႉ။

လွင်ႈၼႆႉ ၼၢင်းယိင်းၵူၼ်းၵဵင်းတုင်ၵေႃႉၼိုင်ႈလၢတ်ႈၼႄဝႆႉၼင်ႇၼႆ – “ ႁဝ်းၵႂႃႇယူႇ ၵူၺ်းၵႃႈ ၶဝ်ဢမ်ႇပၼ်ဢဝ်ၾူၼ်းၶဝ်ႈ ။ ၸွမ်းႁူင်းတွတ်ႈသဵင်ၼၼ်ႉတႄႉ လႆႈႁၼ် ပျီႇတူႉၸိတ်ႉၶဝ် ယေးၶဝ် ပႂ်ႉဝႆႉဢေႃႈ ။ ၾၢႆႇၼႂ်းမၼ်းတႄႉ မီးမေႃသွၼ်ၶဝ်ၸိူဝ်းမႃးပႂ်ႉၼၼ်ႉၼႃႇ ” – ဝႃႈၼႆ။

မိူင်းသၢတ်ႈၼႆႉ ႁူင်းတွတ်ႈၶႅပ်းၵၢင်ၸႂ် မီး 70 ႁူင်း ၊ တႃႈၶီႈလဵၵ်း – 88 ႁူင်း ၊ ၵဵင်းတုင် – 111 ႁူင်း ။ၵမ်ႈၼမ် ႁဵတ်းဝႆႉၸွမ်း လုမ်းၽူႈၵွၼ်းပွၵ်ႉ ၊ ႁူင်းႁဵၼ်း ၸိူဝ်းၼႆႉ ။